બાંગ્લાદેશમાં હિંદુઓ અને ઈસ્કોનના પૂજારીઓ સામે વધી રહેલી હિંસાને જોતા ઈસ્કોન કોલકાતાએ હિન્દુઓ અને પૂજારીઓને તેમની ઓળખ છુપાવવા માટે તાકીદ કરતાં કહ્યું છે કે જો તેઓ કટ્ટરપંથીઓથી બચવા માંગતા હોય તો સાવચેત રહેવાની જરૂર છે. બહાર જતી વખતે ભગવા વસ્ત્રો પહેરવાનું ટાળો અને તિલક પણ ભૂસી કાઢો.
બાંગ્લાદેશમાં ચિન્મય દાસ પ્રભુ સહિત અનેક પૂજારીઓની ધરપકડ કરવામાં આવી છે અને હિંદુઓ પર સતત હુમલા થઈ રહ્યા છે તેવી સ્થિતિમાં ઇસ્કોન કોલકત્તાના ઉપાધ્યક્ષ રાધારમણ દાસે પોતાની હિન્દુ તરીકેની ઓળખ છુપાવવા માટે કહ્યું છે. હિન્દુઓને ઘરમાં જ પૂજા કરવા કહ્યું છે તો વધુમાં કહ્યું કે બહાર જતી વખતે ભગવા કપડાં ના પહેરો, તુલસીની માળા છુપાવો અને તિલકને ઢાંકીને રાખો. રાધારમણ દાસે એવો પણ દાવો કર્યો છે કે ચિન્મય દાસના વકીલ રમણ રોયને એટલો માર મારવામાં આવ્યો હતો કે તે ICUમાં જીવન-મરણ વચ્ચે ઝોલાં ખાઈ રહ્યા છે.
- Advertisement -
દરેક પૂજારીને કરી ભલામણ
રાધારમણ દાસે કહ્યું હું તમામ પૂજારીઓને સલાહ આપું છું કે આ સંકટનો સમય છે. સંઘર્ષ ટાળવા માટે સાવચેત રહેવાની જરૂર છે. તેમણે સલાહ આપી કે પૂજારીઓએ ભગવા કપડાં પહેરવાનું ટાળવું જોઈએ અને તિલક પણ એવી રીતે છુપાવીને રાખવું જોઈએ કે જેથી તેમની ઓળખ છતી ના થઈ શકે. બાંગ્લાદેશી પ્રશાસને ભગવા કપડાં પહેરેલા 63 ઈસ્કોનના પૂજારીઓને ભારતમાં પ્રવેશતા અટકાવ્યા હતા. આવી સ્થિતિમાં સુરક્ષિત રહેવું વધુ જરૂરી છે.
ચિન્મય દાસ પર રાજદ્રોહનો આરોપ
- Advertisement -
ચિન્મય દાસની રાજદ્રોહના આરોપમાં ધરપકડ કરવામાં આવી હતી. આ પછી અન્ય બે પૂજારીઓની પણ ધરપકડ કરવામાં આવી હતી. વિશ્વ હિન્દુ પરિષદ (VHP) એ સોમવારે બાંગ્લાદેશમાં હિન્દુઓ પરના કથિત હુમલાઓ સામે વિરોધ દર્શાવ્યો હતો અને અત્યાચાર રોકવા માટે સંયુક્ત રાષ્ટ્રના હસ્તક્ષેપની માંગ કરી હતી. જંતર-મંતર ખાતે વિરોધ પ્રદર્શનમાં ભાગ લેનારા લોકોએ બાંગ્લાદેશમાં હિંદુઓની સુરક્ષાની માંગ સાથે સૂત્રોચ્ચાર કર્યા હતા. તેમણે દાવો કર્યો કે, હિંદુઓમાં ગુસ્સો છે અને તેઓ પોતાનો ગુસ્સો વ્યક્ત કરવા અહીં આવ્યા છે.
