ઈરાન સાથે વાર્તાલાપ કરવા અમેરિકા તૈયાર થયું એટલે અમુક લોકો , આમ તો ઘણા લોકોએ વિધવા વિલાપ શરૂ કર્યો કે જુઓ, અમેરિકા હાર્યું ! અમેરિકા હાર્યું !
અમેરિકાના ફોન વાપરતા, એના સોશિયલ મીડિયા વાપરીને આખો દિવસ મચ્યા રહેતા, અમેરિકાના કમ્પ્યુટર અને એની ફિલ્મો અને એનિમેશન જોઈને મોટા થવા વાળા કહે કે “અમેરિકા હાર્યું !!” ત્યારે એવાના ભોળપણ ઉપર રોવું કે એની મૂર્ખતા ઉપર હસવું તે સમજાય નહિ.
આજની વાત અમેરિકાના ગુણગાન ગાવા માટે નથી પણ અમેરિકાનું વિરાટ દર્શન કરાવવા માટે છે જેથી ઘણાંને ખ્યાલ આવે કે અમેરિકા કઈ બલાનું નામ છે.
અમેરિકા કોઈ દેશ કરતા વધારે એક મોટી , મહાકાય, વિશાળ કોર્પોરેશન છે!! તે એક અતિ ભવ્ય વેપારી પેઢી છે. જેણે અમેરિકન લોકશાહીને સમજી હશે એ કહી શકશે કે અમેરિકન લોકશાહી ખરેખર લોકશાહી જ નથી!! એમાં નાણાં વગરનો નાથિયો ઊભો નથી રહી શકતો.. ત્યાંની આખી ચુંટણી પ્રચાર સિસ્ટમ ડોલરના બળે ચાલે છે. એમાં માણસનું નહિ પણ એના નાણાકીય પાવરનું મહત્વ છે. ભારતમાં પણ આવી સ્થિતિ નિર્માણ થવામાં છે એમ કહેવું સાવ ખોટું નથી પણ એનું કારણ પણ અમેરિકાનો જગત ઉપરનો પ્રભાવ છે .
દરેક બુદ્ધિમાન ભારતીય, ચાઇનીઝ, જાપાનીઝ કે રશિયન ની અંદર એક અમેરિકન વસે છે. તે દરેક અમેરિકન અભિનેતા અને ખેલાડીને જાણે છે! તે સદેહે ભારત કે જાપાન કે ચીનમાં વસે છે પણ એનો આત્મા અમેરિકામાં હોુ છે એટલે તે અમેરિકા જાય તો એને પોતાના ઘર જેવું લાગે છે અને તે કદી પરત પોતાના દેશ જતો નથી!!
વિચાર કરો કે ભારત કે ચીનમાં વસતા છોકરા એ કદી અમેરિકા નથી જોયું એમ છતા તે અમેરિકા જવાના સ્વપ્ન જુએ છે !! આ છે અમેરિકન પ્રભાવ !
અમુક સ્વઘોષિત યુદ્ધ નિષ્ણાતો ચીનને અમેરિકાનું કટ્ટર શત્રુ માને છે પણ તેઓ જાણતા નહિ હોય કે ચીનમાં દરેક ટાઉન અને નગરમાં અમેરિકન કંપનીઓના આઉટલેટ્સ છે!! એપલનાં સ્ટોર ઉપર નવો આઇફોન લેવા ત્યાં પણ લાંબી લાઈનો લાગે છે .. અરે ચીન જવા દો, ઈરાન અને પેલેસ્ટાઇન જેવા યુધગ્રસ્ત પ્રદેશોમાં અને રશિયામાં પણ અમેરિકન કંપનીઓનો વિશાળ પથારો છે !
અગાઉ કહ્યું એમ અમેરિકા એક વેપારી દેશ છે!! ખૂંખાર વેપારી !
