૭૫મા સ્વાતંત્ર્ય પર્વ પ્રસંગે રામકૃષ્ણ આશ્રમ દ્વારા આંતરરાષ્ટ્રીય ખ્યાતિ પ્રાપ્ત નિવૃત લશ્કરી અધિકારીઓનો ઓનલાઈન વેબિનાર

‘લવ ઇન્ડિયા’ વેબીનારમાં મેજર જનરલ જી. ડી. બક્ષી, મેજર જનરલ વી. ડી. ડોગરા, કેપ્ટન રઘુરામન અને કર્નલ પી પી વ્યાસ જણાવશે રાષ્ટ્રને કઈ રીતે ચાહી શકાય!

ભારતના સ્વાતંત્ર પર્વ નિમિત્તે રાજકોટના રામકૃષ્ણ આશ્રમ દ્વારા તારીખ ૧૫મી ઓગસ્ટ ૨૦૨૧ના રોજ સાંજે ચાર થી છ દરમિયાન ‘લવ ઇન્ડિયા’ નામના ઓનલાઈન રાષ્ટ્રીય વેબીનારનું આયોજન કરાયું છે. જેમાં ભારતીય સેનાના દેશ વિદેશમાં ખ્યાતી પ્રાપ્ત નિવૃત્ત અધિકારીઓ મેજર જનરલ જી ડી બક્ષી, લેફ્ટનન્ટ જનરલ રાકેશકુમાર શર્મા ,મેજર જનરલ વી ડી ડોગરા, કેપ્ટન રઘુરામન અને કર્નલ પી પી વ્યાસ અને રામકૃષ્ણ આશ્રમ રાજકોટના અધ્યક્ષ સ્વામી નિખીલેશ્વરાનંદજી પોતાના વિચારો રજૂ કરશે. સમગ્ર વેબિનારનું સંકલન કર્નલ પી પી વ્યાસ કરી રહ્યા છે. આ વેબિનારમાં જોડાવા માટે આરકેએમરાજકોટડોટઓઆરજી પર રજિસ્ટ્રેશન કરાવવાનું રહેશે.સમગ્ર વેબિનાર રામકૃષ્ણ આશ્રમના યુટ્યુબ અને ફેસબુક પેજ પર યોજાશે.

આ અંગે વિગતો આપતા સ્વામી નિખીલેશ્વરાનંદજીએ જણાવ્યું હતું કે ,એક વખત અમેરિકામાં સ્વામી વિવેકાનંદના એક શિષ્ય મિસ જોસેફાઈન મેકલોડે સ્વામીજીને પૂછ્યું હતું કે તેમની સેવામાં શું કરવું જોઈએ ત્યારે સ્વામીજીએ તરત જવાબ આપ્યો હતો લવ ઇન્ડિયા ભારતને ચાહો! સ્વામીજીનો આ સંદેશ અત્યારે ખૂબ જ સાંપ્રત છે. જો પ્રત્યેક દેશવાસી પોતાની માતૃભુમિને ચાહવા લાગે તો વર્તમાન સમયમાં આપણા દેશ સમક્ષની ભ્રષ્ટાચાર ,રાષ્ટ્રીય એકતા રાષ્ટ્રીય સુરક્ષા, ગરીબી, નિરક્ષરતા જેવી વર્તમાન સમસ્યાઓ ખૂબ આસાનીથી ઉકેલી શકાય. આ વિચારને ધ્યાનમાં રાખીને રાષ્ટ્રીય સુરક્ષા માટે અહર્નિશ કાર્યરત રહેતા નિવૃત લશ્કરી અધિકારીઓને લઈને લવ ઇન્ડિયા નામનો વેબિનાર યોજવામાં આવ્યો છે.

આ વેબીનારના વક્તાઓમાંના લેફ્ટનન્ટ જનરલ રાકેશ કુમાર શર્મા, સૈનિક સ્કૂલ અને નેશનલ ડિફેન્સ એકેડેમીના વિદ્યાર્થી રહી ચૂક્યા છે અને ૧૯૭૮માં તેમને નિયુક્ત કરવામાં આવ્યા હતા. તેમણે ભારતીય સેનાની ૩૯ વર્ષની ઝળહળતી કારકિર્દીમાં ઉત્તર-પૂર્વ, જમ્મુ કાશ્મીર અને લંકાના બળવાખોર અને આતંકવાદી પ્રભાવિત છ વિસ્તારોમાં ઉગ્ર લડત આપીને જોખમાયેલી આંતરિક સુરક્ષાને ફરીથી પૂર્વવત્ કરવાની કાબેલિયત મેળવી હતી. માનવ અધિકાર અને વિચારસરણીમાં પરિવર્તન લાવવાની તેમનામાં વિશેષ આવડત છે. વર્ષ ૨૦૧૫ થી ૨૦૧૭ના સમયગાળા દરમિયાન ભારતીય સેનાના ૧૨.૫ના એચઆર અને લોજિસ્ટિક હેડ બંને હોવાનો દુર્લભ સુમેળ સાધ્યો હતો.