VHPના વિરોધ સાથે અત્યાચાર રોકવાની ઉઠી માંગ
VHPના રાજ્ય સચિવ સુરેન્દ્ર ગુપ્તાએ સંયુક્ત રાષ્ટ્ર અને આંતરરાષ્ટ્રીય માનવાધિકાર સંગઠનોને આ મામલે હસ્તક્ષેપ કરવા અને અત્યાચાર રોકવાની માંગ કરી છે. તેમણે કહ્યું કે જો અત્યાચાર બંધ નહીં થાય તો બાંગ્લાદેશના બે ટુકડા થઈ શકે છે. બાંગ્લાદેશની 17 કરોડની વસ્તીમાં હિંદુઓની સંખ્યા 8 %. શેખ હસીનાને સત્તા પરથી હટાવ્યા બાદ બાંગ્લાદેશના 50 થી વધુ જિલ્લાઓમાં લઘુમતી હિન્દુઓ પર 200 થી વધુ હુમલાઓ નોંધાયા છે. વિરોધમાં જોડાયેલા મહંત નવલ કિશોર દાસે કહ્યું, “અમારી બહેનો અને દીકરીઓ પર અત્યાચાર કરવામાં આવી રહ્યો છે, ધાર્મિક સ્થળોને તોડી પાડવામાં આવી રહ્યા છે અને સંતોને જેલમાં ધકેલી દેવામાં આવી રહ્યા છે. હિન્દુઓ આ સ્વીકારી નહીં લે. તો VHP દિલ્હીના વડા કપિલ ખન્નાએ પણ આ મુદ્દે ચિંતા વ્યક્ત કરતાં કહ્યું કે બાંગ્લાદેશમાં હિન્દુઓની સ્થિતિ ચિંતાજનક છે અને જો આ અત્યાચાર નહીં અટકે તો બાંગ્લાદેશના બે ભાગ પણ થઈ શકે છે.
હિન્દુઓ પર હુમલા વધી રહ્યા છે
બાંગ્લાદેશમાં હિન્દુ લઘુમતીઓ અને ઈસ્કોન સાધુઓ સામે હિંસાની ઘટનાઓ વધી રહી છે. તાજેતરમાં બાંગ્લાદેશમાં એક કાયદાકીય કેસમાં આધ્યાત્મિક નેતા ચિન્મય કૃષ્ણ દાસનો બચાવ કરનારા એડવોકેટ રમણ રોય પર ક્રૂર હુમલો કરવામાં આવ્યો છે અને તેમની હાલત અત્યંત નાજુક છે. હુમલા અંગે માહિતી આપતાં, પશ્ચિમ બંગાળના કોલકાતા સ્થિત ઇસ્કોનના પ્રવક્તા રાધારમણ દાસે જણાવ્યું હતું કે, ‘રમણ રોયના ઘરમાં તોડફોડ કરવામાં આવી હતી અને હુમલો કરવામાં આવ્યો હતો. તેમણે માત્ર ભૂલ એ હતી કે કોર્ટમાં ચિન્મય કૃષ્ણ દાસનો બચાવ કર્યો હતો. આ હુમલામાં ‘રમણ રોય ગંભીર રીતે ઈજાગ્રસ્ત થયા છે અને તેઓ હાલ આઈસીયુમાં છે.’
જાણો શું છે મામલો
આધ્યાત્મિક ઉપદેશક ચિન્મય કૃષ્ણ દાસની 25મી ઓક્ટોબરે ધરપકડ કરવામાં આવી ત્યારથી બાંગ્લાદેશમાં સ્થિતિ તણાવપૂર્ણ છે. ચટગાંવમાં બાંગ્લાદેશના રાષ્ટ્રધ્વજ પર ભગવો ધ્વજ ફરકાવવા બદલ તેમના પર દેશદ્રોહનો આરોપ લગાવવામાં આવ્યો હતો. તેમની ધરપકડ બાદ 27મી નવેમ્બરના રોજ ચટગાંવ કોર્ટ બિલ્ડીંગ વિસ્તારમાં પોલીસ અને આધ્યાત્મિક ગુરુના કથિત અનુયાયીઓ વચ્ચેની અથડામણ દરમિયાન એક વકીલનું મોત થયું હતું.
ભારતે બાંગ્લાદેશમાં ‘ઉગ્રવાદી રેટરિક, હિંસા અને ઉશ્કેરણીનાં વધતા બનાવો’ પર ચિંતા વ્યક્ત કરી હતી. વિદેશ મંત્રાલયે કહ્યું હતું કે,ભારતે બાંગ્લાદેશ સરકાર સમક્ષ હિન્દુઓ અને અન્ય લઘુમતીઓ પર લક્ષિત હુમલાનો મુદ્દો સતત ઊઠાવ્યો છે.’
