રાજકોટમાં છવાશે સ્વિમિંગ ફિવર !
તા. 24થી 30મી સુધી સરદાર વલ્લભભાઇ પટેલ સ્નાનાગાર ખાતે આયોજન: દેશભરનાં રાજ્યોમાંથી 2500થી 2800 સ્પર્ધકો ભાગ લેશે
- Advertisement -
ખાસ-ખબર ન્યૂઝ રાજકોટ, તા.19
આગામી તા.24 થી તા.30મી નવેમ્બર સુધી રાજકોટના યજમાનપદે રાષ્ટ્રીયકક્ષાની શાળાકિય તરણ સ્પર્ધા કોઠારીયા રોડ, સરદાર વલ્લભભાઇ પટેલ સ્નાનાગાર રાજકોટ ખાતે યોજાનાર છે. આ સ્પર્ધાના આયોજન માટે સરકારના સ્પોર્ટસ વિભાગ દ્વારા તડામાર તૈયારીઓ ચાલી રહી છે.
આ સ્પર્ધામાં તા.23મીએ તમામ સ્પર્ધકોના રીપોર્ટીંગ બાદ તા.24મીથી સ્પર્ધાનો પ્રારંભ થશે. આ સ્પર્ધામાં દેશભરના અલગ-અલગ રાજ્યોમાંથી અંદાજે 2500-2800 ભાઇ-બહેન સ્પર્ધકો ભાગ લેવા રાજકોટ આવી પહોંચશે. સ્વમિંગ અને ડાઇવિંગની વિવિધ ઇવેન્ટમાં દેશભરની શાળાઓમાં અભ્યાસ કરતાં અન્ડર-14, 17,19 વયનાં ભાઇ-બહેન સ્પર્ધકો ભાગ લઇ કૌતુક દાખવશે.
તા.24 થી 30મી નવેમ્બર સુધી એક સપ્તાહ સ્વિમિંગ ફીવર છવાશે. ગુજરાત ઉપરાંત દેશભરના વિવિધ રાજ્યોમાંથી કોચ સાથે સ્વિમરો આવી રહ્યા હોય તેમના રહેવા-જમવા અને ઉતારા માટે સરકારનાં માર્ગદર્શન હેઠળ જિલ્લા રમત ગમત અધિકારી વી.પી. જાડેજા અને સ્પર્ધા માટે નિયુક્ત અધિકારી રમાબેનનાં માર્ગદર્શન હેઠળ તૈયારીઓ ચાલી રહી છે.
- Advertisement -
સ્પર્ધામાં ઓલ ઇન્ડિયા, સ્વિમિંગ ફેડરેશન ઓફ ઇન્ડિયાનાં પ્રેસીડેન્ટ, હોદેદારો, રાજકોટ જિલ્લા સ્વિમિંગ એસો.નાં પ્રમુખ ઉમેશભાઇ રાજ્યગુરુ, સેક્રેટરી બંકિમ જોષી, નિલેશભાઇ રાજ્યુગુર સહયોગ પુરો પાડશે. સ્પર્ધા નિહાળવા ઇચ્છુકો માટે પ્રેક્ષક ગેલેરી ખુલ્લી રહેશે. અત્રે ઉલ્લેખનીય છે કે, ગત વર્ષે પણ સરદાર વલ્લભભાઇ પટેલ સ્નાનાગાર ખાતે નેશનલ ગેમ્સ સ્પર્ધાનું જાજરમાન આયોજનમાં દેશભરમાંથી સ્વિમરો રાજકોટ આવ્યા હતા ત્યારે આ વર્ષના પ્રારંભે પણ શાળાકિય નેશનલ સ્પર્ધામાં દેશભરમાંથી અન્ડર 14,17,19ના ભાઇ-બહેનો સ્વિમરો રાજકોટના મોંઘેરા મહેમાન બનશે.
