ખાસ-ખબર ન્યૂઝ રાજકોટ
બનાવની હકીકત એવી છે કે તા. 12-5-2020ના રોજ સવારના 6-15 કલાકે ગુજરનાર દિનેશભાઈ હસમુખભાઈ કારેલીયા (ઉ.વ.38)વાળા રાજકોટ કોઠારીયા ખાતે પોતાના ફેબ્રિકેશનના કામ અર્થે જતાં હતા ત્યારે કોઠારીયા ચોકડી બ્રિજ પાસે પોતાના હવાલાવાળુ એક્ટિવા રોડની સાઈડમાં પાર્ક કરી ઊભા હતા ત્યારે આજી ડેમ ચોકડી તરફથી આ કામના સામાવાળા બોલેરો કાર નં. જીજે27યુ 9089ના ચાલકે પોતાના હવાલાવાળી કાર પૂરઝડપે, બેદરકારીપૂર્વક, ટ્રાફિકના નિયમોનું ઉલ્લંઘન કરી, મનુષ્યની જિંદગી જોખમાય તે રીતે ગુજરનાર જે રોડની સાઈડમાં વાહન રાખી ઉભા હતા તેમને તેમના વાહન સહિત હડફેટે લેતાં હાલનો આ ગંભીર અકસ્માત બનવા પામ્યો હતો. જેમાં ઈજા પામનાર દિનેશભાઈ કારેલીયાનું ચાલુ સારવાર દરમિયાન અવસાન થયું હતું. જે બનાવ સંબંધે આજીડેમ પોલીસ સ્ટેશનમાં બોલેરો કારના ચાલક વિરુદ્ધ આઈ.પી.સી. 279, 337, 338 તથા 304(અ) અને મોટર વ્હીકલ એક્ટની કલમ 177, 184 મુજબનો ગુનો દાખલ કરવામાં આવ્યો હતો અને તપાસના અંતે બોલેરો કારના ચાલક સામે ચાર્જશીટ પણ કરવામાં આવી હતી.
- Advertisement -
આ અકસ્માતમાં ગુજરનાર દિનેશભાઈ કારેલીયાના વારસદારો દ્વારા રાજકોટ મોટર એક્સિડેન્ટ ક્લેઈમ ટ્રીબ્યુનલમાં વળતર મેળવવા અંગે તા. 5-8-2020ના રોજ કલેઈમ કે નં. 393-2020થી દાખલ કરવામાં આવ્યો હતો, જે દાવામાં અરજદાર તરફે એડવોકેટ અજય કે. જોષી રોકાયેલા હતા.
ઉપરોક્ત કેસમાં ગુજરનારની આવક તથા ભવિષ્યની આવકના મુદ્દાઓ પર દલીલો કરવામાં આવી અને પુરાવાઓ રજૂ કરવામાં આવ્યા હતા અને ગુજરનારના વારસદારો તેમના પર આધારિત હોય, ગુજરનાર તેમના બ્રેડવીનર હોય, તેમજ આ કામમાં રિલાયન્સ જનરલ ઈન્સ્યોરન્સ કંપની તરફથી અરજદારના વાહનની પણ બેદરકારી અંગે દલીલો કરવામાં આવી હતી, પરંતુ અરજદારના એડવોકેટ અજય કે. જોષીની દલીલોને માન્ય રાખી આ અકસ્માત માત્ર ને માત્ર બોલેરો કાર ચાલકની બેદરકારીને કારણે બનવા પામ્યો છે તેવું નામદાર કોર્ટ દ્વારા માન્ય રાખવામાં આવ્યું હતું. જે તમામ મુદ્દાઓ પર અરજદારના એડવોકેટ દ્વારા ધારદાર દલીલો કરવામાં આવી અને તે નામદાર કોર્ટ દ્વારા માન્ય રાખવામાં આવી અને વિવિધ નામદાર હાઈકોર્ટ અને સુપ્રીમ કોર્ટના ચૂકાદાઓ રજૂ રાખેા તે ધ્યાને લઈને આ અકસ્માતમાં માત્ર અને માત્ર બોલેરો કાર નં. જીજે27યુ 9089ના ચાલકની બેદરકારી ઠરાવેલી અને ગુજરનાર દિનેશભાઈ કારેલીયાના વારસદારોને રૂા. 60,00,000 ચૂકવવા રાજકોટ મોટર એક્સિડેન્ટ ક્લેઈમ ટ્રીબ્યુનલ રાજકોટ દ્વારા હુકમ કર્યો છે.
