ચોમાસા પહેલા જ સોશિયલ મીડિયા પર ગિરનારનો ટ્રેન્ડ, પ્રકૃતિપ્રેમીઓમાં અદભુત ક્રેઝ
ડિજિટલ પ્લેટફોર્મ પર ગુજરાતની શાનનો દબદબો
- Advertisement -
વાદળોની ચાદર અને ખળખળ વહેતા ઝરણાંના અદભુત વિડીયો અને રીલ્સ શેર કરીને યુવાનોએ જમાવ્યો માહોલ
ખાસ-ખબર ન્યૂઝ જૂનાગઢ, તા.21
હવામાન વિભાગ અને વરસાદની આગાહી કરનારના મતે સમગ્ર દેશમાં ચોમાસુ વેહલું આવી જશે તેવી આગાહી કરવામાં આવી રહી છે. જેમાં તારીખ 27 મે આસપાસ કેરળમાં વરસાદનું આગમન થશે અને ધીરે ધીરે દેશના અનેક ભાગોમાં વરસાદી સિસ્ટમ સક્રિય થશે ત્યારે ગુજરાતમાં પણ વરસાદનું આગમન થશે એવા સમયે ગુજરાતની શાનસમા ગિરનાર પર્વત અને ગીર જંગલ સહીત અનેક ઝરણાં અને ધોધ સહીત ગિરનારનો વરસાદી વાતાવરણમાં મનમોહક નયનરમ્ય દ્રશ્યો જોવા અને માણવા એક લ્હાવો છે. ત્યારે યુવાન પ્રકૃતિ પ્રેમીઓમાં શોશ્યલ મીડિયામાં ચોમાસાની ઋતુની આગમનની ઘડીઓના એઆઈ તેમજ અગાઉના દર્શ્યોને પોતાના પેલ્ટફોર્મ પર મુકવાનો ટ્રેન્ડ જોવા મળી રહ્યો છે.
ગુજરાતનો સૌથી ઊંચો અને પવિત્ર પર્વત ગિરનાર હંમેશા પ્રવાસીઓ અને શ્રદ્ધાળુઓ માટે આકર્ષણનું કેન્દ્ર રહ્યો છે. પરંતુ, ચોમાસાની ઋતુમાં ગિરનારનું સૌંદર્ય કંઈક અલગ જ સ્તરે પહોંચી જાય છે. ચાલુ વર્ષે હજુ ચોમાસું બેસવાને આશરે એકાદ મહિના જેટલો સમય બાકી છે, ત્યાં જ સોશિયલ મીડિયા પ્લેટફોર્મ્સ પર ગિરનારને લઈને એક અદભુત માહોલ જોવા મળી રહ્યો છે. ડિજિટલ દુનિયામાં અત્યારે હાલો ગિરનાર ટ્રેન્ડ ખૂબ જ ઝડપથી વાયરલ થઈ રહ્યો છે, જે દર્શાવે છે કે આ વર્ષે ગિરનાર પ્રવાસીઓના તમામ રેકોર્ડ તોડવા માટે તૈયાર છે.
ઇન્સ્ટાગ્રામ, ફેસબુક જેવા સોશિયલ મીડિયા પ્લેટફોર્મ પર યુવાનો પોતાના આઇડી પરથી ગિરનારના અદભુત ફોટોગ્રાફ્સ અને રીલ્સ શેર કરી રહ્યા છે. ખાસ કરીને ગત વર્ષના ચોમાસા દરમિયાન શૂટ કરાયેલા વીડિયો, જેમાં ગિરનાર પર્વત વાદળોની ચાદર ઓઢીને બેઠો હોય, ધુમ્મસભર્યું વાતાવરણ હોય અને લીલોતરી છવાયેલી હોય, તેવા દ્રશ્યો ધૂમ મચાવી રહ્યા છે. યુવાનો આ વીડિયો અને ફોટોઝની સાથે કેપ્શનમાં હાલો ગિરનાર, કુદરતનું સ્વર્ગ એટલે ગિરનાર અને આ ચોમાસે ક્યાં જવું? હાલો ગિરનાર જેવા આકર્ષક વાક્યો લખીને લોકોને સોરઠની આ પવિત્ર ભૂમિ પર આવવા આમંત્રણ આપી રહ્યા છે.
ચોમાસાની ઋતુ શરૂ થતાં જ ગિરનાર પર્વત જાણે સોળે કળાએ ખીલી ઉઠે છે. પર્વતના ઊંચા ખડકો પરથી વહેતા નાના-મોટા અસંખ્ય ઝરણાં અને ચારેય તરફ પથરાયેલી હરિયાળી પ્રકૃતિપ્રેમીઓને મંત્રમુગ્ધ કરી દે છે. વાદળો જાણે પર્વતના પગથિયાંને સ્પર્શવા નીચે ઉતરી આવતા હોય તેવો અદ્ભૂત નજારો જોવા મળે છે. ગિરનાર પર્વતની આ જ સુંદરતાને માણવા માટે દર વર્ષે ખાસ કરીને ગુજરાતભરમાંથી મોટી સંખ્યામાં યુવાનો અને ટ્રેકર્સ અહીં દોડી આવે છે. ચોમાસાના દિવસોમાં અહીંનો નજારો કોઈ હિલ સ્ટેશનથી કમ નથી હોતો.
ગત ચોમાસાની ઋતુમાં ગિરનાર અને તેની આસપાસના ગીર જંગલ વિસ્તારમાં પ્રવાસીઓની અભૂતપૂર્વ ભીડ જોવા મળી હતી. રોપ-વેની સુવિધા ઉપલબ્ધ હોવાને કારણે અબાલ-વૃદ્ધ સૌ કોઈ માટે ગિરનારના દર્શન અને કુદરતી સૌંદર્ય માણવું સરળ બન્યું છે. ગત વર્ષે વીકેન્ડ અને તહેવારોના દિવસોમાં જૂનાગઢની તમામ હોટેલો અને ધર્મશાળાઓ હાઉસફુલ થઈ ગઈ હતી. ચાલુ વર્ષે ચોમાસું નજીક આવી રહ્યું છે ત્યારે એક મહિના પહેલાથી જ સોશિયલ મીડિયા પર શરૂ થયેલા આ જબરદસ્ત ટ્રેન્ડને જોતાં એવું સ્પષ્ટ અનુમાન લગાવી શકાય છે કે આ વખતે પ્રવાસીઓની ભીડ ગત વર્ષ કરતાં પણ ઘણી વધારે રહેશે.
સોશિયલ મીડિયાના આ ટ્રેન્ડ પાછળ મુખ્ય હાથ યુવાધનનો છે. કોલેજના મિત્રોના ગ્રૂપ, ટ્રેકિંગ ક્લબ અને બાઇકર્સ ગેંગ અત્યારથી જ ચોમાસામાં જૂનાગઢ પ્રવાસના પ્લાનિંગ કરવા લાગ્યા છે. ગિરનારની સીડીઓ ચડીને જટાશંકર, ગાયત્રી મંદિર અને ભવનાથ તળેટીના ઝરણાંઓમાં નહાવાનો લહાવો લેવા માટે યુવાનો ભારે ઉત્સાહિત છે.
એક મહિના અગાઉથી જ જામતો આ ગિરનારપ્રેમ એ વાતની સાબિતી છે કે, આ વર્ષે પણ ચોમાસાની ઋતુમાં સોરઠની આ પવિત્ર અને પ્રકૃતિથી ભરપૂર ધરા પ્રવાસીઓના કલરવથી ગુંજી ઉઠશે.