તેઓ ખરા અર્થમાં વિદ્વાન યોદ્ધા છે કારણકે તેમણે બીએ એમએસસી બે વખત એમ.ફિલ એમ.બી.એ પૂર્ણ કર્યા છે અને હાલમાં પીએચડી કરી રહ્યા છે. તેમણે રાષ્ટ્રીય સ્તરે અસંખ્ય પરિસંવાદો અને પરિષદોમાં ભાગ લીધો છે, જેમાં આંતરધર્મ શ્રદ્ધા (2016) પરના સહિતના સેમિનારનો સમાવેશ થાય છે, જેમાં તેમણે સ્વામી અગ્નિવેશ અને આર.એન. કોવિંદ ( જેઓ હવે રાષ્ટ્રપતિ છે ) સાથે અતિથી વિશેષ પદ શોભાવ્યું હતું .

તેમની કર્તવ્યપરાયણતા તથા વિશિષ્ટ અને ઉત્કૃષ્ટ યોગદાન માટે તેમને રાષ્ટ્રપતિ દ્વારા ૨૦૧૭ માં અતિ વિશિષ્ઠ સેવા મેડલ (AVSM), ઉત્તર- પૂર્વમાં બળવાખોરો સામે લડવા માટે ૧૯૮૦માં સેના મેડલ, લંકામાં મેન્શન-ઇન-ડિસ્પેચેસ, આર્મી ચીફ ઓફ સ્ટાફ દ્વારા સન્માન અને અન્ય અનેક મેડલોથી નવાજવામાં આવ્યા હતા. સેવા નિવૃત્તિ પછી જમ્મુ અને કાશ્મીરના વતની હોવાથી તેમણે જમ્મુમાં સ્થાયી થઇ સામાજિક કાર્ય હાથ ધર્યું છે. હાલમાં, તેઓ એક એનજીઓના પ્રમુખ અને ગાંધી ગ્લોબલ ફાઉન્ડેશનમાં સલાહકાર છે. તેમજ વિવિધ સામાજિક કાર્ય, વીર નારીઓ અને સૈનિકોના મુદ્દાઓ પર તેઓ હાલ કાર્યરત છે.

વેબીનારના અન્ય વક્તા અને નિયમિત રીતે રાષ્ટ્રીય આંતરરાષ્ટ્રીય ન્યૂઝ ચેનલોમાં રક્ષા વિશેષજ્ઞ તરીકે નજરે પડતા મેજર જનરલ જી ડી બક્ષીનું નામ કોઈ માટે અજાણ્યું નથી .

૧૯૫૦માં જન્મેલા મેજર જનરલ ગગન દીપ બક્ષી (સેવા મેડલ, વિશિષ્ટ સેવા મેડલ) ભારતીય સેનાના જમ્મુ -કાશ્મીર રાઇફલ્સના નિવૃત્ત અધિકારી છે. કારગિલ યુદ્ધમાં બટાલિયનનું નેતૃત્વ કરવા બદલ તેમને વિશિષ્ઠ સેવા મેડલ એનાયત કરવામાં આવ્યો હતો. બાદમાં, બળવા વિરોધી અભિયાન દરમિયાન બટાલિયનની કમાન્ડિંગમાં વિશિષ્ટ સેવા માટે તેમને સેના મેડલ એનાયત કરવામાં આવ્યો હતો. ત્યારબાદ તેમણે જમ્મુ-કાશ્મીરના રાજૌરી-પૂંચ જિલ્લાઓમાં સઘન આતંકવાદ વિરોધી કામગીરી દરમિયાન રોમિયો ફોર્સ (ચુનંદા રાષ્ટ્રીય રાઇફલ્સનો ભાગ)ની આગેવાની લીધી અને આ વિસ્તારમાં સ્વદેશી સશસ્ત્ર ચળવળને દબાવવામાં સફળ રહ્યા (આ જિલ્લાઓ પીર પંજાલ રેન્જમાં આવે છે અને નોંધપાત્ર મુસ્લિમ બહુમતી ધરાવે છે. તેમણે મિલિટરી ઓપરેશન્સ ડિરેક્ટોરેટ જનરલ ખાતે બે કાર્યકાળ પૂર્ણ કર્યા છે અને નોર્ધન કમાન્ડ હેડક્વાર્ટર(ભારત)ના પ્રથમ BGS (IW) હતા, જ્યાં તેમણે ઇન્ફોર્મેશન વોરફેર અને મનોવૈજ્ઞાનિક કામગીરી પર ફરજ બજાવી હતી.

