પડધરી પોલીસનું નાક વાઢી નાખતી સ્ટેટ મોનીટરીંગ સેલ : કટિંગ ટાણે જ દરોડો

ડુંગળીની બોરીની આડમાં સંતાડેલા 10 લાખના દારૂ સાથે બે ઝડપાયા

ઊંઘતી ઝડપાયેલી સ્થાનિક પોલીસ સામે તોળાતા પગલાં : નાસી છૂટેલા ચારની શોધખોળ

રાજકોટ સહીત રાજ્યભરમાં દારૂની હેરાફેરી ઉપર સ્ટેટ મોનીટરીંગ સેલ રીતસરની ધોંસ બોલાવી રહી છે ગઈકાલે જ કુવાડવા રોડ પોલીસ સ્ટેશન વિસ્તારમાં દરોડો પાડી 70 લાખનો દારૂનો જથ્થો એસએમસીએ ઝડપી લીધા બાદ ગત મોડી રાત્રે એસએમસીએ પડધરી પોલીસ સ્ટેશન વિસ્તારમાં દરોડો પાડી પડધરી પોલીસની નાક વાઢી નાખ્યું છે એસએમસીએ પડધરી પોલીસ લાઈન પાછળ આવેલ નદીકાંઠાના રસ્તે દરોડો પાડી 9.79 લાખની કિંમતનો 3804 બોટલ દારૂ ઝડપી લેતા સ્થાનિક પોલીસ ઊંઘતી ઝડપાઇ ગઈ છે પોલીસે બે શખ્સોની ધરપકડ કરી નાસી છૂટેલા ચાર શખ્સોની શોધખોળ હાથ ધરી છે એસએમસીના દારૂ-જુગારના કેસ બાદ બેદરકારી દાખવનાર સ્થાનિક પોલીસ સામે રેન્જ આઇજી સસ્પેન્ડ કરવા સુધીના આકરા પગલાં લેતા હોવાથી હવે પડધરી પોલીસ સામે પણ તોળાતા પગલાં લેવાઈ તેવા સંકેતો પ્રાપ્ત થઇ રહ્યા છે.

રાજ્યભરમાં દારૂ-જુગાર સહિતનું દુષણ ડામી દેવા તેમજ પરપ્રાંતોમાંથી ઘુસાડવામાં આવતા કરોડો રૂપિયાના દારૂનું નેટવર્ક તોડી પાડવા સ્ટેટ મોનીટરીંગ સેલ એક્શન મોડમાં આવી ગઈ છે દરમિયાન રાજકોટ જિલ્લાની પડધરી પોલીસ પણ ઊંઘતી ઝડપાઇ ગઈ હોય તેમ સ્ટેટ મોનીટરીંગ સેલની ટીમે બાતમી આધારે પડધરી પોલીસ સ્ટેશન વિસ્તારમાં દારૂનો સફળ દરોડો પાડી સ્થાનિક પોલીસનું નાક વાઢી નાખ્યું છે સુત્રોમાંથી પ્રાપ્ત માહિતી મુજબ સ્ટેટ મોનીટરીંગ સેલની ટિમના પીઆઈ એમ કે માલવિયા ગત રાત્રે પેટ્રોલિંગમાં હતા ત્યારે સ્ટાફને માહિતી મળી હતી કે પડધરી પોલીસ લાઈન પાછળ નદીકાંઠાના રસ્તા ઉપર દારૂનું કટિંગ થઇ રહ્યું છે આ બાતમી આધારે એસએમસીની ટીમે મોડી રાત્રે દરોડો પાડતા નાસભાગ મચી ગઈ હતી પોલીસે અહીંયાથી રાજકોટના ભગવતીપરાના બાવાસા યાસિનશા પઠાણ અને મોવિયાના સચિન શાંતિલાલ પરમારની ધરપકડ કરી 9.79 લાખનો 3804 બોટલ દારૂ, 10 લાખનું વાહન, નાના મોટા ડુંગળીના 65 કટ્ટા, બે મોબાઈલ, તાલપત્રી, રોકડ સહીત 20,19,824 રૂપિયાનો મુદામાલ કબ્જે કર્યો છે એસએમસીએ દરોડો પાડતા સ્થાનિક પોલીસ ઊંઘતી ઝડપાઇ છે હવે સિસ્ટમ મુજબ ફરજમાં બેદરકારી સબબ રેન્જ આઇજી દ્વારા તપાસ સોંપી જવાબદારોને સસ્પેન્ડ કરવા સુધીના તોળાતા પગલાં લેવાઈ રહ્યા હોવાનું જાણવા મળ્યું છે.

