લેવિસ અને મેટ્રો ગ્રુપ પર સતત ત્રીજા દિવસે દરોડા, 250 કરોડના બેનામી વ્યવહારો મળ્યા

રૂ. 11 કરોડની રોકડ અને રૂ. 5 કરોડની જવેલરી જપ્ત કરાઈ

ખાસ-ખબર ન્યૂઝ મોરબી, તા.18
મોરબી અને રાજકોટમાં ઈંઝ વિભાગના મેગા સર્ચ-ઓપરેશને સૌરાષ્ટ્રના ઉદ્યોગજગતમાં ખળભળાટ મચાવી દીધો છે. મોરબીના જાણીતા લેવિસ અને મેટ્રો સિરામિક ગ્રુપ પર આવકવેરા વિભાગ દ્વારા શરૂ કરવામાં આવેલી તપાસમાં અત્યારસુધીમાં 11 કરોડની રોકડ અને 5 કરોડની જવેલરી જપ્ત કરવામાં આવી છે. આ ઉપરાંત તપાસ દરમિયાન 250 કરોડ રૂપિયાથી વધુના બેનામી હિસાબો મળ્યા છે, જે અત્યારસુધીની સૌથી મોટી કરચોરીનો ખુલાસો કરે છે. હાલ આ તપાસ પૂર્ણતાના આરે છે.

રાજકોટ ઈન્વેસ્ટિગેશન વિંગના જોઇન્ટ કમિશનરના નેતૃત્વ હેઠળ, આ વર્ષનું સૌથી મોટું સર્ચ- ઓપરેશન ચાલી રહ્યું છે. રાજકોટ સહિત ગુજરાતના 250 જેટલા અધિકારીઓ, ટેક્નિકલ ટીમ અને પોલીસકાફલા સાથે, મોરબીના લેવિસ, લીવા, મેટ્રો, મોડર્ન અને ઇડનહિલ ગ્રુપનાં 40 સ્થળે એકસાથે દરોડા પાડવામાં આવ્યા હતા. આ 40 સ્થળમાંથી 30 તો માત્ર માલિકો અને ભાગીદારોનાં નિવાસસ્થાનો જ હતાં, જે દર્શાવે છે કે આ તપાસ માત્ર વ્યાપારી એકમો પૂરતી સીમિત નથી.

આ સર્ચ-ઓપરેશનની શરૂઆતમાં જ પ્રથમ દિવસે રાજકોટમાં રહેતા એક ભાગીદારના ઘરેથી રૂ. 3 કરોડની બિનહિસાબી રોકડ મળી હતી. ત્યાર બાદ તપાસ આગળ વધતાં બીજા દિવસે અન્ય સ્થળોએથી પણ મોટી માત્રામાં રોકડ અને જવેલરી જપ્ત કરવામાં આવી, જેનો આંકડો 11 કરોડ રૂપિયાની રોકડ અને 5 કરોડની જવેલરી પર પહોંચ્યો છે. આ તપાસમાં સિરામિક એસોસિયેશનના પૂર્વ પ્રમુખ રાજુભાઈ ધમાસણા તેમજ ધીરુભાઈ રોજમાળા અને જિતુભાઈ રોજમાળા સહિતના ભાગીદારો અને તેમના એકાઉન્ટન્ટ્સ રડાર પર આવ્યા છે.

આ ગ્રુપ દ્વારા ટાઇલ્સના ઉત્પાદનમાં ઓછો નફો બતાવી મોટા પાયે કરચોરી કરવામાં આવી રહી હોવાનું સામે આવ્યું છે. ઈન્કમટેક્સ વિભાગે છેલ્લા પાંચ મહિનાથી આ ગ્રુપના હિસાબોની ઝીણવટભરી તપાસ કરી હતી અને મહિનાઓના હોમવર્ક બાદ આ મેગા ઓપરેશન હાથ ધરવામાં આવ્યું હતું. આ તપાસ દરમિયાન 250 કરોડ રૂપિયાથી વધુના બેનામી હિસાબો અને દસ્તાવેજો મળ્યા છે, જે કરચોરીના કદને દર્શાવે છે. આ આંકડો હજુ પણ વધી શકે છે, કારણ કે ડિજિટલ ડેટાનું અવલોકન હજુ પણ ચાલુ છે.

આવકવેરા વિભાગનાં સૂત્રોના જણાવ્યા અનુસાર, અધિકારીઓ હાલ ડિજિટલ ડેટા મળવાની રાહ જોઈ રહ્યા છે. આ ગ્રુપના કોમ્પ્યુટરો અને અન્ય ડિજિટલ ઉપકરણોમાંથી મળનારી માહિતી આ તપાસ માટે અત્યંત મહત્ત્વપૂર્ણ સાબિત થશે. ડિજિટલ પુરાવાઓને આધારે આ તપાસ વધુ ઊંડાણપૂર્વક થઈ શકે છે અને કરચોરીના વધુ પડકારોનો પર્દાફાશ થઈ શકે છે.