ટેબલ ટેનિસ સ્પર્ધામાં મિહિરગિરી ગોસાઈ અને કૃષ્ણા પંડ્યાનો દબદબો

રાજકોટમાં સૌરાષ્ટ્ર યુનિવર્સિટી આંતર કોલેજ ટેબલ ટેનિસ સ્પર્ધા યોજાઈ

૨૦ પુરુષ અને ૧૦ મહિલા ટીમોના અંદાજે ૭૦ ખેલાડીએ ભાગ લીધો હતો

વિજેતાઓને ટ્રોફી, મેડલ અને પ્રમાણપત્રોથી સન્માનિત કરાયા

સૌરાષ્ટ્ર યુનિવર્સિટી, રાજકોટ દ્વારા શૈક્ષણિક વર્ષ ૨૦૨૬-૨૭ અંતર્ગત આંતર કોલેજ ટેબલ ટેનિસ (પુરુષ/મહિલા) સ્પર્ધાનું તા. ૮ ઓગસ્ટ, ૨૦૨૬ના રોજ શ્રી એમ. એન. વિરાણી સાઇન્સ કોલેજ, રાજકોટ ખાતે સફળતાપૂર્વક
આયોજન કરવામાં આવ્યું હતું. સ્પર્ધામાં સૌરાષ્ટ્ર યુનિવર્સિટી સાથે સંલગ્ન વિવિધ કોલેજોની ટીમોએ ઉત્સાહભેર ભાગ લઈ પોતાની રમતકૌશલ્યનું પ્રદર્શન કર્યું હતું. સ્પર્ધાના ઉદ્ઘાટન પ્રસંગે ડો. અર્જુનસિંહ રાણા, ડો. હરીશ રાબા,
પ્રોફ. કિશોરભાઈ માવદીયા, ડો. એમ. બી. મકવાણા, ડો. કે. ડી. લાડવા તથા ડો. ભાવિન કનેરીયા સહિતના મહાનુભાવો વિશેષ ઉપસ્થિત રહ્યા હતા. ઉપસ્થિત મહાનુભાવોએ ખેલાડીઓને શુભેચ્છાઓ પાઠવી રમતગમત ક્ષેત્રે શ્રેષ્ઠ
પ્રદર્શન કરવા પ્રોત્સાહિત કર્યા હતા. આ પ્રસંગે મહાનુભાવોએ જણાવ્યું હતું કે, રમતગમત માત્ર શારીરિક કૌશલ્ય પૂરતું મર્યાદિત નથી, પરંતુ તેના માધ્યમથી શિસ્ત, નેતૃત્વ, ટીમભાવના, આત્મવિશ્વાસ અને પડકારોનો સામનો
કરવાની ક્ષમતા જેવા જીવનમૂલ્યો પણ વિકસે છે. ખેલાડીઓએ જીત-હાર કરતાં રમતની ભાવનાને મહત્વ આપી પોતાની પ્રતિભાને સતત વિકસાવવી જોઈએ તેવી પ્રેરણા આપવામાં આવી હતી.

આંતર કોલેજ ટેબલ ટેનિસ સ્પર્ધામાં સૌરાષ્ટ્ર યુનિવર્સિટી સંલગ્ન ૨૦ પુરુષ ટીમો તથા ૧૦ મહિલા ટીમ મળી કુલ અંદાજે ૭૦ ખેલાડીઓએ ઉત્સાહપૂર્વક ભાગ લીધો હતો. સમગ્ર સ્પર્ધા દરમિયાન ખેલાડીઓ વચ્ચે રસાકસીભરી
મુકાબલાઓ જોવા મળ્યા હતા. ખેલાડીઓએ ઉચ્ચ કક્ષાનું રમતકૌશલ્ય અને શિસ્તબદ્ધ રમતનું પ્રદર્શન કરી સ્પર્ધાને રસપ્રદ બનાવી હતી. સ્પર્ધાનું સમગ્ર સંચાલન સૌરાષ્ટ્ર યુનિવર્સિટી દ્વારા નિયુક્ત ઓબ્ઝર્વર ડૉ. રિધમ વાગડિયા
તથા મનીષ દવેની દેખરેખ હેઠળ કરવામાં આવ્યું હતું.

