નગરપાલિકા ફોટો સેશન માટે જ કાર્યવાહી કરતી હોવાનો આક્ષેપ
ખાસ-ખબર ન્યૂઝ સુરેન્દ્રનગર, તા.14
રાજ્યભરમાં ગેરકાયદેસર દબાણો અને પાક્કા બાંધકામો પર બુલડોઝર ફેરવી દબાણો દૂર કરવામાં આવે છે ત્યારે સુરેન્દ્રનગર જિલ્લાના અનેક શહેરી વિસ્તારોમાં નગરપાલિકા દ્વારા દબાણની કામગીરી હાથ તો ધરી હતી પરંતુ આ માત્ર એક નાટક હોય તે પ્રકારે કામગીરી બાદ ફરીથી દબાણો યથાવત સ્થિતિમાં જોવા મળ્યા હતા. જેમાં ધ્રાંગધ્રા શહેરમાં સતત બે દિવસથી પોલીસ, હિંગર્ડ અને નગરપાલિકાનો સ્ટાફ દબાણ હટાવવા માટે નીકળી પડ્યા હતા શહેરના મુખ્ય બજારોના વેપારીઓ દ્વારા ફૂટપાથ પર કરેલ દબાણો દૂર કરવા માટે જેસીબી સહિતના વાહનો લઈ જાણે ફોટો સેશન માટે નીકળ્યા હોય તે પ્રકારે પ્રથમ દિવસે એકલ દોકલ દબાણો હટાવી ફોટો પડાવી લીધા હતા પરંતુ જે પ્રકારે નગરપાલિકા દ્વારા માત્ર અમુક વેપારીઓને જ ટાર્ગેટ કરવામાં આવતા હોય તેને લઈ ટાર્ગેટ થયેલ વેપારીઓ દ્વારા પાલિકા સામે તમામ દબાણ હટાવવા માટે જણાવ્યું હતું જેથી બીજા દિવસે સવારથી નગરપાલિકા સ્ટાફ પ્રથમ દિવસના માફક વાહનો લઈ બજારમાં દબાણ હટાવવા નીકળી પડ્યા હતા પરંતુ બીજા દિવસે જે પ્રકારે દબાણ હટાવાયા તેમાં કેટલાક સ્થળો પર લઘુમતી સમાજના ધંધા રોજગારને બંધ કરવાનો પ્રયાસ થયો હોવાનો આક્ષેપ પણ કરાયો હતો જોકે નગરપાલિકા તંત્રની આ બે દિવસીય દબાણ હટાવવાની ઝુંબેશ કોઈ ખાસ કામ લાગી ન હતી કારણ કે ત્રીજા દિવસે ફરીથી હટાવેલા દબાણો ખડકાઈ ચૂક્યા હતા અને પાલિકાના કર્મચારીઓની સાથે પોલીસ સ્ટાફનો પણ બે દિવસ જેટલો સમય વેડફાયો હતો.
