આજે સૌરાષ્ટ્ર અને દક્ષિણ ગુજરાતમાં વરસાદની આગાહી, ભેજવાળા પવનોથી સમગ્ર રાજ્યમાં રાત્રે ભારે અકળામણ
ખાસ-ખબર ન્યૂઝ રાજકોટ
- Advertisement -
સમગ્ર ગુજરાત રાજ્યમાં છેલ્લાં બે-ત્રણ દિવસથી સતત ભેજવાળા પવનોને કારણે ભારે બફારો અને અકળામણનો અનુભવ થઈ રહ્યો છે. રાજ્યનું મહત્તમ તાપમાન 43 ડિગ્રીને પાર નોંધાયું. સુરેન્દ્રનગર 43.8 ડિગ્રી સાથે રાજ્યમાં સૌથી ગરમ રહ્યું. તો અમદાવાદ 43.3 ડિગ્રી સાથે બીજા નંબર પર રહ્યું. અન્ય ગરમ શહેરોની વાત કરીએ તો ગાંધીનગરમાં 43 ડિગ્રી, રાજકોટમાં 42.9 ડિગ્રી અને અમરેલીમાં 42.3 ડિગ્રી મહત્તમ તાપમાન નોંધાયું. સુરેન્દ્રનગર-ગાંધીનગરના તાપમાનમાં 1.8 ડિગ્રીનો વધારો, જ્યારે અમદાવાદના તાપમાનમાં 1.6 ડિગ્રીનો વધારો થયો છે.
મહત્તમ તાપમાનમાં સતત વધારો થતા રાજ્યમાં ભારે ગરમીનો અહેસાસ થઈ રહ્યો છે. ગરમ ભેજવાળા પવનો દરિયાકાંઠાના વિસ્તારોમાં ફૂંકાતા તેની અસર સમગ્ર રાજ્યમાં વર્તાઈ હતી. ખાસ કરીને રાત્રે હોટ એન્ડ હ્યુમિડ જેવી સ્થિતિ સર્જાઈ હતી. રાજ્યમાં હાલ પશ્ચિમ ઉત્તર-પશ્ચિમ દિશાના પવનો ફૂંકાઈ રહ્યા છે.
હવામાન વિભાગની વરસાદની આગાહી વચ્ચે ગઈકાલે જામનગરના કેટલાક વિસ્તારમાં કમોસમી વરસાદ નોંધાયો હતો. આજે પણ દક્ષિણ ગુજરાત અને સૌરાષ્ટ્રના કેટલાક જિલ્લાઓમાં ગાજવીજ સાથે હળવા વરસાદની સંભાવના વ્યક્ત કરી છે. ત્યારબાદના દિવસોમાં હવામાન મુખ્યત્વે સૂકું રહેવાની શક્યતા છે.
અમદાવાદ શહેરમાં આગામી દિવસોમાં આકાશ મુખ્યત્વે સાફ રહેવાની શક્યતા છે. શહેરમાં મહત્તમ તાપમાન 43 ડિગ્રી આસપાસ રહેવાનું અનુમાન છે. શુક્રવારે અમદાવાદમાં મહત્તમ તાપમાન સામાન્ય કરતાં વધુ એટલે કે 43.3 ડિગ્રી અને લઘુત્તમ તાપમાન 29.0 ડિગ્રી નોંધાયું હતું. હવામાં સવારે ભેજનું પ્રમાણ 52% હતું, જે સાંજના સમયે ઘટીને 19% નોંધાયું હતું.
અમદાવાદમાં 20 મેના રોજ અને એના આગળના છેલ્લા 3થી 4 દિવસથી સતત ગરમીનો પારો 43.7 ડિગ્રી નોંધાયો. જ્યારે 21 મેના રોજ તેમાં 2 ડિગ્રી સેલ્સિયસનો ઘટાડો થયો હતો. ત્યારબાદ ગઈકાલે ફરી અમદાવાદના તાપમાનમાં 2 ડિગ્રી સેલ્સિયસનો વધારો નોંધાતા અમદાવાદના લોકો ગરમીથી ત્રાહિમામ પોકારી ઉઠ્યા હતા.
હવામાન વિભાગે આગામી સાત દિવસની આગાહી કરતા જણાવ્યું કે, આજે રાજ્યના કેટલાક વિસ્તારોમાં હળવાથી મધ્યમ વરસાદની શક્યતા છે, જ્યારે દિવસ-2થી દિવસ-7 દરમિયાન સમગ્ર ગુજરાતમાં વાતાવરણ મુખ્યત્વે સૂકું રહેવાની સંભાવના છે. સૌરાષ્ટ્ર વિસ્તારમાં અમરેલી, ભાવનગર, ગીર-સોમનાથ, દીવ અને રાજકોટ જિલ્લામાં હળવો વરસાદ પડી શકે છે. ઉપરાંત ગુજરાત રીજનમાં નવસારી, વલસાડ, દમણ, દાદરા નગર હવેલી, ડાંગ, તાપી અને નર્મદા જિલ્લામાં પણ છૂટાછવાયા વરસાદની શક્યતા દર્શાવવામાં આવી છે.
તાપમાનમાં ફેરફારની કોઈ સંભાવના નહીં
તાપમાન અંગે હવામાન વિભાગે જણાવ્યું છે કે, આગામી સાત દિવસ દરમિયાન મહત્તમ તાપમાનમાં કોઈ મોટો ફેરફાર થવાની શક્યતા નથી. છેલ્લા 24 કલાક દરમિયાન અમદાવાદમાં 43.3 ડિગ્રી સેલ્સિયસ, ગાંધીનગરમાં 43.0 ડિગ્રી સેલ્સિયસ અને સુરેન્દ્રનગરમાં રાજ્યનું સૌથી વધુ 43.8 ડિગ્રી સેલ્સિયસ તાપમાન નોંધાયું હતું. આજે અમદાવાદમાં મહત્તમ તાપમાન 43 ડિગ્રી સેલ્સિયસ અને ગાંધીનગરમાં 42 ડિગ્રી સેલ્સિયસ રહેવાની શક્યતા વ્યક્ત કરવામાં આવી છે.
હાલ ગુજરાત પર પશ્ચિમી પવનો ફૂંકાઈ રહ્યા છે. સાથે જ પંજાબથી દક્ષિણ-પશ્ચિમ રાજસ્થાન સુધી સક્રિય ટ્રફ લાઇનના પ્રભાવને કારણે આજે ગુજરાત અને સૌરાષ્ટ્રના કેટલાક વિસ્તારોમાં હળવા વરસાદ જેવી પરિસ્થિતિ સર્જાઈ શકે છે.
