લાખો વૉટની સાઉન્ડ સિસ્ટમ, વિશ્ર્વ પ્રસિદ્ધ સંગીતકાર પંકજભાઈ ભટ્ટ, ખ્યાતનામ ગાયક કલાકારોના સથવારે ખેલૈયાઓ થનગનાટ સાથે કરશે રોમાંચનો અનુભવ
પ્રાચીન-અર્વાચીન, હિન્દી-ગુજરાતી ગીતોનો રસથાળ પીરસાશે : લેઝર શૉ વિથ ડીજે, ફ્યુઝન ગરબા તથા ડી.જે. વોરનું ધમાકેદાર આયોજન
- Advertisement -
ખાસ-ખબર ન્યૂઝ રાજકોટ, તા. 1
વિશ્ર્વભરમાં નવરાત્રિના નવેય દિવસ માત્ર જૈનો માટે યોજાતા એકમાત્ર નવરાત્રી મહોત્સવનો શ્રેય જૈનમ પરિવારને ફાળે જાય છે અને તેમાંય સળંગ સાતમા વર્ષે યોજાવા જઈ રહેલા જૈનમ કામદાર નવરાત્રિ મહોત્સવ 2024માં આ વર્ષે દર વર્ષની માફક કંઇ નોખુ કંઈક અનોખું, વિશેષથી સવિશેષ, સુપરથી પણ ઉપર એવું ઉત્કૃષ્ટ આયોજન થવા જઈ રહ્યું છે. એક લાખ વોટની હાઈફાઈ સાઉન્ડ સીસ્ટમ, વિશ્ર્વ પ્રસિદ્ધ સંગીતકાર પંકજભાઈ ભટ્ટના નેતૃત્વમાં એમની સાજીંદાઓની ટીમ, એકથી એક ચડિયાતા ગીતોના સથવારે ખેલૈયાઓને રમવા મજબૂર કરી દે એવા ગાયક કલાકારો, અદ્યતન લાઈટીંગ એરેંજમેન્ટ, ત્રણ લાખ સ્કે. ફૂટનું વિશાળ ગ્રાઉન્ડ, ખેલૈયાઓ માટે કારપેટીંગથી સજજ પ્લે ગ્રાઉન્ડના સથવારે આ વર્ષે જૈનમમાં પણ નવરાત્રિનું ધૂમ મચવાની છે. હાઈફાઈ સાઉન્ડ સીસ્ટમ, બહેતરીન લાઈટીંગ વ્યવસ્થાથી ઝળહળતુ કારપેટથી સજજ ગ્રાઉન્ડ, સાથે વિશ્ર્વ વિખ્યાત સંગીતકાર પંકજભાઈ ભટ્ટના સાજીંદાઓની ટીમ કે જે વિવિધ વાદ્ય ઉપર સંગીતની મહેફીલ માંડશે. ગાયક કલાકારો દ્વારા સંગીતના સથવારે પ્રાચીન-અર્વાચીન, હિન્દી-ગુજરાતી, ભાતીગળ ગીતો, હાલરડા, દુહા-છંદના વિશેષ સમન્વય દ્વારા ખેલૈયાઓને જોમ ચડે તેવું ઉત્સાહસભર ગીત-સંગીત પ્રસ્તુત કરશે. આ વર્ષે ગાયક કલાકારોમાં દેશ-વિદેશમાં અનેક કાર્યક્રમો આપી ચૂકેલા ગાયક કલાકારો સિંગર અનીલ વંકાણી, આદેશ શાહ, સિંગર પ્રદીપ ઠક્ક્કર, પિન્કી પટેલ, ફ્યુઝન સીંગર નમ્રતા ગોસલીયાના કંઠે આ વર્ષે પણ ખેલૈયાઓ સંગીતના તાલે ડોલવા મજબૂર બનશે. એન્કર તરીકે કૃશાલી લાખાણી પણ પોતાની કલાના કામણ પાથરશે.