મેજર જનરલ વી.ડી. ડોગરા એટલે કે મેજર જનરલ વિક્રમ દેવ ડોગરા (અતિવિશિષ્ટ સેવા મેડલ) ૧૯૮૧ માં તેમની બેચમાં ટોપ કર્યા પછી તેમને નિયુક્ત કરવામાં આવ્યા હતા .તેઓએ ભારતીય લશ્કરી એકેડમી તરફથી સ્વોર્ડ ઓફ ઓનર અને ગોલ્ડ મેડલ મેળવ્યા છે. જોતાવેંત જ સૈન્ય અધિકારી હોવાનો ખ્યાલ આવી જાય તેવા ડોગરાએ જમ્મુ અને કાશ્મીરમાં તેમજ આફ્રિકાના અંગોલામાં યુએન મિશનમાં સેવા આપી હતી. તેમણે ભૂમિદળના સશસ્ત્ર સેનાના બસો વર્ષ જુના ધ પૂના હોર્સ વિભાગની કમાન સંભાળી હતી.

મેજર ડોગરા ઓસ્ટ્રીયામાં યોજાતી વિશ્વની સૌથી કઠિન એક દિવસીય ઇવેન્ટ આયર્નમેન ટ્રાયથલોન પૂર્ણ કરનારા ભારતના એકમાત્ર સૈન્ય અધિકારી અને વિશ્વના એકમાત્ર મિલિટ્રી જનરલ છે. ક્લેજેનફર્ટમાં ૩,૦૦૦ એથ્લીટો વચ્ચે ‌યોજાયેલી આ ઈવેન્ટમાં ફુલ આયર્નમેને ૩.૮ કિલોમીટર સ્વિમિંગ, ૧૮૦ કિલોમીટર સાઇકલિંગ અને ૪૨.૨ કિલોમીટર મેરેથોન એક પણ વિરામ વિના માત્ર ૧૭ કલાકમાં પૂર્ણ કરવાનું હતું.મેજર ડોગરાએ આ આયર્નમેન ટ્રાયથલોન માત્ર ૧૪ કલાક અને એકવીસ મિનિટમાં પૂર્ણ કરી હતી. હાલમાં તેઓ તેઓ ખો ખો ફેડરેશન ઓફ ઇન્ડિયાના બ્રાન્ડ એમ્બેસેડર અને સ્ટાર આઇકોન છે.ઉપરાંત ટેડેક્ષ અને મોટિવેશનલ સ્પીકર છે.તેમજ માનવતા માટેના તેમના યોગદાનને ધ્યાનમાં લઈને તેમને માનદ ડોકટરેટની પદવી એનાયત કરવામાં આવી છે .

કેપ્ટન રઘુરામન કદાચ ૨૫ વર્ષના સમયગાળામાં સૌથી વિશિષ્ટ કારકિર્દી ધરાવે છે. તેમણે ભારતીય સશસ્ત્ર દળોમાં અધિકારી તરીકે અગિયાર વર્ષ ગાળ્યા, ત્યારબાદ નેશનલ ઇન્ટેલિજન્સ ગ્રીડના સીઇઓ તરીકે સરકારમાં જોડાયા પહેલા કોર્પોરેટ ક્ષેત્રમાં બીજા અગિયાર વર્ષ પસાર કર્યા. તેઓ હાલમાં રિલાયન્સ ઇન્ડસ્ટ્રીઝ લિમિટેડના ગ્રુપ પ્રેસિડેન્ટ (રિસ્ક, સિક્યુરિટી અને નવા વેન્ચર્સ) તરીકે કાર્યરત છે. જે ટેકનોલોજી ઉદ્યોગનું નેતૃત્વ, સુરક્ષા કુશળતા અને એક્ઝિક્યુટિવ મેનેજમેન્ટ વડે કંપની સાથે કામ કરે છે. તેમના કાર્યકાળ દરમિયાન, તેઓ પંજાબની લડાઇમાં આતંકવાદીઓ અને સિયાચીન ગ્લેસિયર ફેસિંગ પાકિસ્તાની સૈનિકોમાં સક્રિય લડાઇમાં હતા. તેમણે યુએન શાંતિ રક્ષક તરીકે સેવા આપી હતી, તેમજ પ્રતિષ્ઠિત સ્કૂલ ઓફ આર્મર્ડ વોરફેરમાં અધિકારીઓને નેતૃત્વ અને વ્યૂહરચના શીખવનાર પ્રશિક્ષક હતા. તેઓ ઓબ્ઝર્વર રિસર્ચ ફાઉન્ડેશનના પ્રતિષ્ઠિત ફેલો છે અને રેન્ડમ હાઉસ દ્વારા પ્રકાશિત પુસ્તક ‘એવરીમેન્’સ વોર ના લેખક પણ છે.

