થેલેસેમિયાગ્રસ્ત બાળકોની સારવારના પ્રશ્નનો ઉકેલ લાવવા માટે વિનય જસાણીની મંત્રીઓ સમક્ષ રજૂઆત
થેલેસેમિયાગ્રસ્ત 500થી વધુ બાળકોને નિયમિત બ્લડ મળે તેવી વ્યવસ્થા ઉભી કરવા રજૂઆત
- Advertisement -
સૌરાષ્ટ્રભરમાંથી સારવાર માટે રાજકોટ સિવિલ હોસ્પિટલમાં આવતા થેલેસેમિયાગ્રસ્ત બાળકો સહિતના દર્દીઓને પડતી મુશ્કેલીઓના નિરાકરણ માટે શ્રીમદ રાજચંદ્ર ફાઉન્ડેશનના વિનય જસાણીએ ગાંધીનગર ખાતે ગુજરાત સરકારના મંત્રીઓની રૂબરૂ મુલાકાત લઈને વિસ્તૃત રજૂઆત કરી છે. આરોગ્ય મંત્રી પ્રફુલભાઈ પાનસુરિયા, મંત્રી કાંતિલાલ અમૃતિયા અને મંત્રી કુંવરજી બાવળિયાને મળીને તેમણે સિવિલ હોસ્પિટલમાં બ્લડની ઉપલબ્ધતા, જરૂરી તબીબી સાધનો, નિષ્ણાંત ડોક્ટરોની નિમણૂક તેમજ થેલેસેમિયાગ્રસ્ત બાળકોને જરૂરી દવાઓ સરળતાથી મળી રહે તેવા પ્રશ્નો રજૂ કર્યા હતા.
રાજકોટ તબીબી સારવારના કેન્દ્ર તરીકે વિકસ્યું છે અને સૌરાષ્ટ્રના ગ્રામ્ય વિસ્તારોમાંથી મોટી સંખ્યામાં દર્દીઓ અહીં સારવાર માટે આવે છે. ખાસ કરીને થેલેસેમિયાગ્રસ્ત બાળકોને દર 10થી 15 દિવસે બ્લડ ચડાવવાની જરૂર પડતી હોય છે. આવા બાળકોની શારીરિક અને આર્થિક સ્થિતિને ધ્યાનમાં લેતાં સમયસર રક્ત ઉપલબ્ધ થવું અત્યંત જરૂરી છે. વિનય જસાણીએ રજૂઆતમાં જણાવ્યું હતું કે થેલેસેમિયાગ્રસ્ત 500થી વધુ બાળકોને નિયમિત બ્લડની જરૂર પડે છે. બીજી તરફ, ગ્રામ્ય વિસ્તારોમાંથી આવતા અનેક દર્દીઓ સાથે માત્ર એક જ વ્યક્તિ આવતી હોય છે, જે પોતે રક્તદાન કરી શકે તેવી સ્થિતિમાં ન હોય. પરિણામે દર્દી અને તેમના પરિવારજનોને બ્લડની વ્યવસ્થા કરવા માટે ભારે મુશ્કેલીઓનો સામનો કરવો પડે છે. આવી પરિસ્થિતિમાં રાજકોટ સિવિલ હોસ્પિટલમાં સારવાર માટે આવતા દર્દીઓને સરળતાથી અને સમયસર બ્લડ મળી રહે તે માટે રોગી કલ્યાણ સમિતિના ફંડમાંથી અન્ય બ્લડ બેંકો પાસેથી રક્ત મેળવીને સિવિલ હોસ્પિટલમાં ઉપલબ્ધ કરાવવાની વ્યવસ્થા ઊભી કરવાની માંગ કરવામાં આવી છે.
રજૂઆત દરમિયાન રાજકોટ સિવિલ હોસ્પિટલમાં જરૂરી તબીબી સાધનોની અછતનો પ્રશ્ન પણ ઉઠાવવામાં આવ્યો હતો. વિનય જસાણીના જણાવ્યા અનુસાર, ગુજરાત સરકાર દ્વારા વર્ષ 2007માં રાજકોટ સિવિલ હોસ્પિટલ માટે ઓટો ક્રોસચેક અને ઓટો બ્લડ ગ્રુપ ચેક કરવાની મશીન મંજૂર કરવામાં આવી હતી, પરંતુ મંજૂરીના વર્ષો બાદ પણ આ મશીન હોસ્પિટલમાં ઉપલબ્ધ થયું નથી. આ મશીન ઉપલબ્ધ થાય તો રક્ત સંબંધિત જરૂરી તપાસની કામગીરીમાં મદદ મળી શકે અને દર્દીઓને સારવાર દરમિયાન વધુ સુવિધા મળી શકે. આથી મંજૂર થયેલા સાધનની ઉપલબ્ધતા સુનિશ્ચિત કરવા માટે તાત્કાલિક પગલાં ભરવાની રજૂઆત કરવામાં આવી છે.
- Advertisement -
હોસ્પિટલમાં ખૂટતા તબીબી સાધનોની પૂર્તતા કરવામાં આવે અને નિષ્ણાંત ડોક્ટરોની તાત્કાલિક નિમણૂક કરવામાં આવે તો રાજકોટ સહિત સૌરાષ્ટ્રના હજારો દર્દીઓને વધુ સારી અને સમયસર સારવાર મળી શકે છે. દર્દીઓને અન્ય શહેરોમાં જવાની જરૂરિયાત ઘટે અને સરકારી આરોગ્ય સેવાઓનો લાભ વધુ સરળતાથી મળી શકે તે દિશામાં પગલાં ભરવા વિનય જસાણીએ મંત્રીઓ સમક્ષ અનુરોધ કર્યો હતો.
કેલફર દવા અને ડેસફરાલ ઇન્જેક્શન હોસ્પિટલમાં ઉપલબ્ધ કરાવવાની માંગ
થેલેસેમિયાગ્રસ્ત બાળકોને સારવાર દરમિયાન વારંવાર કેલફર નામની દવા તેમજ ડેસફરાલ ઇન્જેક્શનની જરૂર પડે છે. રજૂઆત મુજબ, રાજકોટ સિવિલ હોસ્પિટલમાં આ દવાઓ ઉપલબ્ધ ન હોવાથી દર્દીઓના પરિવારજનોને બહારથી ખરીદવી પડે છે. લાંબા સમય સુધી નિયમિત સારવાર લેવાની જરૂરિયાત ધરાવતા બાળકો માટે આ ખર્ચ આર્થિક બોજ બની શકે છે. આથી થેલેસેમિયાગ્રસ્ત બાળકોને જરૂરી દવાઓ અને ઇન્જેક્શન સિવિલ હોસ્પિટલમાં જ ઉપલબ્ધ થાય તેવી કાયમી વ્યવસ્થા ઊભી કરવાની માંગ કરવામાં આવી છે, જેથી આર્થિક રીતે નબળા પરિવારોને રાહત મળે અને બાળકોની સારવારમાં દવાઓની અછત અવરોધરૂપ ન બને.