આ ઉપરાંત યુવાનોને પસંદ પડે તેવા ઈલેકટ્રીક ફાઈન ડી.જે. સથવારે યુવાધન ઝૂમી ઉઠશે. રોજેરોજ અવનવા દેશભક્તિના ગીતોથી રાષ્ટ્રભક્તિની ભાવનાને ઉજાગર કરવામાં આવશે. સમગ્ર મેદાનમાં તિરંગા છવાઈ જશે અને લોકો મા જગદંબાની આરાધના સાથે મા ભારતીની આરાધનામાં પણ લીન થઈ જશે. સ્ટેજ ઉપરથી રાસ ગરબા ઉપરાંત ફ્યુઝન ગરબા, ફાયર ડ્રમ, આફ્રીકન નગારા, રોલીંગ પીપ જેવા નવીનત્તમ નજરાણા સમી પ્રસ્તુતિ પણ કરવામાં આવશે. આપણી ભાતીગળ સંસ્કૃતિના વારસના અકબંધ રાખીને ગરબાને અર્બન ટચ સાથે પીરસવામાં આવશે. દરરોજ અવનવા ગીતોનો રસથાળ ગાયક કલાકારો દ્વારા પીરસવામાં આવશે. જેમાં મેલ-ફીમેલ વોઈસ ઉપરાંત ડ્યુએટ પણ રજૂ કરવામાં આવશે. ત્રીજા નોરતે લેઝર શો વિથ ડીજે કે જેમાં નિયોન થીમ ઉપર ખેલૈયાઓ અવનવા ફ્રી સ્ટાઈલ સ્ટેપ્સ દ્વારા આનંદ કરશે. છઠ્ઠા નોરતે ફ્યુઝન ગરબાનું આયોજન કરવામાં આવ્યું છે, જ્યારે આઠમા નોરતે ડી.જે. વોરમાં ડી.જે. સંગીતનું યુદ્ધ છેડાશે.
ગુજરાત જ નહીં પરંતુ સમગ્ર દેશની શાન સમા સુપ્રસિદ્ધ સંગીતકાર પંકજભાઈ ભટ્ટને 15થી પણ વધુ સુપ્રસિદ્ધ એવોર્ડથી નવાજવામાં આવેલા છે. છેલ્લા પાંચ દાયકાથી ગુજરાતી સંગીતમાં પોતાની પ્રતીભાથી એક નવી ઊંચાઈ પ્રાપ્ત કરનાર પંકજભાઈ ભટ્ટએ 8000થી વધુ મ્યુઝિક આલ્બમ, 150થી પણ વધારે ગુજરાતી ફિલ્મ અને 10થી વધારે હિન્દી ફિલ્મમાં પોતાનું મ્યુઝિક આપેલ છે. તેઓએ ગુજરાતી ઉપરાંત વિવિધ ભાષામાં અંદાજે 50000થી પણ વધારે ગીમ કમ્પોઝ કરેલા છે. આ ઉપરાંત વિશ્ર્વના વિવિધ દેશોમાં પોતાની સંગીતકલાના માધ્યમથી ગુજરાતી સંગીતને લોકપ્રિય બનાવનાર પંકજભાઈ ભટ્ટ સંગીત ક્ષેત્રે સમગ્ર ગુજરાતનું આભૂષણ છે. તેમના નેજા હેઠળ સાજીંદાઓની ટીમ જૈનમ કામદાર નવરાત્રિ મહોત્સવના ખેલૈયાઓને ડોલાવવા સજ્જ બની છે તેમજ ગાયક કલાકાર અનીલ વંકાણી આગવી ગાયીકી અને ફોક ટચમાં બેનમૂન ગાયનથી સમગ્ર ગુજરાત ઉપરાંત મુંબઈ સુધી ખ્યાતિ પ્રાપ્ત કરેલ છે. આ વખતે પણ તેઓ ફોક સિંગીંગમાં કંઈક નવીનતા સાથે અવનવા ગીતો લલકારીને યુવાનોને ઘેલુ લગાડશે.
- Advertisement -
આદેશ શાહ નવરાત્રિ મહોત્સવમાં મહારાષ્ટ્રનો ખૂબ જ જાણીતો ચહેરો છે, પોતે સ્ટેજ શોમાં લાઈવ પરફોર્મન્સ માટે ખૂબ જ જાણીતા છે. આજે તેઓ યુવા વર્ગની પહેલી પસંદ બની ચૂકેલા છે. ગયા વર્ષે થાણેમાં યોજાયેલી મેગા ઈવેન્ટ કે જેના આયોજક હાલના મુખ્યમંત્રી એકનાથ સિંદે હતા તે ઈવેન્ટ મુખ્ય ગાયક તરીકે આદેશ શાહએ પોતાની ગાયીકી થકી કાર્યક્રમને ચાર ચાંદ લગાડી સરાહના મેળવી હતી.
