રાજકોટ મનપાની સ્ટેન્ડિંગ કમિટીની કાલે બેઠકઃ રેસકોર્સમાં લાઈટિંગ લગાડવા સહિતની 13 દરખાસ્તો પર નિર્ણય

ગ્રીન પોલિસી, વાવડીમાં પ્રાર્થનાખંડ, ક્લોરીનની ખરીદી, પાણી વિતરણના કોન્ટ્રાક્ટ  સહિત 13 દરખાસ્તો પર નિર્ણય લેવાશે

વોર્ડ 8,10 અને 12 સહિતના વિસ્તારોમાં વિકાસકામોનો ધમધમાટ: મશીનરી ખરીદી અને ડ્રેનેજ પ્રોજેક્ટ્સને મળશે લીલીઝંડી

રાજકોટ મહાનગરપાલિકામાં વહીવટી પ્રક્રિયાને ઝડપી બનાવવા માટે મેયર સહિતના પદાધિકારીઓ દ્વારા એક મહત્વપૂર્ણ નિર્ણય લેવામાં આવ્યો છે. જે અંતર્ગત હવે મહાનગરપાલિકાની સ્ટેન્ડિંગ કમિટીની બેઠક દર અઠવાડિયે યોજવામાં આવશે. તે અંતર્ગત સ્ટેન્ડિંગ કમિટીની બેઠક આવતીકાલે યોજાશે. જેમાં કુલ 13 દરખાસ્તો પર નિર્ણય લેવાશે. શહેરી પર્યાવરણને સુધારવા માટે રાજકોટ મહાનગરપાલિકા માટે નવી ‘અર્બન ગ્રીનીંગ પોલીસી’ તૈયાર કરવા અંગેના મ્યુનિસિપલ કમિશનરના પત્ર પર આખરી નિર્ણય લેવાશે. શહેરના આકર્ષણ સમાન રેસકોર્સ રીંગ રોડ પર ડેકોરેટીવ લાઇટીંગ SITCની કામગીરી કરવા તેમજ મનપા હસ્તકના રેસકોર્સ સંકુલમાં આવેલી વિવિધ રમતગમત સુવિધાઓનું મેઇન્ટેનન્સ RMC અને SAGની સંયુક્ત SPV “રાજકોટ સ્પોર્ટસ પ્રમોશન ફાઉન્ડેશન”ને પૂર્ણ થયેલ મુદતથી વધુ ૦૩ વર્ષ માટે સુપ્રત કરવા અંગે પણ નિર્ણય કરવામાં આવશે. વોર્ડ નંબર ૧૨ના વાવડી વિસ્તારમાં આવેલી રસુલપરા સ્કૂલમાં પરશોતમભાઇ રૂપાલાની વર્ષ ૨૦૨૫-૨૬ની ગ્રાન્ટમાંથી પ્રાર્થનાખંડ બનાવવાની દરખાસ્ત મંજૂર કરવામાં આવશે. ચોમાસા પૂર્વે ડ્રેનેજ અને પાણીની સુવિધાઓ અંતર્ગત, વોર્ડ નંબર ૮ અને ૧૦માં પ્રાઇવેટાઇઝેશનથી ભૂગર્ભ ગટરની ફરિયાદોનો નિકાલ કરવા, ડ્રેનેજ શાખા માટે ૧ નંગ નવું સેક્શન મશીન ખરીદવા તેમજ વોટર O&M સેલ (ડ્રેનેજ) હસ્તકના મવડી, વાવડી જૂનું અને પુનિતનગર જૂનું સીવેજ પમ્પિંગ સ્ટેશન ઉપરાંત ૫૧ MLD રૈયા સુએજ ટ્રીટમેન્ટ પ્લાન્ટ અને ટ્રીટેડ વોટર પમ્પિંગ સ્ટેશનનું ૨ વર્ષ માટે કોન્ટ્રાક્ટથી કોમ્પ્રીહેન્સીવ ઓપરેશન એન્ડ મેઇન્ટેનન્સ (O&M) કરવા અંગે મહોર મારવામાં આવશે.

આ સાથે જ, મનપાના જુદા-જુદા ફિલ્ટર પ્લાન્ટ, પમ્પિંગ સ્ટેશનો અને સ્નાનાગારના પાણીને જંતુમુક્ત કરવા લિક્વિડ ક્લોરીનની ખરીદી કરવા, પાઇપલાઇનની સુવિધા વગરના વિસ્તારોમાં ટેન્કર અથવા ટ્રેક્ટર દ્વારા પાણી વિતરણ કરવાના કોન્ટ્રાક્ટ આપવા તેમજ મનપાના જૂના સ્ક્રેપ વાહનોનું e-Auctionથી વેચાણ કરવા અંગે કમિશનરની દરખાસ્ત પર નિર્ણય લેવાશે. આ ઉપરાંત, ભાવનગર ખાતે યોજાયેલી ઇન્ટર કોર્પોરેશન ટી-૨૦ ક્રિકેટ ટુર્નામેન્ટ અન્વયે થયેલા ખર્ચને બહાલ રાખવાની વહીવટી બાબત પણ આ એજન્ડામાં સામેલ છે.