સરકારે લોકસભા અને રાજ્ય વિધાનસભાઓની એક સાથે ચૂંટણીઓ યોજવામાં ઘણા અવરોધો સૂચિબદ્ધ કર્યા હતા તેમ છતાં જણાવ્યું હતું કે આમ કરવાથી ચૂંટણી પ્રચારમાં રાજકીય પક્ષોની તિજોરીમાં મોટી બચત થશે. રાજ્યસભામાં એક પ્રશ્નના લેખિત જવાબમાં કાયદા પ્રધાન અર્જુન રામ મેઘવાલે જણાવ્યું હતું કે લોકસભા અને વિધાનસભાની ચૂંટણીઓ, જેમાં પેટા-ચૂંટણીઓનો સમાવેશ થાય છે, તેના પરિણામે આદર્શ આચારસંહિતા લાંબા સમય સુધી લાગુ રહે છે અને પરિણામે, વિકાસ અને કલ્યાણકારી કાર્યક્રમોમાં અસર કરે છે.
તેમણે કહ્યું કે એક સાથે ચૂંટણી કરાવવા માટે બંધારણના પાંચ અનુચ્છેદમાં સુધારો કરવો પડશે. જેમાં સંસદના ગૃહોના સમયગાળાને લગતી કલમ 83, લોકસભાના વિસર્જનને લગતી કલમ 85, રાજ્યની વિધાનસભાઓની અવધિ સાથે સંબંધિત કલમ 172, રાજ્યની વિધાનસભાઓના વિસર્જનને લગતી કલમ 174 અને રાજ્યોમાં રાષ્ટ્રપતિ શાસન લગાવવા સંબંધિત કલમ 356નો સમાવેશ થાય છે.
- Advertisement -
તેમણે કહ્યું કે આ મામલે તમામ રાજકીય પક્ષોની સહમતિ મેળવવાની જરૂર પડશે. સંઘીય માળખાને ધ્યાનમાં રાખીને તમામ રાજ્ય સરકારોની સંમતિ પણ મેળવવામાં આવે તે જરૂરી છે. વધારાના ઈલેક્ટ્રોનિક વોટિંગ મશીનો અને પેપર ટ્રેલ મશીનો ખરીદવાની પણ જરૂર પડશે, જેના માટે હજારો કરોડ રૂપિયાનો ખર્ચ થઈ શકે છે. મેઘવાલે જણાવ્યું હતું કે લોકસભા અને રાજ્ય વિધાનસભાઓની એકસાથે ચૂંટણી માટે રોડમેપ તૈયાર કરવા માટે આ મુદ્દો હવે વધુ તપાસ માટે કાયદા પંચને મોકલવામાં આવ્યો છે.
