માત્ર એક જ દિવસમાં ટ્રમ્પે 1000 ગોલ્ડ કાર્ડ વેંચ્યા

અમેરિકામાં ગોલ્ડ કાર્ડ લેવા માટે લોકોની પડાપડી

એકની ગોલ્ડ કાર્ડની કિંમત ₹44 કરોડ, કમાયા ₹44 હજાર કરોડ: 10 લાખ કાર્ડ વેચવાનો ટારગેટ

ગેરકાયદે પ્રવૃત્તિઓમાં સામેલ લોકોના ગોલ્ડ કાર્ડ રદ થઈ શકે
ગ્રીન કાર્ડ જેવા વિશેષ અધિકારો પણ મળશે
ખાસ-ખબર ન્યૂઝ નવી દિલ્હી

રાષ્ટ્રપતિ ડોનાલ્ડ ટ્રમ્પનો ગોલ્ડ કાર્ડ વિઝા પ્રોગ્રામ સત્તાવાર રીતે લોન્ચ થયા પહેલા જ સુપરહિટ થઈ ગયો છે. અમેરિકાના કોમર્શિયલ સચિવ હોવર્ડ લુટનિકે સોમવારે દાવો કર્યો હતો કે તેણે એક જ દિવસમાં 1000 ગોલ્ડ કાર્ડ વેચ્યા છે.
ગોલ્ડ કાર્ડની કિંમત 5 મિલિયન ડોલર (44 કરોડ ભારતીય રૂપિયા) છે. એટલે કે એક જ દિવસમાં 44,000 કરોડ રૂપિયાના ગોલ્ડ કાર્ડનું વેચાણ થયું છે.
હોવર્ડે કહ્યું કે લોકો ગોલ્ડ કાર્ડ મેળવવા માટે લાઈનમાં ઉભા છે. જો કે, આ કાર્યક્રમ સત્તાવાર રીતે લગભગ બે અઠવાડિયા પછી શરૂ થશે. ઇલોન મસ્ક હાલમાં આ માટે સોફ્ટવેર બનાવી રહ્યા છે.
ટ્રમ્પ સરકાર 10 લાખ ગોલ્ડ કાર્ડના ટારગેટ રાખીને કામ કરી રહી છે. વહીવટીતંત્રનું માનવું છે કે આ બહુ મુશ્ર્કેલ નથી કારણ કે વિશ્ર્વમાં 3.7 કરોડ લોકો તેને ખરીદી શકે છે. અમેરિકી સરકાર આ કાર્યક્રમમાંથી એકત્ર થયેલા નાણાંનો ઉપયોગ દેશનું દેવું ઘટાડવા માટે કરશે. હોવર્ડ લુટનિકે કહ્યું કે જે લોકો ગોલ્ડ કાર્ડ ખરીદશે તેમને અમેરિકામાં અનિશ્ર્ચિત સમય સુધી રહેવાનો અધિકાર મળશે. કાર્ડ ખરીદનારાઓની પણ તપાસ કરવામાં આવશે ભલે તેઓ સારા કાયદાનું પાલન કરતા લોકો હોય કે ન હોય.
જો કાર્ડ ખરીદનાર ગેરકાયદેસર પ્રવૃત્તિઓમાં સામેલ હોય તો અમેરિકા આ કાર્ડને કાયમ માટે રદ કરી શકે છે. તેમણે કહ્યું કે જો હું અમેરિકન ન હોત તો મેં 6 ગોલ્ડ કાર્ડ ખરીદ્યા હોત- એક મારા માટે, એક મારી પત્ની માટે અને ચાર મારા બાળકો માટે.
ટ્રમ્પ કહે છે કે ગોલ્ડ વિઝા કાર્ડ નાગરિકોને ગ્રીન કાર્ડ જેવા વિશેષ અધિકારો આપશે. આ નવા વિઝા પ્રોગ્રામથી દેશમાં રોકાણ વધશે, આ સાથે, EB-5 સંબંધિત છેતરપિંડી અટકશે અને નોકરશાહી પર અંકુશ આવશે.
ટ્રમ્પે ‘ગોલ્ડ કાર્ડ’નેEB-5 વિઝા પ્રોગ્રામનો વિકલ્પ ગણાવ્યો અને કહ્યું કે ભવિષ્યમાં 10 લાખ ગોલ્ડ કાર્ડ વેચવામાં આવશે. હાલમાં યુએસ નાગરિકતા માટે EB-5 વિઝા પ્રોગ્રામ સૌથી સહેલો રસ્તો છે. આ માટે લોકોએ 1 મિલિયન ડોલર (લગભગ 8.75 કરોડ રૂપિયા) ચૂકવવા પડે છે.

ડોનાલ્ડ ટ્રમ્પ 35 વર્ષ જૂની વ્યવસ્થા બદલી નાખશે
અમેરિકામાં કાયમી રહેવા માટે ગ્રીન કાર્ડ જરૂરી છે. આ માટે EB-1, EB-2, EB-3, EB-4વિઝા પ્રોગ્રામ છે, પરંતુ EB-5 વિઝા પ્રોગ્રામ મોટાભાગના કરતા વધુ સારો છે. તે 1990થી અમલમાં છે. આમાં, વ્યક્તિ કોઈપણ એમ્પ્લોયર સાથે જોડાયેલી નથી અને તે અમેરિકામાં ગમે ત્યાં રહી શકે છે અથવા કામ કરી શકે છે કે પછી અભ્યાસ પણ કરી શકે છો. તેને મેળવવામાં 4 થી 6 મહિનાનો સમય લાગે છે.
EB-4 વિઝા પ્રોગ્રામનો હેતુ વિદેશી રોકાણને આકર્ષવાનો છે. આમાં, લોકોએ એક બિઝનેસમાં 1 મિલિયન ડોલરનું રોકાણ કરવું પડશે જે ઓછામાં ઓછી 10 નોકરીઓનું સર્જન કરશે. આ વિઝા પ્રોગ્રામ રોકાણકાર, તેની પત્ની અને 21 વર્ષથી ઓછી ઉંમરના બાળકોને યુએસની કાયમી નાગરિકતા આપે છે.
ભારતીય અરજદારો પર શું અસર પડશે?
અહેવાલો અનુસાર, ‘ટ્રમ્પ વિઝા પ્રોગ્રામ’ એવા ભારતીયો માટે ખૂબ મોંઘો સાબિત થઈ શકે છે જેઓ અમેરિકન નાગરિકતા મેળવવા માટે EB-5 પ્રોગ્રામ પર નિર્ભર હતા. EB-5 કાર્યક્રમ ખતમ થવાથી લાંબા ગ્રીન કાર્ડ બેકલોગમાં અટવાયેલા સ્કિલિડ ભારતીય પ્રોફેશનલ્સને પણ નુકસાન થઈ શકે છે. રોજગાર આધારિત ગ્રીન કાર્ડ કેટેગરી હેઠળ ભારતીય અરજદારોને પહેલાથી જ દાયકાઓ રાહ જોવી પડે છે. ગોલ્ડ કાર્ડની રજૂઆત સાથે, જે લોકો મોટી કિંમત ચૂકવી શકતા નથી તેમના માટે ઇમિગ્રેશન સિસ્ટમ વધુ પડકારજનક બની શકે છે.