કર્નલ પી.પી. વ્યાસ એક અનુભવી અને અત્યંત આધ્યાત્મિક: સૈનિક (કર્નલ), ઉડ્ડયન વહીવટી અને ઓપરેશનલ પ્રોફેશનલ, યોગ શિક્ષકોના પ્રશિક્ષક, વિપશ્ય સાધક અને એક મનોચિકિત્સક છે. બાળપણથી પિતામહ સાથે ઉછરેલા કર્નલે તેમનું પ્રારંભિક શિક્ષણ ગામની શાળામાં મેળવ્યું. ત્યારબાદ સૈનિક શાળા બાલાચડી,નેશનલ ડિફેન્સ એકેડેમી અને ભારતીય સૈન્ય અકાદમી દેહરાદૂનમાંથી સ્નાતક થયા. ૨૧ વર્ષની લશ્કરી સેવા દરમિયાન તેમણે ઉત્તર અને પૂર્વ ભારતમાં ઘણી કામગીરીમાં ભાગ લીધો. 1984 માં ઓપરેશન બ્લુ સ્ટાર અને ઉત્તર-પૂર્વમાં કર્નલ વ્યાસ નાગાલેન્ડ, મણિપુર, મિઝોરમના બળવાખોરોને જેર કર્યા હતા. તેમની બહાદુરી માટે તેમને ચીફ ઓફ આર્મી સ્ટાફની પ્રશસ્તિ પ્રાપ્ત થઇ હતી. ૨૦૦૩ માં સ્વૈચ્છિક નિવૃત્તિ પહેલા તેમને ૨૧૩ રોકેટ રેજિમેન્ટનું નેતૃત્વ કરવાનો લહાવો મળ્યો છે. તેમણે બે હેલિકોપ્ટર યુનિટની પણ આગેવાની લીધી હતી. તેમની બીજી અને એટલી જ સંતોષકારક કારકિર્દી વાણિજ્યિક હેલિકોપ્ટર પાયલટ હતી, જેમાં તેમણે ૧૫ વર્ષ સુધી માતા વૈષ્ણોદેવી, અમરનાથ અને કેદારનાથના યાત્રાળુઓને હવાઈ મુસાફરી કરાવી હતી. છેલ્લા થોડા સમયથી તેમણે સૌરાષ્ટ્ર અને કચ્છમાં રૂરલ કાર્ડિયાક કેર ડિજિટલ પ્રોગ્રામ શરૂ કર્યો છે, અત્યાર સુધીમાં ૧૫ ક્લિનિક ખોલીને બધાને વિનામૂલ્યે સારવાર આપી છે. ઉત્તર-પૂર્વ, જમ્મુ કાશ્મીર અને ઉત્તરાખંડમાં ૨૦૩૦ સુધીમાં એક હજાર ક્લિનિક્સ ખોલવાનું તેમનું લક્ષ્ય છે. સામાજિક દાયિત્વ તરીકે તેઓ સૈન્યમાં જોડાવા ઇચ્છુકોને મફત તાલીમ આપે છે. ગત વર્ષે તેમના દ્વારા પ્રશિક્ષિત છ ઉમેદવારો લશ્કરી તાલીમ એકેડેમી (એનડીએ અને ઓટીએ) માં જોડાવા માટે એસએસબી ઇન્ટરવ્યૂમાં સફળતાપૂર્વક ભલામણ પામ્યા છે. તેમના મતે તેમની સૌથી મોટી સિદ્ધિ એ છે કે તેઓ હાલ સુખી અને સંતુલિત તંદુરસ્ત જીવન જીવે છે.