કોરોનાને જાણીજોઈને આટલો ખતરનાક બનાવ્યો, વુહાન લેબને અમેરિકી વૈજ્ઞાનિકે જ આપ્યું હતું લાખો ડોલરનું ફંડિંગ

અમેરિકાના પૂર્વ ગુપ્તચર પ્રમુખ તુલસી ગબાર્ડે સીક્રેટ ડોક્યુમેન્ટ્સની માહિતી જણાવી

તુલસી ગબાર્ડે વૈજ્ઞાનિક ડો. એન્થોની ફૌસી પર લગાવ્યા ગંભીર આરોપો

અમેરિકાના પૂર્વ ગુપ્તચર પ્રમુખ તુલસી ગબાર્ડે ઓફિસમાં તેમના છેલ્લા દિવસે મોટા વૈજ્ઞાનિક ડો. એન્થોની ફૌસી પર ગંભીર આરોપો લગાવ્યા છે. તેમણે કેટલાક ગુપ્ત દસ્તાવેજો જાહેર કરીને દાવો કર્યો છે કે ડો. ફૌસીએ ચીનની વુહાન લેબને લાખો ડોલરનું સરકારી ફંડિગ આપ્યું હતું. આ પૈસાનો ઉપયોગ ચામાચીડિયાના કોરોના વાયરસને વધુ ખતરનાક બનાવતા સંશોધન માટે થયો હતો. આરોપ છે કે જ્યારે મહામારી ફેલાઈ, ત્યારે ડો. ફૌસીએ એ વાત દબાવી દીધી કે વાયરસ લેબમાંથી લીક થયો હતો. ગબાર્ડના મતે, ડો. ફૌસીએ 2024માં અમેરિકી સંસદ સમક્ષ શપથ લીધા પછી પણ જૂઠું બોલ્યા હતા. 2020માં જ્યારે અમેરિકામાં કોરોના ફેલાયો, ત્યારે ટ્રમ્પ સરકારે તેનાથી નિપટવાની જવાબદારી ડો. ફૌસીને સોંપી હતી.

કયા સંશોધન માટે વૈજ્ઞાનિકે ફંડિગ આપ્યું હતું?
આરોપ છે કે ડો. ફૌસીએ ‘ગેન-ઓફ-ફંક્શન રિસર્ચ’ માટે ફંડિંગ કર્યું હતું. આ એક એવી વૈજ્ઞાનિક રિસર્ચ છે, જેમાં કોઈ વાયરસને લેબની અંદર જાણીજોઈને વધુ શક્તિશાળી, ચેપી કે ખતરનાક બનાવવામાં આવે છે. વૈજ્ઞાનિકો આવું એટલા માટે કરે છે જેથી એ સમજી શકાય કે ભવિષ્યમાં કોઈ વાયરસ મનુષ્યો પર કેટલો મોટો હુમલો કરી શકે છે અને તેની વેક્સિન કેવી રીતે બનશે, પરંતુ આમાં વાયરસ લીક થવાનો ખતરો ખૂબ જ વધારે હોય છે.
આ રિસર્ચનો કોવિડ-19 સાથે શું સંબંધ?
ગબાર્ડનો દાવો છે કે વુહાન ઇન્સ્ટિટ્યૂટ ઑફ વાયરોલોજીમાં ચામાચીડિયાના કોરોના વાયરસ પર આ જ ખતરનાક રિસર્ચ ચાલી રહી હતી. એવું માનવામાં આવે છે કે આ જ લેબમાંથી વાયરસ અકસ્માતે લીક થયો અને દુનિયાભરમાં કોરોના મહામારી ફેલાઈ.
સત્ય છુપાવવા માટે શું રમત રમવામાં આવી હતી?
ગબાર્ડની ઓફિસ અનુસાર, ડૉ. ફૌસીએ પોતે એક ‘નકલી વૈજ્ઞાનિક પેપર’ તૈયાર કરાવ્યું અને તેમના મનપસંદ વૈજ્ઞાનિકોને ગુપ્તચર એજન્સીઓ પાસે મોકલ્યા. આ વૈજ્ઞાનિકોએ સત્તાવાર રિપોર્ટમાં લખાવ્યું કે કોરોના વાયરસ લેબમાંથી નહીં પરંતુ કુદરતી રીતે પ્રાણીઓમાંથી મનુષ્યોમાં ફેલાયો છે, જેથી ફૌસીનો ખતરનાક રિસર્ચ પ્રોજેક્ટ છુપાયેલો રહે.
ડૉ. ફૌસી પર આ આરોપો કયા આધારે લાગ્યા છે?
વ્હિસલબ્લોઅર્સની જુબાની પરથી સ્પષ્ટ થાય છે કે જે ગુપ્તચર વિશ્લેષકોએ ડૉ. ફૌસીની ‘કુદરતી ઉત્પત્તિ’ વાળી થિયરી પર સવાલ ઉઠાવ્યા હતા, તેમને કારકિર્દી બરબાદ કરવાની ધમકીઓ આપવામાં આવી, પજવણી કરવામાં આવી અને તેમને બાજુ પર મૂકી દેવામાં આવ્યા.

ટ્રમ્પ સરકારના ડાયરેક્ટર ઓફ નેશનલ ઇન્ટેલિજન્સના વડા હતા તુલસી
ટ્રમ્પ સરકારના ટોચના હિંદુ અધિકારી તુલસી ગબાર્ડે 22 મેના રોજ પોતાના પદ પરથી રાજીનામું આપી દીધું હતું. તુલસી અમેરિકાના ‘ડાયરેક્ટર ઓફ નેશનલ ઇન્ટેલિજન્સ’ના વડા હતા, તેમના હેઠળ 18 ગુપ્ત એજન્સીઓ કામ કરતી હતી. ફોક્સ ન્યૂઝ અનુસાર, તેમના પતિ એક અત્યંત દુર્લભ હાડકાના કેન્સરથી પીડાઈ રહ્યા છે અને ગબાર્ડ આ મુશ્કેલ સમયમાં તેમની સાથે રહેવા માંગે છે. રિપોર્ટ અનુસાર, ગબાર્ડે શુક્રવારે ઓવલ ઓફિસમાં અમેરિકી રાષ્ટ્રપતિ ડોનાલ્ડ ટ્રમ્પ સાથે મુલાકાત દરમિયાન તેમને પોતાના રાજીનામાની જાણકારી આપી હતી. ગબાર્ડે પોતાના પત્રમાં રાષ્ટ્રપતિ ડોનાલ્ડ ટ્રમ્પનો આભાર પણ માન્યો હતો અને કહ્યું હતું કે નેશનલ ઇન્ટેલિજન્સ ઑફિસનું નેતૃત્વ કરવું તેમના માટે સન્માનની વાત રહી. તુલસીને તેમના નામની કારણે ઘણીવાર ભારતીય મૂળના કહેવામાં આવે છે. જોકે, તેઓ ભારતીય મૂળના નથી. તેઓ પોતે ઘણીવાર આવું કહી ચૂક્યા છે. તુલસીનો જન્મ એક સમોઅન અમેરિકન પરિવારમાં થયો હતો. તેમના પિતા કેથોલિક હતા. માતા પણ ખ્રિસ્તી હતા જેમણે પાછળથી હિંદુ ધર્મ અપનાવ્યો હતો. તુલસી પણ પહેલા ખ્રિસ્તી હતા, પરંતુ પાછળથી તેમણે હિંદુ ધર્મ અપનાવ્યો.