ગુજરાત રાજ્યમાં દર હજારે 19 નવજાતના મોત, પાંચ વર્ષમાં 70 હજાર શિશુએ ગુમાવ્યો જીવ

સિવિલ રજિસ્ટ્રેશન સિસ્ટમ (CRS)ના રિપોર્ટમાં ચોંકાવનારો ખુલાસો: શહેરોની સરખામણીમાં ગામડાંમાં નવજાત શિશુના મૃત્યુ વધુ

દિલ્હીમાં શિશુ મૃત્યુદર 11, ગોવામાં 7, તામિલનાડુમાં 11, મહારાષ્ટ્રમાં 13 અને કેરળમાં માત્ર 8 નોંધાયો

બાળ મૃત્યુદર ઘટાવવા સરકારી યોજનાનો અમલમાં પણ બિનઅસરકારક, લાખોનું આંધણ પરંતુ નક્કર પરિણામ નહીં

ખાસ-ખબર ન્યૂઝ રાજકોટ

ગુજરાતમાં મસમોટા ઉદ્યોગો અને ગગનચુંબી ઈમારતોના ચળકાટ વચ્ચે નવજાત શિશુઓની મરણચીસ સંભળાઇ રહી છે. સરકારી ચોપડે નોંધાયેલા આંકડા મુજબ, આરોગ્ય ક્ષેત્રે હરણફાળ ભરતા વિકસીત ગુજરાતમાં દર એક હજાર જન્મેલા બાળકો પૈકી 19 માસૂમો દમ તોડી રહ્યા છે. એટલુ જ નહીં, શહેરોની સરખામણીએ ગામડાઓમાં નવજાતના મોત વધુ થઈ રહ્યાં છે. સરકારી યોજનાઓના માધ્યમથી બાળમૃત્યુ દર ઘટાડવા લાખો કરોડોનું આંધણ કરવામાં આવી રહ્યું છે તેમ છતાં નક્કર પરિણામ મળી શક્યુ નથી. ગુજરાત સરકાર દર વર્ષે બજેટમાં આરોગ્ય અને પરિવાર કલ્યાણ વિભાગ માટે કરોડો રૂપિયાની જોગવાઈ કરે છે. કાગળ પર બજેટનું કદ દર વર્ષે વધે છે. સિવિલ રજીસ્ટ્રેશન સિસ્ટમના રિપોર્ટમાં એવો ખુલાસો કે, છેલ્લાં પાંચેક વર્ષમાં ગુજરાતમાં 70 હજાર નવજાત શિશુઓ મોતને ભેટ્યાં છે. આંકડાઓ પરથી એક વાત સ્પષ્ટ થઈ છે કે, નવજાતને બચાવવા માટે હજુ ઘણું ખરુ કરવાની જરૂર છે. સૌથી ચોંકાવનારી બાબત એ છે કે ડિજિટલ યુગમાં પણ શહેર અને ગામડા વચ્ચેની ખાઈ હજુ પુરાઈ નથી. સીઆરએસનો રિપોર્ટ કહે છે કે, ગુજરાતમાં શહેરી વિસ્તારમાં દર હજારે 15 જયારે ગ્રામ્ય વિસ્તારમાં દર હજારે 22 શિશુના મોત થઈ રહ્યાં છે.ગુજરાતમાં શિશ મૃત્યુદર 19 રહ્યો છે જ્યારે દિલ્હીમાં 11, ગોવામાં 7, તામિલનાડુમાં 11, તેલંગાનામાં 16, પંજાબમાં 16, પશ્ચિમ બંગાળમાં 16, મહારાષ્ટ્રમાં 13, કેરાલામાં 8 શિશુ મૃત્યુદર રહ્યો છે. ગુજરાત કરતાં આ બધા રાજ્યો શિશુ મૃત્યુદર ઘટાડવામાં સફળ રહ્યાં છે. સરકારી રિપોર્ટમાં સ્વીકારાયું છે કે ગર્ભવતી મહિલાઓમાં લોહીની ઉણપ (એનિમિયા) અને કુપોષણને કારણે બાળકો અધૂરા મહિને અને ઓછા વજન સાથે જન્મે છે. મમતા અભિયાન, બાળ સખા યોજના, કુપોષણમુક્ત ગુજરાત અભિયાન, જનની સુરક્ષા અભિયાન સહિત અન્ય સરકારી યોજનાઓ અમલમાં છે. લાખો કરોડોનો ખર્ચ કરી સગર્ભા માતાઓ સુધી સરકારી યોજનાઓનો લાભ પહોંચાડવામાં આવી રહ્યો છે તેમ છતાંય નવજાત શિશુઓનો મૃત્યુદરમાં ધાર્યુ પરિણામ મળી શક્યુ નથી.

ગુજરાતમાં શિશુ મૃત્યુદરની સ્થિતિ
(દર એક હજાર બાળકોએ)

શિશુ મૃત્યુદર
શહેરોમાં : 15
ગ્રામ્યમાં : 23

શહેરમાં મૃત્યુદર
છોકરા : 16
છોકરી : 24

ગ્રામ્ય મૃત્યુદર
છોકરા : 23
છોકરી : 21