ખાસ-ખબર ન્યૂઝ નવી દિલ્હી, તા.8
ભારતીય ક્રિકેટ ટીમે ન્યૂ ચંદીગઢ ખાતે રમાયેલી ટેસ્ટ મેચમાં પ્રવાસી અફઘાનિસ્તાન સામે એક યાદગાર અને ઐતિહાસિક જીત નોંધાવી છે. ટીમ ઈન્ડિયાએ પોતાની પ્રથમ ઇનિંગ્સના મજબૂત સ્કોરના જોરે અફઘાનિસ્તાનને એક ઇનિંગ્સ અને 300 રનના વિશાળ માર્જિનથી કારમો પરાજય આપ્યો છે. ભારતીય બોલરોના ઘાતક આક્રમણ સામે બીજી ઇનિંગ્સમાં પણ અફઘાનિસ્તાનની આખી ટીમ માત્ર 112 રનના નજીવા સ્કોર પર ઓલઆઉટ થઈ ગઈ હતી. આ મેચમાં ભારત તરફથી ટેસ્ટ ક્રિકેટમાં પદાર્પણ (ડેબ્યૂ) કરી રહેલા યુવા સ્પિનર માનવ સુથારે પોતાની શાનદાર બોલિંગથી તરખાટ મચાવતા મેચમાં કુલ 7 મહત્વની વિકેટો ઝડપીને અફઘાન બેટિંગ લાઇનઅપની કમર તોડી નાખી હતી.
મેચની શરૂઆતમાં ભારતીય ટીમે ધમાકેદાર બેટિંગ કરીને પોતાની પહેલી ઇનિંગ્સ 564/8 ના સ્કોર પર ડિક્લેર કરી હતી. તેના જવાબમાં મેચના ત્રીજા દિવસે લંચ બ્રેક પહેલાં જ અફઘાનિસ્તાનનો પ્રથમ ઇનિંગ્સમાં ધબડકો થયો હતો અને સમગ્ર ટીમ માત્ર 152 રન બનાવીને પેવેલિયન ભેગી થઈ ગઈ હતી. પ્રથમ ઇનિંગ્સના આધારે જ ટીમ ઈન્ડિયાને 412 રનની વિશાળ લીડ મળી હતી, જેથી ભારતીય કેપ્ટને અફઘાન ટીમને ફોલોઓન આપવાનો નિર્ણય કર્યો હતો. પ્રથમ ઇનિંગ્સમાં પણ ડેબ્યૂટન્ટ માનવ સુથારે અદભુત પ્રદર્શન કરતા 6 વિકેટ ઝડપી હતી, જ્યારે ફાસ્ટ બોલર પ્રસિદ્ધ ક્રિષ્નાને 3 સફળતા મળી હતી.
- Advertisement -
ફોલોઓન બાદ પણ અફઘાનિસ્તાન ઘૂંટણીયે; માનવ સુથાર બન્યો મેચનો હીરો
પ્રથમ ઇનિંગ્સમાં ભારે પરાજય બાદ ફોલોઓન રમવા ઉતરેલી અફઘાનિસ્તાનની ટીમ ભારતીય સ્પિનરો અને ફાસ્ટ બોલરોના સંયુક્ત આક્રમણ સામે કલાકો સુધી પણ ક્રિઝ પર ટકી શકી નહોતી. બીજી ઇનિંગ્સમાં પણ તેમની નિયમિત અંતરે વિકેટો પડતી રહી અને આખી ટીમ 112 રનમાં જ સમેટાઈ ગઈ હતી. પ્રથમ ઇનિંગ્સમાં 6 વિકેટ ઝડપીને અફઘાનિસ્તાનને બેકફૂટ પર ધકેલનાર માનવ સુથારે બીજી ઇનિંગ્સમાં પણ વધુ એક શિકાર કરીને મેચમાં પોતાની કુલ વિકેટોની સંખ્યા 7 પર પહોંચાડી હતી. પોતાની પ્રથમ જ આંતરરાષ્ટ્રીય ટેસ્ટ મેચમાં આવું પ્રદર્શન કરીને માનવ સુથારે ક્રિકેટ જગતમાં સનસનાટી મચાવી દીધી છે. ભારતીય ટીમે બેટિંગ અને બોલિંગ બંને ક્ષેત્રે એકતરફી પ્રદર્શન કરીને ત્રીજા જ દિવસે આ ટેસ્ટ મેચ જીતીને સિરીઝમાં વિજયી પ્રારંભ કર્યો છે.