આયોજનમાં વિવિધ સમિતિઓનો સહયોગ
આ સમગ્ર સ્પર્ધાનું આયોજન ડો. કે. ડી. લાડવાના માર્ગદર્શન હેઠળ કરવામાં આવ્યું હતું. સ્પર્ધાને સફળ બનાવવા ડો. ભાવિન કનેરીયા, આયોજન સમિતિ, કોલેજ સ્ટાફ, રમત અધિકારીઓ, સ્વયંસેવકો તથા વિદ્યાર્થીઓએ
મહત્વપૂર્ણ સહયોગ આપ્યો હતો. તમામની કામગીરીના પરિણામે સ્પર્ધાનું આયોજન સુવ્યવસ્થિત અને સફળતાપૂર્વક પૂર્ણ થયું હતું. સૌરાષ્ટ્ર યુનિવર્સિટીના કુલપતિ ડૉ. ઉત્પલ જોષી, રજિસ્ટ્રાર ડૉ. અજયસિંહ જાડેજા તથા ઇન્ચાર્જ
શારીરિક શિક્ષણ નિયામક ડૉ. હરીશ બી. રાબાએ સ્પર્ધાના સફળ આયોજન બદલ આયોજક સંસ્થા, ઓબ્ઝર્વર, રમત અધિકારીઓ, ખેલાડીઓ તથા વિજેતા ટીમોને અભિનંદન પાઠવ્યા હતા. સાથે જ તમામ ખેલાડીઓને ભવિષ્યમાં
પણ રમતગમત ક્ષેત્રે વધુ સિદ્ધિઓ હાંસલ કરવા માટે શુભેચ્છાઓ પાઠવવામાં આવી હતી. અંતે વિવિધ વિભાગના વિજેતા ખેલાડીઓ અને ટીમોને ઉપસ્થિત મહાનુભાવોના હસ્તે ટ્રોફી, મેડલ તથા પ્રમાણપત્રો એનાયત કરી
સન્માનિત કરવામાં આવ્યા હતા. આ સાથે સૌરાષ્ટ્ર યુનિવર્સિટીની આંતર કોલેજ ટેબલ ટેનિસ સ્પર્ધાનું સફળતાપૂર્વક સમાપન થયું હતું.

ટેબલ ટેનિસ સ્પર્ધાના વિજેતાઓ
પુરુષ વિભાગમાં મિહિરગિરી ગોસાઈ પ્રથમ : પુરુષોના વ્યક્તિગત વિભાગમાં મોરબીની જી. જે. શેઠ વાણિજ્ય મહાવિદ્યાલયના ગોસાઈ મિહિરગિરી કૈલાશગિરીએ પ્રથમ ક્રમ મેળવી વિજેતા બન્યા હતા. દ્વિતીય ક્રમે મોરબીની
જીએમઈઆરએસ તબીબી મહાવિદ્યાલયના ત્રિવેદી વિષય રવિન્દ્રભાઈ તેમજ તૃતીય ક્રમે જામનગરની એમ. પી. શાહ સરકારી તબીબી મહાવિદ્યાલયના કલવત ઉઝૈર મહમ્મદે સફળતા મેળવી હતી.
મહિલા વિભાગમાં કૃષ્ણા પંડ્યાનો દબદબો : મહિલા વ્યક્તિગત વિભાગમાં હળવદની પારંગત મહાવિદ્યાલયની પંડ્યા કૃષ્ણા પ્રેમશંકરભાઈએ શાનદાર રમતનું પ્રદર્શન કરી પ્રથમ સ્થાન મેળવ્યું હતું. દ્વિતીય ક્રમ જામનગરની એમ.
પી. શાહ સરકારી તબીબી મહાવિદ્યાલયના યાદવ કૃષ્ણા મૂળચંદ અને તૃતીય ક્રમ ધ્રાંગધ્રાની એસ. એસ. પી. જૈન કલા અને વાણિજ્ય મહાવિદ્યાલયના કાજી સિમરન યુનુસભાઈ મેળવ્યો હતો.