આજે કચ્છ, દ્વારકા, રાજકોટ અને સુરેન્દ્રનગરમાં ગરમીનું યલ્લો એલર્ટ: 15 મે સુધી હીટવેવની આગાહી
ખાસ-ખબર ન્યૂઝ રાજકોટ
- Advertisement -
માવઠા બાદ રાજ્યમાં ગરમીનો પ્રકોપ વધી રહ્યો છે. 10 શહેરોમાં ગરમીનો પારો 40 ડિગ્રી પાર પહોંચી ગયો છે. સતત બીજા દિવસે સુરેન્દ્રનગર 44.3 ડિગ્રી સાથે ગુજરાતનું સૌથી ગરમ શહેર રહ્યું છે. છેલ્લા 24 કલાકના હવામાન વિભાગના આંકડા મુજબ, ઘણા જિલ્લાઓના મહત્તમ તપમાનમાં 1થી 2 ડિગ્રીનો વધારો થયો છે, તો કેટલાક શહેરોની ગરમીમાં સામાન્ય ઘટાડો નોંધાયો છે. સુરતમાં 2 ડિગ્રીના ઘટાડા સાથે ગરમીનો પારો 37.6 ડિગ્રીએ પહોંચતા લોકોને થોડી રાહત મળી છે. હવામાન વિભાગે, આજે (9 મે) કચ્છ, દ્વારકા, રાજકોટ અને સુરેન્દ્રનગરમાં હીટવેવને લઈ યલો એલર્ટ જારી કર્યું છે. આગામી 15 મે સુધી રાજ્યમાં આકરો તાપ પડવાની પણ સંભાવના વ્યક્ત કરવામાં આવી છે. બપોરના સમયે કામ વગર બહાર ન નીકળવા પણ અપીલ કરવામાં આવી છે. હવામાન વિભાગના પૂર્વાનુમાન મુજબ, આજે સૌથી વધુ ગરમી રાજકોટમાં નોંધાશે. અહીં મહત્તમ તાપમાનનો પારો 44 ડિગ્રી પહોંચી શકે. જ્યારે અમદાવાદમાં 43 ડિગ્રી, વડોદરામાં 42 ડિગ્રી, ભૂજમાં 42 ડિગ્રી, ગાંધીનગરમાં 43 ડિગ્રી, ભાવનગરમાં 41 ડિગ્રી, અમરેલીમાં 43 ડિગ્રી, સુરતમાં 39 ડિગ્રી અને ડીસામાં 42 ડિગ્રી તાપમાન નોંધાશે. હવામાન વિભાગે કરેલી આગાહી મુજબ, આગામી ચાર દિવસમાં મહત્તમ તાપમાનમાં વધુ 2થી 3 ડિગ્રીનો વધારો થઈ શકે. હીટવેવને લઈને પણ મહત્વની ચેતવણી આપવામાં આવી છે. સૌરાષ્ટ્ર અને કચ્છ વિસ્તારમાં આગામી 15 મે સુધી હીટવેવની અસર રહી શકે છે, જ્યારે ગુજરાત રીજનમાં 9થી 15 મે સુધી ગરમીનો પ્રકોપ યથાવત રહેવાની શક્યતા છે. આજે કચ્છ, દ્વારકા, રાજકોટ અને સુરેન્દ્રનગર વિસ્તારમાં હીટવેવની સંભાવના વ્યક્ત કરવામાં આવી છે. આવતીકાલે એટલે કે 10 મેએ કચ્છ, દેવભૂમિ દ્વારકા, પોરબંદર, રાજકોટ, ગીર સોમનાથ, અમરેલી, ભાવનગર, સુરેન્દ્રનગર, બનાસકાંઠા, પાટણ, સુરત અને વડોદરામાં ગરમીનું યલો એલર્ટ આપવામાં આવ્યું છે.
