ઇમ્પેકટ ફી યોજનાની મુદ્દત પૂરી થતાં સમય મર્યાદા વધશે?

રાજ્ય સરકાર ગેરકાયદે બાંધકામો નિયમિત કરાવવા વધુ એક તક આપશે !

રાજ્ય સરકાર ઈમ્પકેટ ફી મામલે મધ્યમ માર્ગ કાઢે તેવી માગણી
રાજ્ય સરકારે ઇમ્પેક્ટ ફી ભરવા માગતા હોય તેવા લોકો પાસે જો પાર્કિંગની વ્યવસ્થા ન હોય તો જંત્રી મુજબ પૈસા લઈ બાંધકામ કાયદેસર કરી આપવું જોઈએ. હાલમાં વૈકલ્પિક રસ્તો કાઢી માર્જિનની જગ્યાના જંત્રી મુજબના પૈસા ભરાવી કાયદેસર કરી આપે તો ઘણા લોકો ઇમ્પેક્ટ ભરશે. આથી બાંધકામ પણ રેગ્યુલરાઈ થઈ જશે અને સરકારને પણ આવક થશે.

લોકસભાની ચૂંટણીમાં વિપરિત પરિણામો આવતા સરકાર હવે જનતાની આળપંપાળ કરવા ઇમ્પેકટ ફી યોજનાની મુદ્દતમાં ફરીવાર વધારો કરશે

રાજકોટમાં 9370 પૈકી 3380ને મંજૂરી, 1035 નામંજૂર : 6664 ફાઇલો હજુ ચકાસણીના તબકકે

ખાસ-ખબર ન્યૂઝ રાજકોટ, તા.12

રાજ્ય સરકારે દ્વારા ગેરકાયદેસર બાંધકામોને કાયદેસર કરવા માટે ઇમ્પેક્ટ ફી લાગૂ કરી છે. સરકારે ત્રીજી વખત આ યોજનાની મુદ્દત લંબાવી છે ત્યારે હવે તા.16ના રોજ આ યોજના પૂરા રાજયમાં પૂર્ણ થઇ રહી છે. તા.16ના રોજ રવિવાર હોય મનપા, પાલિકા સહિતની કચેરીમાં તા.1પ સુધી અરજી લેવાશે અને તા.16ના ઓનલાઇન અરજી મૂકી શકાશે.

લોકસભાની ચૂંટણીના વિપરિત પરિણામોને જોતા સરકાર હવે ગુજરાતની જનતાની આળપંપાળ કરવા ઇમ્પેકટ ફીની મુદતમાં વધુ એકવાર વધારો કરે તેવી પુરેપુરી શકયતા જોવાઇ રહી છે. ગુજરાતમાં રાજકોટ, અમદાવાદ સહિત મોટા શહેરોમાં ગેરકાયદે બાંધકામોનો રાફડો ફાટ્યો છે. ગેરકાયદે બાંધકામોને નિયમિત કરવા અત્યાર સુધી ગુજરાત સરકારે 3 3 વાર ઇમ્પેકટ ફીની સમય મર્યાદામાં વધારો કર્યો છે. આ ઉપરાંત વિધાનસભા – લોકસભાની ચૂંટણીને જોતા સરકારે ઇમ્પેકટ ફીની મુદતમાં 15મી જૂન સુધી વધારો કર્યો હતો. ઇમ્પેકટ ફીની મુદતમાં વધારો કર્યા છતાંય ગેરકાયદેસર બાંધકામ નિયમિત કરવા ઝાઝો પ્રતિસાદ સાંપડ્યો નથી. વિવિધ મ્યુનિસિપલ કોર્પોરેશન દ્વારા જાહેરાતો કર્યા છતાંય લોકોએ આ મામલે નિષ્ક્રિયતા દાખવી છે.

