ખાસ-ખબર સંવાદદાતા
ઓદ્યોગિક નગરી મોરબીમાં ક્રાઈમ રેટ ધીમે ધીમે વધી રહ્યો છે. ગંભીર કહેવાતા ગુનાઓ અવારનવાર બનતા હોય છે જેમાં સિરામિક ફેકટરીમાં રહેતી મહિલાની સાથે પતિ તરીકે રહેતા શખ્સે મહિલાની પાંચ વર્ષની બાળકી સાથે જ દુષ્કર્મ આચર્યાનો બનાવ પ્રકાશમાં આવતા ચકચાર મચી જવા પામી છે તો મહિલાની ફરિયાદના આધારે પોલીસે ગુન્હો નોંધીને આરોપીને ઝડપી લઈને વધુ તપાસ હાથ ધરી છે. મોરબી તાલુકાના ગ્રામ્ય પંથકમાં સિરામિક ફેકટરીમાં રહીને મજૂરી કામ કરતી મહિલા સાથે પતિ તરીકે રહેતા નરાધમ શખ્સે મહિલાની પાંચ વર્ષની માસૂમ બાળકી સાથે દુષ્કર્મ આચર્યું હતું.
પાંચ વર્ષની બાળકીને હવસનો શિકાર બનાવવામાં આવતા આ બનાવ અંગે તાલુકા પોલીસ મથકે મહિલાએ આરોપી વિરુદ્ધ ફરિયાદ નોંધાવી હતી જે ફરિયાદના આધારે તાલુકા પોલીસ મથકના પીઆઈ કે.એ.વાળા સહિતની ટીમ તુરંત એક્શનમાં આવી હતી અને વધુ તપાસ ચલાવી હતી જે દરમિયાન પોલીસે આરોપી રવિરાજ રાજેન્દ્રભાઈ થરેશા (મુળ રહે. વઢવાણ, સુરેન્દ્રનગર, હાલ. મોરબી રંગપર ગામ) ને ઝડપી લઈને સઘન પૂછપરછ કરતા આરોપીએ ગુનાની કબુલાત આપી હતી જેથી પોલીસે આરોપીની વિધિવત ધરપકડ કરીને ધોરણસરની કાર્યવાહી હાથ ધરી હતી.
