ભાવનગર મહાનગરપાલિકાની મુખ્ય કચેરીને બોમ્બથી ઉડાવી દેવાની ધમકી

અજાણ્યા શખ્સનો ધમકીભર્યો ઈમેલ મળતા પોલીસ અને સુરક્ષા એજન્સીઓ તાત્કાલિક હરકતમાં આવી
કચેરી પરિસરમાં સઘન સર્ચ ઓપરેશન; સાયબર ક્રાઈમની ટીમે ઈમેલના સોર્સને શોધવા તપાસના ચક્રો ગતિમાન કર્યા

ભાવનગર મહાનગરપાલિકાની મુખ્ય કચેરીને બોમ્બથી ઉડાવી દેવાની ધમકીભરી ઈમેલ મળતા જ સમગ્ર મ્યુનિસિપલ કોર્પોરેશન તંત્ર અને સ્થાનિક વહીવટી તંત્રમાં ભારે દોડધામ મચી ગઈ હતી. આ હચમચાવી દેનારી ધમકી મળ્યા બાદ સ્થાનિક પોલીસ અને ઉચ્ચ સુરક્ષા એજન્સીઓ કોઈ પણ જાતની બેદરકારી રાખ્યા વિના તાત્કાલિક એક્શન મોડમાં આવી ગઈ હતી. પોલીસ કાફલાએ મહાનગરપાલિકાના કચેરી પરિસરને કોર્ડન કરી લીધું હતું અને બોમ્બ સ્ક્વોડ તેમજ ડોગ સ્ક્વોડની મદદથી સમગ્ર બિલ્ડિંગમાં સઘન તપાસ હાથ ધરી હતી. આ સર્ચ ઓપરેશન દરમિયાન પરિસરમાં આવેલી તમામ કચેરીઓ અને શંકાસ્પદ વસ્તુઓની ઝીણવટભરી શોધખોળ કરવામાં આવી હતી. જોકે, પ્રાથમિક તપાસના અંતે કચેરીમાંથી કોઈ પણ પ્રકારની વિસ્ફોટક કે વાંધાજનક સામગ્રી મળી આવી ન હોવાનું જાણવા મળતાં તંત્રએ હાશકારો અનુભવ્યો હતો.

સૂત્રોના જણાવ્યા મુજબ, મહાપાલિકાની કચેરીને બોમ્બથી ઉડાવવાની ધમકીભરી ઈમેલના સમાચાર વાયુવેગે પ્રસરતા જ કચેરીમાં કામકાજ અર્થે આવતા-જતા સામાન્ય નાગરિકો અને ફરજ પરના કર્મચારીઓમાં પણ થોડા સમય માટે ભારે ભય અને ફફડાટનો માહોલ સર્જાયો હતો. આ ગંભીર મામલાને પગલે પોલીસે કચેરીની આસપાસ સુરક્ષા વ્યવસ્થા પૂરતી માત્રામાં સઘન બનાવી દીધી છે. ભાવનગર સાયબર ક્રાઈમ બ્રાંચની ટીમે આ મામલે ટેકનિકલ એનાલિસિસ શરૂ કર્યું છે, જેમાં આ ધમકીભર્યો ઈમેલ કયા આઈપી એડ્રેસ પરથી મોકલવામાં આવ્યો હતો અને તેના પાછળ કયા અસામાજિક તત્વો જવાબદાર છે તે અંગે ઊંડાણપૂર્વકની તપાસ શરૂ કરવામાં આવી છે. આ પ્રકારની અફવા ફેલાવી કાયદો અને વ્યવસ્થા ખોરવવાનો પ્રયાસ કરનાર સામે કડક કાયદેસરના પગલાં ભરવામાં આવશે તેમ પોલીસ સૂત્રોએ જણાવ્યું છે.

તસવીર : કૌશિક વાજા