રાજકોટમાં મનપાના આરોગ્ય વિભાગનો દરોડો : 75 પેઢી-રેસ્ટોરન્ટમાં તપાસ, 12 વેપારીને નોટિસ, ત્રણ ફેક્ટરી સીલ

1,020 કિલો અખાદ્ય જથ્થો નાશ : રૂ.34,500નો દંડ ફટકાર્યો

તપાસ માટે મીઠા શક્કરપારા, સુગર પાવડર, મેંગો પાવડર, સ્વીટનર, હળદર, મરચું અને ધાણાજીરું પાવડર સહિત 10 નમૂના લેબમાં મોકલાયા

5,600 કિલો મસાલા અને 2,000 લિટર ફ્લેવરનો શંકાસ્પદ જથ્થો મળતા સ્થગિત કરાયો

વાવડી ઇન્ડસ્ટ્રીયલની કેસર ફૂડ પ્રોડક્ટ્સ, ગોંડલ રોડની શાહ ફૂડ પ્રોસેસિંગ અને શ્રીનાથજી ટ્રેડિંગ એકમ સીલ

રાજકોટ મહાનગરપાલિકાના આરોગ્ય શાખાના ફૂડ વિભાગે શહેરમાં ભેળસેળયુક્ત ખાદ્ય પદાર્થો અને અસ્વચ્છ ઉત્પાદન એકમો સામે વધુ એક વ્યાપક સર્વેલન્સ ડ્રાઈવ હાથ ધરી હતી. શહેરના વિવિધ વિસ્તારોમાં કુલ 75 પેઢી, રેસ્ટોરન્ટ અને ખાદ્ય ઉત્પાદન એકમોની તપાસ દરમિયાન 1,020 કિલોગ્રામ અખાદ્ય અને વાસી ખાદ્ય જથ્થાનો નાશ કરવામાં આવ્યો હતો. ઉપરાંત 12 વેપારીઓને સ્ટોરેજ, લાઇસન્સ અને હાઈજેનિક કન્ડિશન અંગે નોટિસ આપવામાં આવી હતી અને કુલ રૂ.34,500નો વહીવટી ચાર્જ વસૂલવામાં આવ્યો હતો. અભિયાન દરમિયાન 10 ખાદ્ય નમૂના લેબોરેટરીમાં મોકલવામાં આવ્યા હતા, જ્યારે ગંભીર અનિયમિતતાઓ સામે આવતા ત્રણ પેઢીઓને સીલ કરવામાં આવી હતી.

સૌથી મોટી કાર્યવાહી વાવડી ઇન્ડસ્ટ્રીયલ વિસ્તારમાં આવેલી કેસર ફૂડ પ્રોડક્ટ્સ સામે કરવામાં આવી હતી. તપાસ દરમિયાન ખાદ્ય પદાર્થોની બનાવટમાં ઉપયોગમાં લેવાતા લોટના પેકિંગ પર “પશુ આહાર” તરીકે છાપેલું જોવા મળ્યું હતું. ઉપરાંત જમીન પર અનહાઈજેનિક રીતે સંગ્રહ કરાયેલા મીઠા શક્કરપારા અને લોટ સહિત અંદાજે 1,020 કિલોગ્રામ અખાદ્ય જથ્થાનો નાશ કરવામાં આવ્યો હતો. પેઢીને સીલ કરીને રૂ.5,000નો વહીવટી ચાર્જ વસૂલવામાં આવ્યો હતો અને મીઠા શક્કરપારા તથા સુગર પાવડરના નમૂનાઓ લેવામાં આવ્યા હતા.

ગોંડલ રોડ પર આવેલી શાહ ફૂડ પ્રોસેસિંગ પ્રાઈવેટ લિમિટેડમાં તપાસ દરમિયાન ટેક્નિકલ પર્સનની ગેરહાજરી, ઉત્પાદનનો બેચવાઈઝ રેકોર્ડ ન હોવો અને FSSAI મુજબ લેબલ વગરના ફૂડ એડિટિવ્સ, એસન્સ, પ્રીમિક્સ અને અન્ય સામગ્રી મળી આવી હતી. અહીંથી અંદાજે 5,972 કિલોગ્રામ વિવિધ ખાદ્ય સામગ્રી તથા 2,000 લિટર અલગ-અલગ ફ્લેવરના એસન્સ અને કોન્સન્ટ્રેટ શંકાસ્પદ હાલતમાં મળી આવતા તેનો જથ્થો સ્થગિત કરી પેઢીને સીલ કરવામાં આવી હતી. રૂ.10,000નો વહીવટી ચાર્જ વસૂલવામાં આવ્યો હતો અને મેંગો પાવડર તથા સ્વીટનરના નમૂનાઓ લેવામાં આવ્યા હતા.

તે જ વિસ્તારમાં આવેલી શ્રીનાથજી ટ્રેડિંગમાં પણ બેચવાઈઝ રેકોર્ડ વગર વિવિધ બ્રાન્ડના મસાલા, મરચું પાવડર, હળદર પાવડર અને ધાણાજીરું પાવડર સહિત અંદાજે **5,600 કિલોગ્રામ** શંકાસ્પદ જથ્થો મળી આવતા તેને સ્થગિત કરવામાં આવ્યો હતો. પેઢીને સીલ કરીને રૂ.10,000નો વહીવટી ચાર્જ વસૂલવામાં આવ્યો હતો તેમજ હળદર, મરચું અને ધાણાજીરું પાવડરના નમૂનાઓ લેવામાં આવ્યા હતા.

અભિયાન દરમિયાન યુનિવર્સિટી રોડ, ડી-માર્ટ રોડ, ઉમિયાજી ચોક, શ્રદ્ધા પાર્ક અને અન્ય વિસ્તારોમાં આવેલી અનેક પાન-કોલ્ડ્રિંક્સ, હોટલ, ડેરી, જનરલ સ્ટોર અને ફરસાણની દુકાનોમાં પણ તપાસ હાથ ધરવામાં આવી હતી. લાઇસન્સ વગર વ્યવસાય ચલાવવો, અનહાઈજેનિક સ્થિતિ, ન્યૂસન્સ, યોગ્ય સ્ટોરેજનો અભાવ અને નિયમોના ભંગ બદલ વેપારીઓને નોટિસ ફટકારી રૂ.500થી રૂ.1,000 સુધીનો વહીવટી ચાર્જ વસૂલવામાં આવ્યો હતો. મિલ્ક ચેકિંગ અને સેમ્પલિંગ અભિયાન હેઠળ ખોડલ ડેરી ફાર્મમાંથી માવો, શ્યામ ડેરી ફાર્મમાંથી મલાઈ, અરમાન ડેરી ફાર્મમાંથી ભેંસના દૂધના નમૂનાઓ લેવામાં આવ્યા હતા. ઉપરાંત સીલ કરાયેલી પેઢીઓમાંથી મીઠા શક્કરપારા, સુગર પાવડર, મેંગો પાવડર, સ્વીટનર, હળદર, મરચું અને ધાણાજીરું પાવડર સહિત કુલ 10 નમૂનાઓ લેબોરેટરીમાં મોકલવામાં આવ્યા છે.