છૂટાછેડા બાદ બીજા લગ્નમાં નડતરરૂપ ન થાય તે માટે આપ્યો જધન્ય કૃત્યને અંજામ
બી ડિવિઝન પોલીસની જીણવટભરી તપાસના અંતે ભેદ ઉકેલાયો : માતાની ધરપકડ
- Advertisement -
રાજકોટના કુવાડવા રોડ પર ડી માર્ટ પાછળ આવેલી શહિદ ઉધમસિંહ ટાઉનશીપમાં પાંચમા માળેથી બે વર્ષની બાળાને ફેંકી દઇ હત્યા નીપજાવાઇ હતી. આ બાળાના પિતા સંત કબીર રોડ પર રાજારામ સોસાયટીમાં રહે છે. માતા-પિતા વચ્ચે મનમેળ ન હોઇ માતા એક વર્ષથી રિસામણે આવી હોઇ બાળા માતા, નાના-નાની, મામા-મામી સાથે અહિ રહેતી હતી. સાંજે તે નાનાના પાંચમા માળના ફલેટથી છઠ્ઠા માળે રહેતાં પરિવારની બાળકી સાથે રમવા જવા માટે ઘરમાંથી નીકળી એ પછી આ ઘટના બની હતી. દરમિયાન ક્રાઇમ બ્રાંચ અને બી-ડિવીઝન પોલીસની ટીમે આ હત્યાનો ભેદ ઉકેલી નાંખ્યો છે આ માસુમ દિકરીની હત્યા ખુદ તેની જ માતા પૂનમે કરી હોવાનું ખુલ્યું છે. પતિ સાથે છુટાછેડા બાદ બીજા લગ્ન કરવામાં દિકરી આડે ન આવે અથવા તો તેને બીજા ઘરમાં સરખી રીતે રખાશે નહિ એવું લાગતાં જનેતા જ જીવલેણ બની હોવાનું ખુલ્યું છે.
રાજકોટના કુવાડવા રોડ ડી માર્ટ પાછળ સી-વિંગમાં પાંચમા માળે ફલેટમાં રહેતાં જગદીશભાઇ બાબુભાઇ પરસોડાની દોહીત્રી સ્નેહલ સંજયભાઇ વશરામભાઇ સાકરીયા ઉ.2નું ગત તા.12મીએ સાંજે પાંચમા માળેથી નીચે પટકાતાં ગંભીર ઇજા થતાં ઘટના સ્થળે જ કમકમાટી ભર્યુ મોત થયું હતું બાળકી જ્યાંથી નીચે પડી તે જગ્યાએ ચારેક ફુટ જેવી ઉંચી દિવાલ હોઇ આ દિવાલ પર માસુમ બાળકી કોઇ કાળે જાતે ચડી શકે નહિ. આ જોતાં તેણીને કોઇએ ઉંચકીને ફેંકી દીધાની દ્રઢ શંકા દર્શાવતાં ઘટના સ્થળે બી-ડિવીઝન પીઆઇ જી. આર.ચૌહાણ અને ટીમે પહોંચી ઝીણવટભરી તપાસ શરૂ કરી હતી. પ્રથમ નજરે જ હત્યાની ઘટના હોવાનું સ્પષ્ટ થઇ ગયું હતું. સોમવારે સાંજે દોહિત્રી સ્નેહલ અમારા ઘરમાંથી ઉપરના માળે રમવા જવા માટે નીકળી હતી. એ પછી થોડી જ મિનીટો બાદ એક બાળક સ્નેહલ પડી ગઇ એવુ કહેવા આવ્યો હતો. અમે દોટ મુકી છઠ્ઠા માળ તરફ ગયા ત્યારે ખબર પડી હતી કે સ્નેહલ દાદરા પર નથી પડી પરંતુ તે પાંચમા માળેથી નીચે ફેંકાઇ ગઇ છે. કારણ કે ચાર ફુટથી વધુ ઉંચાઇની દિવાલની પાળી સુધી આવડી નાનકડી બાળકી કોઇપણ સંજોગામાં પહોંચી શકે નહિ. આ જોતાં તેણીને કોઇએ નીચે ફેંકી દીધાની દ્રઢ શંકા ઉદ્દભવી હતી. બાળકીના નાના જગદીશભાઇ પરસોડાએ વધુમાં જણાવ્યું હતું કે અમારા પાંચમા માળના ફલેટના રહેવાસીઓ સાથે છેલ્લા ત્રણ દિવસથી કોઇ અજીબ હરકતો કરી રહ્યું છે. અહિ અમારા કપડા કે ચાદર, ગોદડા બહાર સુકવ્યા હોય તો તે લઇને કોઇ નીચે અથવા પાછળના પાર્ટી પ્લોટમાં ફેંકી દે છે. ચપ્પલ બહાર હોય તો એ પણ ફેંકી દે છે. જગદીશભાઇની આ વિગતો બાદ પોલીસે જીણવટ ભરી તપાસ શરૂ કરી હતી. ક્રાઇમ બ્રાંચની ટીમ પણ તપાસમાં સામેલ થઇ હતી. બાળકી ફેંકાઇ ગઇ એ પહેલા તે બે વખત ‘મમ્મી મમ્મી’ બોલી હતી, તેનો અવાજ સાંભળી પોતે બહાર દોડી આવી ત્યારે દિકરી જોવા ન હોતી મળી. આ વાત મૃતક બાળકીની મમ્મી પૂનમબેન સંજય સાકરીયાએ પોલીસને કરી હોઇ પોલીસને તેની આ કેફીયત શંકાસ્પદ લાગતાં તેણીને જ સકંજામાં લઇ વિસ્તૃત પુછતાછ આદરી હતી. અંતે તેણીએ આ હત્યા પોતે જ કરી હોવાની કબુલાત આપી હતી. પોતાને પતિથી છુટાછેડા બાદ બીજા લગ્ન કરવા હોઇ તેમાં આ દિકરી નડતરરૂપ ન બને તે માટે પાંચમા માળેથી ફેંકી દીધાનું તેણીએ કબુલતાં પોલીસ પણ ચોંકી ગઇ હતી. હવે બી-ડિવીઝન પોલીસ તેણીના પતિ સંજય સાકરીયાની ફરિયાદ પરથી હત્યાનો ગુનો નોંધી આગળ કાર્યવાહી કરશે.
