લાલચ આપી દોઢથી પોણા બે લાખ લોકોને છેતર્યાં
દૈનિક આકર્ષક વળતર અને 15 લેયર રેફરલ બોનસની લલચામણી ઓફરમાં લોકો ફસાયાઃ 6 આરોપી ઝડપાયા
- Advertisement -
સોશિયલ મીડિયા અને ડિજિટલ પ્લેટફોર્મના માધ્યમથી ટૂંકા સમયમાં અસાધારણ નાણાકીય વળતરની લાલચ આપી રાજ્યભરના ૧.૫ લાખથી વધુ રોકાણકારો સાથે કરોડો રૂપિયાની ઠગાઈ આચરનારી ગેંગનો અમરેલી સાયબર ક્રાઈમ પોલીસે પર્દાફાશ કર્યો છે. SD Pay અને Apna Pay નામની મોબાઈલ એપ્લિકેશન મારફતે આચરવામાં આવેલા અંદાજે ૬૩૪ કરોડ રૂપિયાના નાણાકીય કૌભાંડમાં સ્પેશિયલ ઈન્વેસ્ટિગેશન ટીમ (SIT) દ્વારા કંપનીના ડિરેક્ટર સહિત ૬ આરોપીની ધરપકડ કરવામાં આવી છે. જેમાં સૂર્યસિંહ રાઠોડ (ઉ. ૨૪): રહે. માણસા, ગાંધીનગર, આશિષ ગેડિયા (ઉ. ૩૮): મૂળ સાવરકુંડલા, હાલ સુરત, ભાવેશ ચૌહાણ (ઉ.૪૧) મૂળ મૂળ સાવરકુંડલા, હાલ સુરત, નિશી પ્રસાદ (ઉ. ૪૭) રહે. મહેસાણા (મૂળ બિહાર), સોહિલ મકવાણા (ઉ. ૨૬): રહે. મહેસાણા અને નિરવકુમાર પટેલ (ઉ. ૩૨): રહે. બલોલ, મહેસાણાનો સમાવેશ થાય છે.
મળતી માહિતી અનુસાર, આરોપીઓએ ‘S.D. Pay’ એપ્લિકેશન દ્વારા લોકો પાસે ૧ હજાર રૂપિયાથી લઈને ૫ લાખ રૂપિયાથી વધુ રકમનું રોકાણ કરાવી દૈનિક ૦.૧૫%થી ૦.૩૦% સુધીનું વળતર આપવાની જાહેરાતો કરી હતી. આ ઉપરાંત, ૧૫ અલગ-અલગ લેયર સુધી ૩% થી ૩૦% સુધીના રેફરલ બોનસની લાલચ આપી લોકોમાં વિશ્વાસ ઊભો કર્યો હતો. પ્લે સ્ટોર પર ૧૦ લાખથી વધુ ડાઉનલોડ ધરાવતી આ એપ દ્વારા આરોપીઓએ પોતાના રેફરલથી જ અંદાજે દોઢથી પોણા બે લાખ લોકોને જોડીને કરોડોનું રોકાણ કરાવ્યું હતું.
રોકાણ સ્લેબ અને દૈનિક વળતર
૧,૦૦૦ રૂપિયાથી ૨૫,૦૦૦ રૂપિયા: ૦.૧૫% દૈનિક વળતર
૨૫,૦૦૦ રૂપિયાથી ૧ લાખ રૂપિયા રૂપિયા:૦.૨૦% દૈનિક વળતર
૧ લાખ રૂપિયાથી ૫ લાખ રૂપિયા: ૦.૨૫% દૈનિક વળતર
૫ લાખ રૂપિયાથી વધુઃ ૦.૩૦% દૈનિક વળતર
રેફરલ બોનસઃ ૧૫ લેયર સુધી ૩%થી ૩૦% સુધીનું કમિશન
ડમી કંપનીઓ અને 15 બૅંક ખાતામાં 634 કરોડની હેરાફેરી
આ મામલે અમરેલી સાયબર ક્રાઈમ પોલીસ સ્ટેશન ખાતે BNSની કલમો, Banning of Unregulated Deposit Schemes Act, GPID એક્ટ અને IT એક્ટ હેઠળ ગુનો નોંધી SITની રચના કરાઈ હતી. તપાસ દરમિયાન સામે આવ્યું કે આરોપીઓએ નાણાં મેળવવા અને સગેવગે કરવા S.D. Hub (OPC) Pvt. Ltd., Shiv Dharti Communication, Upay Digi Payment India સહિતની ડમી કંપનીઓ ઊભી કરી હતી. આ કંપનીઓના ૧૫ જેટલા બેન્ક ખાતાઓમાં ૬૩૪ કરોડ રૂપિયાની જંગી રકમ જમા થઈ હોવાનું ખુલ્યું છે. આ ઉપરાંત આરોપીઓના અંગત ૩૦થી ૩૫ બેન્ક ખાતાઓ પણ મળી આવ્યા છે.