અમેરિકન લશ્કરી થાણા પણ જગતમાં ઠેર ઠેર છે. આ લશ્કરી તાકાત વળી એમની વેપારી તાકાત ઉપર આધારિત છે. ઈરાન સામે યુદ્ધ પ્રારંભ કરતાં પહેલાં અમેરિકા ઓલરેડી વેનેઝુએલાની અંદર સત્તા પલ્ટો કરી ચૂક્યું હતું, યુક્રેનને સતત સહાયતા કરીને એને રશિયા સાથે લડતું રાખતું રહ્યું અને ઇઝરાયેલ થકી લેબનોન અને ગાઝા ઉપર પણ કબ્જો કરવા માટેની કામગીરી કરી દીધી !
ઈરાન સામેના યુદ્ધના બીજા દિવસે ઇરાનના “સુપ્રીમ લીડર” તરીકે ઓળખાતા ખમેનાઈ ને મારી નાખવા જેવી ખતરનાક યુદ્ધ કુશળતા ધરાવતો દેશ ઈરાન સામે ઝૂકી જાય તે તો કોઈ માને નહિ .. હવે એમ છતાં અમેરિકા શાંતિવારતા ના ટેબલ ઉપર આવવા તૈયાર કેમ થયું તે જાણવા જેવું છે.
આમ તો આવા પગલાં પાછળ અનેક જીયો પોલિટિકલ કારણો હોય એટલે તે સમજવું ઘણું અઘરું છે પણ અમેરિકાની યુદ્ધનીતીનો આ એક સામાન્ય ભાગ રહ્યો છે. ઈરાક સામેનું યુદ્ધ હોય કે વેનેઝુએલા સામેનું .. રશિયા સામેનું ઠંડુ યુદ્ધ હોય કે જાપાન સામેનું અણુબોમ્બ વાળું યુદ્ધ — અમેરિકા હમેશા શત્રુને સ્ટેપ બાય સ્ટેપ મારતું આવ્યું છે. અમેરિકા કોઇ જેહાદી આતંકવાદીઓ નો દેશ નથી કે આડેધડ હુમલાઓ કરીને પોતાની બુદ્ધિ નું પ્રદર્શન કરે. અમેરિકાએ “જગત ઉદ્ધારક” તરિકેની પોતાની ઉજળી છાપ જળવાઈ રહે એવી રીતે યુદ્ધો કરેલા છે.
જાપાન ઉપર અણુબોમ્બ ફેંકવા જેવું કુકૃત્ય કરવા છતાં અમેરિકા સાફ સુથરુ બહાર આવ્યું .. અમેરિકાએ જાપાન ને ઉભુ કર્યું, એમાં ફરી ઉદ્યોગ ધંધા ખીલવ્યા, જાપાનીઓ પાસેથી યુદ્ધનો દંડ પણ લીધો અને જાપાનને ઉભુ કરવાનો જશ પણ લીધો!! આ ઘટનાને અમેરિકન એકવિઝિશન ઓફ જાપાન કહેવાય છે.
આવી રીતે અમેરિકા દરેક દેશમાં હિતો ધરાવે છે. કોઈપણ દેશને ઘડિકવારમાં તબાહ કરી નાખવાની આસુરી શક્તિઓ પણ ધરાવે છે. ડોનાલ્ડ ટ્રમ્પ આવી ધમકી આપી પણ ચૂક્યા.. પણ એવું એમણે કર્યું નહિ.
આ આસુરી શકિતઓના મૂળ ડોલર તરીકે ઓળખાતા કાગળિયામાં છે.બેફામ કાગળ છાપીને , એને બદલે પેટ્રોલ/ક્રૂડ ખરીદીને આખી દુનિયાને મુઠ્ઠીમાં કરવાની અમેરિકન યોજના એટલી સફળ થઈ છે કે આજે આખું જગત અમેરિકાની પરોક્ષ પકડમાં છે એમ કહીએ તો વાંધો નથી.
આ અમેરિકા છે.. એમનેમ દરેક બુદ્ધિમાન ભારતીય ચાઇનીઝ કોરિયન રશિયન કે જાપાનીઝ યુવાન અમેરિકા જવાના સપના નથી સેવતો!!