પ્રદિપ ઠક્કર છેલ્લા 24 વર્ષથી ગાયીકી ક્ષેત્રે કાર્યરત છે. તેઓ ખાસ કરીને રાસ-ગરબા, લગ્નગીત, હિન્દી ફિલ્મ જગતના નવા-જૂના ગીતો, આ ઉપરાંત ગુજરાતી ગીતો અને ભક્તિ ગીતો બહોળો અનુભવ ધરાવે છે. મુકેશજી ઓપન ગુજરાત સીંગીંગ કોમ્પિટીશનમાં કુલ 156 સ્પર્ધકોમાંથી તેઓ પ્રથમ નંબરે વિજેતા થયેલા છે. સિંગર પિન્કી પટેલ એક મલ્ટી વોઈસ પરર્ફોમર તરીકે જાણીતા છે. 2004થી જ તેઓ એક જાણીતા સીંગર તરીકે ખ્યાતિ પ્રાપ્ત કરેલ છે. ઘણા મ્યુઝિકલ શો, કોન્સર્ટ તેમજ નવરાત્રિ મહોત્સવમાં પરફોર્મ કરી ચૂકેલ છે, સમગ્ર ભારત ઉપરાંત યુકે, આફ્રિકા, ઓસ્ટ્રેલિયા, કેનેડા જેવા દેશોમાં પોતાના કાર્યક્રમો થકી ખ્યાતિ મેળવી ચૂકેલા છે. એફએમ રેડીયોમાં ઈન્ટરવ્યુ થકી તેઓએ પોતાની આગવી ભૂમિકા ભજવી છે. અનેક જાહેરાતોમાં પોતાનો કંઠ આપેલ છે.હાલ રાજકોટમાં વસવાટ કરતા વર્સેટાઈલ સીંગર એવા નમ્રતા ગોસલીયા ખૂબ સુંદર અવાજના માલીક છે. વોકલ, એમ.પી.એ., એમ.એ. જેવી વોકલ્સમાં ડીગ્રી ધરાવતા ગાયક કલાકાર અને કરાઓકે સ્પર્ધામાં વિજેતા બની ચૂકેલ છે. સુગમ સંગીતની સ્ટેટ લેવલની અનેક સ્પર્ધાઓમાં તેઓ વિેજેતા બની ચૂક્યા છે. અનેક નામાંકિત સ્કૂલોમાં ટીચર તરીકે સેવા પ્રદાન કરેલી છે. હાલમાં જ અનેક લાઈવ શો અને કરાઓ કે શો કરીને પોતાની એક આગવી ઓળખ ઉભી કરી છે.
ખ્યાતનામ સંગીતકાર અને ગાયકોના સથવારે જૈનમ પરિવારને કમિટી દ્વારા સમગ્ર વ્યવસ્થાને આખરી આપ અપાઈ ચૂક્યો છે. જૈનમના જીતુભાઈ કોઠારી, સુજીતભાઈ ઉદાણી અને જયેશભાઈ વસાના વડપણ હેઠળ સંગીતકાર, સાજીંદાઓ, ગાયક કલાકારો અને સાઉન્ડ સીસ્ટમના સથવારે ખેલૈયાઓ મન મૂકીને માણશે તે બેમત નથી.
આજની આ જૈમન કામદાર મહોત્સવ 2024ની ઉપરોક્ત માહિતી આપવા માટે પ્રેસ મુલાકાતમાં સંગીતકાર પંકજભાઈ ભટ્ટ, જય ત્રિવેદી, ગાયક કલાકાર અનીલ વાંકાણી (ભાવનગર), આદેશ શાહ (મુંબઈ), ફ્યુઝન સિંગર પ્રદીપ ઠક્કર (રાજકોટ), પિન્કી પટેલ (અમદાવાદ), ફ્યુઝન સીંગર નમ્રતા ગોસલીયા, એન્કર કૃપાલી લાખાણી સાથે જૈનમ પરિવારના સુજીતભાઈ ઉદાણી, એડવોકેટ કમલેશભાઈ શાહ, વિભાશભાઈ શેઠ, મુકેશભાઈ દોશી, જયભાઈ ખારા, આકાશભાઈ મહેતા, જુગલભાઈ દોશી, નિમેશભાઈ મહેતા, તુષારભાઈ કોઠારી, જીગરભાઈ પારેખ, કૌશીકભાઈ કોઠારી, શૈલેનભાઈ શાહ, જીતુભાઈ લાખાણી, જયભાઈ પરીખ વિગેરે જોડાયા હતા.
