રામ મંદિર દાન ચોરી મામલે SITની ટીમ ગોથે ચઢી
રામ મંદિર દાનચોરીના આરોપમાં ચંપત રાય વિરુધ્ધ એકશન નક્કી
- Advertisement -
ટ્રસ્ટી અનિલને પણ હટાવી શકાય છે, SIT આજે લખનઉ પરત ફરશે, યોગીને રિપોર્ટ સોંપશે
અયોધ્યાના રામ મંદિર ચઢાવા ચોરી કેસમાં SIT (સ્પેશિયલ ઇન્વેસ્ટિગેશન ટીમ) હવે એવા દાતાનો સંપર્ક કરી રહી છે, જેમણે મંદિર ટ્રસ્ટના કોઈ કર્મચારીને ઘરેણાં સોંપ્યા હતા. SIT પોતાના રિપોર્ટમાં આ હકીકતનો સમાવેશ કરશે કે ક્યારે અને કોના હાથમાં ઘરેણાં સોંપવામાં આવ્યા હતા. કોઈ રસીદ આપવામાં આવી હતી કે નહીં.
SIT એ ગુરુવારે (18 જૂન) ના રોજ આવા જ મુંબઈના એક વેપારી અનિલ વિશ્વકર્માનું નિવેદન નોંધ્યું. વેપારીનો આરોપ છે, ‘અમે રામલલ્લા માટે 3 કિલો ચાંદીનો હાર અને 1 કિલો ચાંદીની ચરણ પાદુકા ટિન્નુ યાદવને સોંપી હતી, પરંતુ મંદિર તરફથી કોઈ રસીદ મળી નહોતી.’ આ જ રીતે, 60 કિલો ચાંદીની ઈંટ દાન કરનાર ‘ઇન્ડિયન બુલિયન એન્ડ જ્વેલર્સ એસોસિએશન’ના નોર્થ ઇન્ડિયા હેડ અનુરાગ રસ્તોગીનું કહેવું છે કે તેમની ચાંદીનો પણ હજુ સુધી કંઈ પત્તો લાગ્યો નથી.
- Advertisement -
અયોધ્યાના રોકડિયા હનુમાન મંદિરના મહંત આચાર્ય વિનોદ મિશ્રાએ જણાવ્યું કે, ‘જૌનપુર (મુંગરાબાદશાહપુર)ના રહેવાસી અનિલ વિશ્વકર્મા મુંબઈના મોટા વેપારી અને અમારા શિષ્ય છે. તેમણે રામલલ્લાને ચાંદીનો હાર અને ચરણ પાદુકા ચઢાવવાનો સંકલ્પ લીધો હતો. ઝીણવટભરી કારીગરીથી બનેલો ચાંદીનો હાર લગભગ 3 કિલોનો અને 64 દિવ્ય ચિહ્નોવાળી ચરણ પાદુકા લગભગ 1 કિલો વજનની હતી.’ ‘આખો પરિવાર મહિલાઓ અને નાના બાળકો સાથે 29 ઓક્ટોબર, 2025ના રોજ 200 કિલોમીટર ઉઘાડા પગે ચાલીને ભજન-કીર્તન કરતા અયોધ્યા પહોંચ્યો હતો. બાળકોના પગમાં ફોલ્લા પડી ગયા હતા. આમ છતાં તેમના ચહેરા પર સ્મિત હતું.’
‘પરિવાર સૌથી પહેલા મારા આશ્રમ આવ્યો, જ્યાં બંને વસ્તુઓનું પૂજન થયું. પછી પરિવારે તેને થાળીમાં સજાવીને, માથા પર રાખીને રામલલ્લાના દરબાર પહોંચ્યો હતો. હું પણ તેમની સાથે ગયો હતો. ગેટ પર અમને રમાશંકર ઉર્ફે ટિન્નુ યાદવ મળ્યો, જે VVIP રસ્તેથી અમને સીધા ગર્ભગૃહમાં લઈ ગયો. ત્યાં પૂજારીઓએ થોડીવાર માટે તે વસ્તુઓને પ્રભુના ચરણોમાં રાખી અને પછી ટિન્નુએ તેમને પોતાની પાસે રાખી લીધી.’
જ્યારે પીડિત પરિવારે હાર પહેરાવવાની તસવીર અને ચઢાવાની રસીદ માંગી, ત્યારે ટિન્નુએ બહાનું બનાવ્યું. તેણે કહ્યું, ‘પહેલા બેંકના અધિકારીઓ હારની શુદ્ધતા તપાસશે, પછી તેને પ્રભુને પહેરાવવામાં આવશે. ત્યારે તમને જાણ કરીને ફોટો-વીડિયો આપીશું.’ રસીદના સવાલ પર તેણે કહ્યું કે એકવાર ‘ભાઈ સાહેબ’ (ટ્રસ્ટ મહાસચિવ ચંપત રાય) જોઈ લે, પછી રસીદ મળી જશે.
મહંત વિનોદ મિશ્રાએ આરોપ લગાવ્યો, ‘ટ્રસ્ટે ક્યારેય હાર પહેરાવ્યો નથી કે પરિવારને કોઈ જાણ કરી નથી. જ્યારે પણ હું ટિન્નુ પાસેથી રસીદ માંગતો, તે ટાળમટોળ કરતો. બાદમાં તેણે દાવો કર્યો કે બંને આભૂષણોને બંગાળ મોકલીને ગાળી દેવામાં આવ્યા છે અને તેની ઈંટો બનાવી દેવામાં આવી છે. જેથી જરૂરિયાત મુજબ ભગવાનના વાસણો બનાવી શકાય. આ ગેરરીતિના સમાચાર સાંભળીને શ્રદ્ધાળુ પરિવાર ખૂબ જ દુઃખી છે.’
