નવરાત્રી પર્વને લઈને મોરબી પોલીસ એક્શન મોડમાં! રોમીયોગીરી કરતા તત્ત્વો સામે ખાસ ઝુંબેશ

મોડીફાઇડ સાયલેન્સરવાળા ચાર બુલેટ ડીટેઇન, 21 કારમાંથી બ્લેક ફિલ્મ હટાવાઈ

ખાસ-ખબર સંવાદદાતા
આવતીકાલથી શરૂ થતાં નવરાત્રીના પર્વને લઈને મોરબી પોલીસ એક્શન મોડમાં આવી છે. ખાસ કરીને રાત્રીના સમયે વાહનો લઈને છાકટા બનતા તત્વો સામે પોલીસે લાલ આંખ કરીને ઝુંબેશ શરૂ કરી દીધી છે જેના ભાગરૂપે ગઈકાલે મોરબી શહેરમાં પોલીસે નવરાત્રી મહોત્સવના સ્થળો પર ચેકીંગ હાથ ધર્યું હતું અને સંવેદનશીલ વિસ્તારોમાં ફૂટ પેટ્રોલિંગ તેમજ વાહન ચેકીંગ કરવામાં આવ્યું હતું.
મોરબી સિટી એ ડિવિઝન સહિતની પોલીસ ટીમોએ ફૂટ પેટ્રોલિંગ સાથે વાહનો માટે ખાસ ડ્રાઇવ ચલાવી હતી જેમાં મોડીફાઈડ કરેલા સાયલેન્સર સાથેના ચાર બુલેટ અને અન્ય ત્રણ વાહનો ડિટેઈન કર્યા હતા. આ સાથે 21 કારમાંથી બ્લેક ફિલ્મ હટાવવવામાં આવી હતી જો કે હજુ પણ પોલીસની આ ડ્રાઇવ યથાવત જ રહેવાની છે. આ મામલે એ ડિવિઝન પીઆઈ એચ. એ. જાડેજાએ જણાવ્યું હતું કે, નવરાત્રીનો પર્વ શહેરીજનો નિર્ભયપણે ઉજવી શકે અને શહેરમાં શાંતિપૂર્ણ વાતાવરણ જળવાઈ રહે તે માટે પોલીસ સતત કાર્યરત છે. નવરાત્રી ઉપર દરેક ગરબી આયોજનો ઉપર પોલીસ જવાનો તૈનાત રહેશે. આ ઉપરાંત એ ડિવિઝન પોલીસની ત્રણ ટીમ સતત પેટ્રોલિંગમાં રહેશે અને ખાસ કરીને વાહનો લઈને જે છાકટા બનતા હોય તેવા તત્વો સામે પોલીસ કડક કાર્યવાહી કરશે. આ ઉપરાંત મોડીફાઈડ કરેલા સાયલેન્સરવાળા બુલેટચાલકો સામે પણ કાર્યવાહી કરવામાં આવશે.