લોકમેળામાં રાઈડમાં શોર્ટસર્કિટથી આગ લાગી : ફસાયેલા લોકોનું સફળ રેસ્ક્યુ કરાયું

‘વિરાસતથી વિકાસ’ લોકમેળાની પૂર્વતૈયારીના ભાગરૂપે મોકડ્રિલ યોજાઈ

પોલીસ, ફાયર બ્રિગેડ, આરોગ્ય સહિતના વિભાગો સંયુક્ત રીતે મોકડ્રિલમાં જોડાયા

રાજકોટના રેસકોર્સ મેદાનમાં આયોજિત ‘વિરાસતથી વિકાસ’ લોકમેળો-૨૦૨૬માં મેઈન ગેટથી ચોથી રાઈડમાં શોર્ટસર્કિટ થતાં ધુમાડાના ગોટા સાથે આગ ભભૂકી ઊઠી હતી, અને ૨ થી ૩ લોકો ઊંચાઈ પર ફસાઈ જતાં એકાએક
અફરાતફરીનો માહોલ સર્જાયો હતો. ઘટનાની ગણતરીના સમયમાં જ તંત્ર એક્શન મોડમાં આવ્યું, અને ફાયર વિભાગનું ફાયર ટેન્ડર અને એમ્બ્યુલન્સ સહિત ફાયરની ૨ ગાડીઓ તથા ૨ ૧૦૮ ઇમરજન્સી એમ્બ્યુલન્સ
ઘટનાસ્થળે પહોંચી ગયા. ફાયર ફાઇટરોએ ક્ષણનો પણ વિલંબ કર્યા વિના હાઇડ્રોલિક પ્લેટફોર્મની મદદથી ઊંચે ફસાયેલા લોકોને સલામત રીતે નીચે ઉતાર્યા અને આગ પર કાબૂ મેળવી ઇજાગ્રસ્તોને સારવાર માટે સિવિલ
હોસ્પિટલ ખસેડી રેસ્ક્યુ ઓપરેશન સફળ બનાવ્યું હતું.
આ કોઈ વાસ્તવિક ઘટના નથી પરંતુ તા. ૨ થી ૬ સપ્ટેમ્બર દરમિયાન યોજાનારા ‘વિરાસતથી વિકાસ’ લોકમેળાની પૂર્વતૈયારીના ભાગરૂપે યોજાયેલી મોકડ્રિલના દ્રશ્યો છે. આપત્તિ સમયે તમામ વિભાગોનું સંકલન અને
પૂર્વતૈયારીઓની ચકાસણી કરવાના ભાગરૂપે લોકમેળા પરિસર ખાતે મોકડ્રીલ યોજાઈ હતી, જેમાં પોલીસ, ફાયર બ્રિગેડ, આરોગ્ય સહિતના વિભાગો સંયુક્ત રીતે જોડાયા હતા. આ તકે નિવાસી અધિક કલેકટર જે.એચ. બારોટ,
અધિક જિલ્લા ચૂંટણી અધિકારી આર.એન. મુછાર, જિલ્લા ડીસીપી ઝોન -૨ રાકેશ દેસાઈ, જિલ્લા પુરવઠા અધિકારી અજય ઝાપડા, રાજકોટ સીટી પ્રાંત અધિકારી અતુલ સિંહ, ગ્રામ્ય પ્રાંત અધિકારી હર્ષવર્ધન જાડેજા, ડિઝાસ્ટર
મામલતદાર મીરાબેન જાની, ડેપ્યુટી ચીફ ફાયર ઓફિસર એ. બી. ઝાલા સહિતના અધિકારીઓ- કર્મચારીઓ ઉપસ્થિત રહ્યા હતા.

એમ્બ્યુલન્સ રવાના થયા બાદ અંતિમ ઘડીએ 112ની ટીમ પહોંચી
મોકડ્રિલ દરમિયાન લોકોને સારવાર માટે લઈ જતી એમ્બ્યુલન્સ 5:50 કલાકે સ્થળ પરથી નીકળી ગઈ હતી, જ્યારે ઈમર્જન્સી રિસ્પોન્સ માટેની 112ની ગાડી 5:53 કલાકે, એટલે કે અંતિમ ઘડીએ સ્થળ પર પહોંચી હતી. વાસ્તવિક ઘટના સમયે અકસ્માતમાં ઈજાગ્રસ્ત વ્યક્તિઓને તાત્કાલિક મદદ, ટ્રાફિક નિયંત્રણ, પોલીસ સહાય અને અન્ય ઈમર્જન્સી રિસ્પોન્સની જરૂરિયાત ઊભી થઈ શકે છે. ત્યારે મોકડ્રિલમાં જ 112ની ટીમ મોડેથી પહોંચે તે બાબત તંત્રની આંતરિક સંકલન વ્યવસ્થા સામે ગંભીર સવાલ ઊભા કરે છે.

5 ફાયર સ્ટેશન ઊભા કરાયા, 150 જવાનો ફરજ બજાવશે
રાજકોટના વિરાસતથી વિકાસ લોકમેળામાં આવતા લોકોની સુરક્ષા માટે 5 સ્થળો પર ફાયર સ્ટેશન નિર્માણ કરાયા છે અને 3 શિફ્ટમાં 150 ફાયર જવાન રાઉન્ડ ધ ક્લોક તૈનાત રહશે. લોકમેળામાં તમામ સ્ટોલ ધારકોએ સ્ટોલ
પાસે 200 લિટર પાણીનો જથ્થો ધરાવતું બેરલ, ફાયર એક્સટિંગ્વિશર સહિતના પ્રાથમિક સાધનો રાખવાના રહેશે.