જામનુના શોખિનો સાવધાન !
કેમિકલ, મશીનો, હજારો બોટલો અને હોલોગ્રામ સહિતનો 8.79 લાખનો મુદ્દામાલ જપ્ત કરવામાં આવ્યો
- Advertisement -
પૂર્વ કચ્છમાં નકલી વિદેશી દારૂના મોટા રેકેટનો પર્દાફાશ કરતાં એલસીબીએ અંજાર તાલુકાના સતાપર ગામે ચાલતી ડુપ્લિકેટ દારૂની ફેક્ટરી પર દરોડો પાડી રૂ. 8.79 લાખનો મુદ્દામાલ જપ્ત કર્યો છે. પોલીસે સ્થળ પરથી બે આરોપીની ધરપકડ કરી છે, જ્યારે વધુ બે આરોપી ફરાર હોવાનું બહાર આવ્યું છે. અહીં મેજિક મોમેન્ટ્સના નામે બનાવટી વિદેશી દારૂ તૈયાર કરવામાં આવતો હતો.
પૂર્વ કચ્છ પોલીસ અધિક્ષક સાગર બાગમારના માર્ગદર્શન હેઠળ એલસીબી પીઆઈ જે.એમ. વાળાની આગેવાનીમાં ટીમ પેટ્રોલિંગમાં હતી ત્યારે પોલીસને ચોક્કસ બાતમી મળી હતી કે, સતાપર ગામનો સુનિલ શામજી માતા પોતાના સાગરિતો સાથે ગોવર્ધન પર્વતથી સતાપર તરફ જતા માર્ગ નજીક આવેલી એક વાડીની ઓરડીમાં કેમિકલનો ઉપયોગ કરીને ડુપ્લિકેટ ઇંગ્લિશ દારૂનું ઉત્પાદન કરી રહ્યો છે.
બાતમીના આધારે એલસીબીની ટીમે સ્થળ પર દરોડો પાડતા સમગ્ર કૌભાંડ સામે આવ્યું હતું. દરોડા દરમિયાન સ્થળ પરથી મેજિક મોમેન્ટ્સ ફ્લેવર્ડ ઓફ ઇન્ડિયા જામુન સ્પેશિયલ મિન્ટ રેડિયન્ટ ફ્લેવર્ડ વોડકાના નામે તૈયાર કરાયેલી 180 એમએલની 1,056 ભરેલી બોટલો, 180 એમએલની 6,300 ખાલી બોટલો, બોટલોમાં દારૂ ભરવાના ઇલેક્ટ્રિક મશીનો, સીલિંગ મશીનો, ઢાંકણા, હોલોગ્રામ સ્ટીકરો, પેકિંગ સામગ્રી તેમજ મોટા પ્રમાણમાં વિવિધ પ્રકારના પ્રવાહી કેમિકલ મળી આવ્યા હતા.
પોલીસે અંદાજે 1,200 લીટરથી વધુ કેમિકલ અને તૈયાર ડુપ્લિકેટ દારૂ જેવા પ્રવાહી પદાર્થો પણ જપ્ત કર્યા હતા.આ કાર્યવાહી દરમિયાન પોલીસે સતાપરના સુનિલ શામજી માતા અને રમજાન હમીરકાસમ જુણેજાની ધરપકડ કરી હતી. જ્યારે અંતરજાળના કિશોર નાગજીભાઈ વ્યાસ અને આદિપુરના રાજેશ ઉર્ફે રાજુ રઘુભાઈ પ્રજાપતિ ફરાર હોવાનું સામે આવતા તેમની શોધખોળ હાથ ધરવામાં આવી છે.
આ મામલે લોકલ ક્રાઈમ બ્રાન્ચ દ્વારા અંજાર પોલીસ સ્ટેશનમાં ગુનો નોંધાવી વધુ તપાસ શરૂ કરવામાં આવી છે. FSLના અધિકારીઓને સ્થળ પર બોલાવી પ્રાથમિક તપાસ કરાવવામાં આવતાં ત્યાં ડુપ્લિકેટ દારૂનું ઉત્પાદન થતું હોવાનું સામે આવ્યું હતું. પોલીસની તપાસમાં આરોપીઓ છેલ્લા એક મહિનાથી અહીં સક્રિય થયા હતા અને પ્રવુતિ સાથે સંકળાયેલા હતા. કેટલો મુદામાલ તૈયાર કર્યો, કોને કોને વેચ્યો, કોણ કોણ સંડોવાયેલુ હતું, કેટલા સમયથી પ્રવુતિ ચાલતી અને ક્યાંથી વિચાર આવ્યો તે સહિતની દિશામાં પોલીસે તપાસ હાથ ધરી છે. આરોપીઓને કોર્ટમાં રજૂ કરી રિમાન્ડની માગણી કરાશે.
કેમિકલથી બનતો દારૂ, સ્વાસ્થ્ય સાથે ચેડાં
વાડીની ઓરડીમાંથી 200 લીટરના 3 બેરલમાંથી 600 લીટર સફેદ કલરનું પારદર્શક કેમિકલ જેવું પ્રવાહી, તેમજ 350 લિટર અન્ય દારૂ જેવું કથ્થઈ કલરનું પ્રવાહી તેમજ 30 લીટર આછા કથ્થઈ કલરનું પ્રવાહી તથા સફેદ કલરની ટાંકીમાં જાંબલી કલરનો 300 લીટર ડુપ્લીકેટ દારૂ તથા બે લિટર ઘાટા જાંબલી કલરનું પ્રવાહી, દારૂ બનાવવાના ફ્લેવર તથા કલર માટેનું એસેન્સ સહિતનો મુદ્દામાલ મળી આવ્યો હતો. દારૂ બનાવવા માટે અહીં કેમિકલનો ઉપયોગ કરવામાં આવતો હતો જેથી સ્વાસ્થ્ય સાથે પણ ચેડા કહી શકાય.