હવે આ યોજનાની મુદત તા.16ના રોજ પૂરી થશે. ઇન્વર્ડ થયેલી અરજીઓ પર તે બાદ કાર્યવાહી ચાલુ રહેશે પરંતુ નવી અરજી સ્વીકારવામાં નહીં આવે. તેમાં પણ રાજકોટમાં ટીઆરપી ગેમ ઝોનનો અગ્નિ કાંડ સર્જાયો છે ત્યારે આ ગેમ ઝોનનો ગેરકાયદે બાંધકામનો પ્લાન ઇમ્પેકટ ફી યોજનામાં મૂકવાનો પ્રયાસ થયાનું બહાર આવ્યું હતું આથી રાજકોટ, અમદાવાદ, સુરત, વડોદરા અને સૌરાષ્ટ્રના અન્ય મહાનગરોમાં આ યોજના હેઠળ પ્લાન મંજૂર કરવાનું હાલ સ્થગિત જેવી હાલતમાં છે.
તા.1-10-22થી તા.15-5-24 સુધીની સ્થિતિ જોઇએ તો રાજકોટમાં અત્યાર સુધીમાં ઓનલાઇન કુલ 3813 અને ઓફલાઇન 5557 અરજી થઇ છે. આ પૈકી ઓનલાઇન 1556 અને ઓફલાઇન 1824 મંજૂર થઇ છે. બંનેમાં કુલ 1035 નાઅરજી મંજૂર થઇ છે. એકંદરે ઓનલાઇન અને ઓફલાઇન 9370 અરજી મુકાતા 3380ને સર્ટીફીકેટ અપાયા છે. તો 6664 હજુ ચકાસણી હેઠળ હોવાનું ટીપી શાખા કહે છે.

અમદાવાદમાં ગેરકાયદેસર બાંધકામોને કાયદેસર કરાવવા માટે છેલ્લા એક વર્ષમાં ઇમ્પેક્ટ ફીની 53175 જેટલી અરજીઓ આવી છે, જેમાંથી 31876 અરજીઓ મંજૂર કરવામાં આવી છે. બાકીની અરજીઓ હાલમાં પેન્ડિંગ છે. બિલ્ડિંગના પ્લાન- સ્કેચ, લિફ્ટ- ફાયર, સોસાયટી, હાઇ-વે લાઈન, એનઓસી બાંધકામના પૂરતા પુરાવા રજૂ ન કરવા તેમજ ઓનલાઈન પોર્ટલ ઉપર જરૂરી પુરાવા અને દસ્તાવેજ અપલોડ કરવામાં આવતા નથી. જેના કારણે ઇમ્પેક્ટ ફીની કામગીરી ઝડપી બનતી નથી.
ખૂટતા પુરાવાઓ અને અન્ય કારણોસર ઇમ્પેક્ટ ફીની અરજીઓનો પૂરો સુધી નિકાલ થઈ શક્યો નથી. જે અન્ય અરજીઓ છે તેના માટે સ્ક્રુટીની ચાલી રહ્યું છે. લોકો પૂરતા પુરાવા પ્લાન અને અન્ય જરૂરી દસ્તાવેજો જમા ન કરાવતા હોવાના કારણે ઇમ્પેક્ટ ફીનો નિકાલ થઈ શકતો નથી. શહેરમાં જે ઠેકાણે રહેણાક કે કોમર્શિયલ કોમ્પ્લેક્સ ઊભું થયું હોય અને તેમાં નિયમ બહારનું કોઇ બાંધકામ હોય અને જેને તોડવામાં આવે તો અન્ય લોકોને નુકસાન થાય તો તેવા કિસ્સામાં ઇમ્પેક્ટ ફી ભરીને તે બાંધકામને નિયમિત કરી આપી શકાય છે. જોકે આ વખતે પાર્કિંગ સહિતના કડક નિયમો બનાવવામાં આવ્યા હોય આ યોજનામાં લાભાર્થીઓની સંખ્યા ઘટી છે. છતાં બિનરહેણાંક આસામીઓની સંખ્યા પણ વધુ લાગી રહી છે.

કયા-કયા કારણે અરજી પેન્ડિંગ રહે છે
ઇમ્પેકટ ફી ભરવાની બાકી હ બેટરમેન્ટ ફી વગેરે જમા ન કરાવાઈ
ખૂટતા પુરાવા હ પ્લાન-સ્કેચ રજૂ ન કરતા હ ઓનલાઇન પુરાવા અપલોડ ન કરતા હ સ્થળ અને અરજીમાં સુસંગતતા હ ઇમ્પેક્ટ ફીની તારીખ પહેલાનું બાંધકામ  હદની બહાર બાંધકામ કર્યું હોય હ લિફ્ટ – ફાયર એનઓસી ન હોય હ માલિકીના પુરાવા ન હોય, સ્ટ્રક્ચર્સ સ્ટેબિલિટીનું સર્ટિફિકેટ ન હોય, સોસાયટીની એનઓસી ન હોય, ડ્રાફ્ટ ટીપી સ્કીમ અભિપ્રાય રજૂ ન કરતા