રાજકોટ પોલીસે છ મહિનામાં 92 કિલો ગાંજો, 366 ગ્રામ હાઈબ્રીડ ગાંજો, 97 ગ્રામ એમડી, દોઢ કિલો અફીણ કબ્જે કર્યું

નશાનો કાળો કારોબાર કરતા પેડલરો ઉપર રાજકોટ પોલીસની સર્જીકલ સ્ટ્રાઇક

શહેર પોલીસના બે ડઝન દરોડામાં સગીર, મહિલા સહીત 37 આરોપીઓની કરી ધરપકડ

રાજકોટમાં નશાનો કાળો કારોબાર કરતા તત્વો સામે રાજકોટ પોલીસે રીતસરની સર્જીકલ સ્ટ્રાઇક કરી હોય તેવું લાગી રહ્યું છે વર્ષ 2026ના પ્રથમ છ મહિનામાં એટલે કે જાન્યુઆરીથી જૂન સુધીમાં શહેર પોલીસે જુદા જુદા વિસ્તારોમાં બે ડઝન એટલે કે 24 દરોડા પાડી 92 કિલો ગાંજો, 366 ગ્રામ હાઈબ્રીડ ગાંજો, 97 ગ્રામ એમડી અને દોઢ કિલો અફીણ સાથે સગીર, મહિલા સહીત કુલ 37 આરોપીઓની ધરપકડ કરવામાં આવી છે.

રાજકોટમાં યુવાધનને બરબાદ કરવા માટે પેડલરો વિવિધ માધ્યમોથી અથવા તો ખાસ માણસોને મોકલીને માદક પદાર્થો મંગાવી વેચાણ કરતા હોય છે ગાંજો ખાસ કરીને શ્રમિક વિસ્તારોમાં વધુ વેચવામાં આવે છે મજૂરી કરતા પરપ્રાંતીય લોકો ગાંજાનું વધુ સેવન કરતા હોય છે જયારે એમડી ડ્રગનું વેચાણ કોલેજ આસપાસ કોલેજીયન છાત્રોને અને હાઈ પ્રોફાઈલ લોકોને કરવામાં આવતું હોય છે કારણકે ગાંજા કરતા એમડીની કિંમત વધુ કોસ્ટલી હોય જેથી તૅ સૌ કોઈને પોષાય તેમ ન હોવાથી તેનું સેવન સિલેક્ટેડ લોકો જ કરતા હોય છે રાજકોટ શહેર પોલીસ કમિશ્નર બ્રજેશ ઝા, એડિશનલ સીપી ચૈતન્ય માંડલિક, ડીસીપી ક્રાઇમ જગદીશ બાંગરવાની સૂચના અન્વયે એસઓજીના પૂર્વ પીઆઇ એસ એમ જાડેજા, હાલના પીઆઇ એન બી ચૌધરીના માર્ગદર્શન હેઠળ જુદી જુદી ટીમોના બાતમીદારોના મજબૂત નેટવર્કથી પેડલરો ઉપર ધોંસ બોલાવી માદક પદાર્થોનું વેચાણ કરતા પેડલરોની લાઈન ક્રેસ કરી નાખી છે.

રાજકોટ એસઓજીના સૌથી વધુ 13 કેસ

રાજકોટ શહેર પોલીસ દ્વારા પેડલરો ઉપર ખાસ વોચ રાખવામાં આવી રહી છે 2026ના પ્રથમ છ મહિનામાં નોંધાયેલા 24 કેસો પૈકી શહેર એસઓજીએ 13 કેસ કર્યા છે આ ઉપરાંત આજી ડેમ, ભક્તિનગર, પ્રનગર અને ગાંધીગ્રામ પોલીસે 2-2 કેસ કર્યા છે જયારે એલસીબી ઝોન 2, એ ડિવિઝન અને કુવાડવા રોડ પોલીસે એનડીપીએસનો 1-1 કેસ કર્યો છે.

ગાંજો સુરતથી અને એમડી મુંબઈથી આવે છે

રાજકોટ પોલીસ દ્વારા પકડવામાં આવતા ગાંજામાં મોટાભાગે સુરતનું કનેક્શન ખુલતું હોય છે કારણકે સુરત ગાંજા માટે એપી સેન્ટર છે ઓરિસ્સાથી લાંબા અંતરની આવતી ટ્રેનો મારફત ગાંજો સુરત પહોંચે છે અને ત્યાંથી સૌરાષ્ટ્ર-ગુજરાતમાં સપ્લાય થાય છે જયારે એમડી ડ્રગ મોટાભાગે મુંબઈ એટલે કે મહારાષ્ટ્રથી જ આવતું હોવાનું ખુલતું હોય છે એકાદ અપવાદરૂપ કિસ્સામાં એમડીનું કનેક્શન રાજસ્થાન ખુલ્યું હશે.

26 જૂન આંતરરાષ્ટ્રીય ડ્રગ વિરોધી દિવસ : 5 વર્ષમાં 13,600 કરોડનું ડ્રગ્સ ઝડપાયું

26 જૂન એટલે આંતરરાષ્ટ્રીય ડ્રગ વિરોધી દિવસ આ દિવસે રાજ્ય પોલીસ દળ દ્વારા કરવામાં આવેલી કામગીરી ઉપર એક નજર કરીએ તો ગુજરાત પોલીસે 5 વર્ષમાં આશરે 13,600 કરોડથી વધુ કિંમતનો 1.36 લાખ કિલોગ્રામથી વધુનો ડ્રગ્સનો જથ્થો જપ્ત કર્યો છે.ગુજરાત દેશનું એવું પ્રથમ રાજ્ય બન્યું છે જેણે સત્તાવાર રીતે ડ્રગ રિવોર્ડ પોલિસી અમલી બનાવી છે.ગુજરાત સરકારે ડ્રગ્સ માફિયાઓ સામે ઝીરો ટોલરન્સની નીતિ માત્ર કાગળ પર નહીં પણ વાસ્તવિક રીતે કડકાઈથી અમલી બનાવી છે આ સમયગાળા દરમિયાન રાજ્યમાં ડ્રગ્સની હેરાફેરી અને વેપાર વિરુદ્ધ 3700થી વધુ કેસ નોંધીને નશાના કાળા કારોબાર સાથે જોડાયેલા 5346 આરોપીઓને જેલના સળિયા પાછળ ધકેલી દેવામાં આવ્યા છે.