નાસી છૂટેલા આરોપીઓ

સ્ટેટ મોનીટરીંગ સેલની ટીમે દરોડો પાડતા જ અમુક શખ્સો અંધારામાં નાસી છૂટ્યા હતા તપાસ કરતા નાસી છૂટેલા શખ્સોમાં રાજકોટનો ઈરફાન કાદરી, પડધરીનો લાલભાઈ પરમાર, આઇસરનો માલિક અને દારૂ મોકલનાર સહીત ચાર શખ્સોને વોન્ટેડ જાહેર કરવામાં આવ્યા છે.

રાજકોટના ઇરફાને દારૂ મંગાવ્યો હતો

સ્ટેટ મોનીટરીંગ સેલની ટીમે 9.79 લાખનો દારૂ ઝડપી પાડ્યો છે તેમાં બે આરોપીને પકડીને ચાર શખ્સોને વોન્ટેડ જાહેર કર્યા છે વોન્ટેડ આરોપી પૈકી રાજકોટના ઈરફાન કાદરીએ આ દારૂનો જથ્થો મંગાવ્યો હોવાનું અને દારૂ ઉતારતો હોય ત્યાંથી કટિંગ કરવાનો હોવાનું જાણવા મળ્યું છે.

બાવાસા છ મહિનાથી ઈરફાનનું કામ કરે છે, એક ટ્રીપના 20 હજાર મળતા

એસએમસીના દરોડામાં પકડાયેલા બે શખ્સો પોલીસ પાસે પોપટ બની ગયા હતા જેમાં ડ્રાયવર તરીકે કામ કરતા ભગવતીપરાના બાવાસાને એક ટ્રીપના 20 હજાર ઇરફાન આપવાનો હતો 16 તારીખે 5000 રોકડા આપી તેને સાપુતારા મોકલ્યો હતો ત્યાં હોટલમાં રોકાયો હતો બાદમાં તેને ઈરફાનનો ફોન આવ્યો હતો અને તેણે જી જે 03 એ ટી 4667 નંબરનું આઇસર પડ્યું છે તેમાં ચાવી છે તે લઈને રાજકોટ તરફ આવ તેમ કહેતા બાવાસા રાજકોટ તરફ આવ્યો હતો તેને તરઘડી અને ત્યાંથી રામપરના પાટિયા તરફ જવાનું કહ્યું હતું ત્યાં બે શખ્સો ડુંગળીના કટ્ટા ઉતારવા લાગ્યા હતા.

દારૂ ઉતારવાવાળા સચિનને ઈરફાન 5000 આપવાનો હતો

સ્ટેટ મોનીટરીંગ સેલની ટીમે દરોડો પાડી બે લોકોને પકડી લીધા છે જેમાં મોવિયાના સચિન શાંતિલાલ પરમારનો સમાવેશ થાય છે પોલીસ પૂછતાછમાં સચિન દારૂ ઉતારવાનું કામ કરતો હતો તેને ઇરફાને ફોન કરીને દારૂ ઉતારવાના કામ માટે 5000 રૂપિયા આપવા કહ્યું હતું માલ ક્યાં ઉતારવો તે જગ્યા લાલા પરમારે નક્કી કરી હતી ઇરફાને ફોન કરતા પોતે ટ્રકમાં બેસી ગયો હતો પરંતુ ડુંગળીના કટ્ટા દૂર કરતા હતા ત્યારે જ એસએમસી ત્રાટકી ગઈ હતી.