રાજકોટ જિલ્લામાં જિલ્લા ગ્રામ વિકાસ એજન્સી દ્વારા આંતરરાષ્ટ્રીય મહિલા દિનની ઉજવણી કરાઇ

મહિલાઓના ઉત્કર્ષ માટેની સરકારની યોજનાઓનો લાભ લઈ મહિલાઓને આર્થિક રીતે સશકત બનવા જિલ્લા વિકાસ અધિકારી અનીલ રાણાવસીયાનો અનુરોધ

સખીમંડળોને રીવોલ્વીંગ ફંડના ચેક તથા ગ્રામ સંગઠનોને કોમ્યુનિટી ઇન્વેસ્ટમેન્ટ ફંડના ચેકોનું વિતરણ કરાયુ શ્રેષ્ઠ કામગીરી કરનાર મહિલાઓનું થયુ સન્માન

રાજકોટ જિલ્લા ગ્રામ વિકાસ એજન્સી દ્વારા જિલ્લા વિકાસ અધિકારી અનીલ રાણાવસીયાની પ્રેરક ઉપસ્થિતીમાં આંતરરાષ્ટ્રીય મહિલા દિનની ઉજવણી કરવામાં આવી હતી.

જિલ્લા વિકાસ અધિકારી અનીલ રાણાવસીયાએ માતૃ શકિતને વંદન કર્યા બાદ જણાવ્યું હતું કે માનવીનું સર્જન કરનાર મહિલામાં અપાર શકિતઓ છે. વૈદિક કાળમાં ગાર્ગી જેવી મહિલાઓએ તેમજ ભારતની આઝાદીના સમયે પણ અનેક મહિલાઓએ આઝાદી મેળવવા નેતૃત્વ કર્યુ હતું.

રાણાવસીયાએ આજના આધુનિક સમયમાં મહિલાઓના ઉત્કર્ષ માટે સરકાર દ્વારા પણ અનેક સુવિધાઓ – સહાય આપવામાં આવી રહી છે તેમ જણાવી ઉપસ્થિત મહિલાઓને સરકાર ની મહિલા સશક્તિકરણ માટેની યોજનાઓનો લાભ લઈ સ્વાવલંબી બની આર્થિક રીતે સશક્ત બનવા અનુરોધ કર્યો હતો.

આ પ્રસંગે જિલ્લા ગ્રામ વિકાસ એજન્સીના નિયામક જે.કે. પટેલે કહયુ હતું કે, સરકાર દ્વારા મહિલાઓના ઉત્કર્ષ માટે અનેક લાભો આપી રહી છે, ત્યારે બહેનોએ પોતાની શકિત બહાર લાવવાની તક ઝડપી લેવી જોઇએ. કચ્છના પાબીબેન (પાબી બેગ) નું ઉદાહરણ આપી તેમણે ઉમેર્યું હતુ કે, પાબીબેને નાના પાયે શરૂ કરેલુ હુન્નર આજ વિશ્વ સમક્ષ પહોચી શકયુ છે.
પ્રારંભમાં ઉપસ્થિત મહેમાનોએ દીપ પ્રાગ્ટય કરીને સમારોહને ખુલ્લો મૂકયો હતો. આ સમારોહમાં રાજકોટ, પડધરી અને લોધિકા તાલુકામાં કાર્યરત સખીમંડળોને રીવોલ્વીંગ ફંડના ચેક તથા ગ્રામ સંગઠનોને કોમ્યુનિટી ઇન્વેસ્ટમેન્ટ ફંડના ચેકોનું વિતરણ કરાયુ હતું. આ ઉપરાંત સ્વસહાય જુથોને સી.સી. લોન મંજુરી પત્રો, મુખ્યમંત્રી મહિલા ઉત્કર્ષ યોજના અંતર્ગત લોન મંજુરીપત્રો, બેંક સખીઓને નિમણુંક પત્રો અને શ્રેષ્ઠ કામગીરી કરનાર બહેનોનું વિશિષ્ટ સન્માન કરાયુ હતું.

આસી. મેનેજર સરોજબેન મારડીયાએ મહાનુભાવોના શાબ્દિક પ્રવચન બાદ જણાવ્યુ હતું કે આપણે દીકરા-દીકરીમાં ઉછેર-અભ્યાસમાં કોઇ ભેદ ન રાખવો જોઇએ. સખી મંડળની બહેનો ખાખરા અને સિલાઇ મશીન ઉપરાંત મંડપ સર્વિસ, મસાલા ઉધોગ, કેન્ટીન, હસ્તકલાની વસ્તુઓ સહિતની અનેક પ્રવૃતિઓ કરી પગભર બની છે. કેટલીક મહિલાઓ તાલુકા પંચાયતની સભ્યો બની છે તો કેટલીક મહિલાઓ સરપંચ પણ બની છે.

આ પ્રસંગે પડધરીના તાલુકા વિકાસ અધિકારી નૈમેષભાઇ ગણાત્રા તથા સખીમંડળની બહેનો ઉપસ્થિત રહયા હતા. રાજકોટ ઉપરાંત ગોંડલ ટાઉન હોલમાં નાયબ જિલ્લા વિકાસ અધિકારી નિર્ભય ગોંડલીયા અને જેતપુર સ્થિત રોટરી કલબમાં નાયબ જિલ્લા વિકાસ અધિકારી રામદેવસિંહ ગોહિલ તથા જિલ્લા ગ્રામ વિકાસ એજન્સીના જિલ્લા લીવલીહુડ પ્રોજેકટ મેનેજર વી.બી.બસીયા પ્રેરક ઉપસ્થિતમાં આંતરરાષ્ટ્રીય મહિલા દિનની નિમિત્તે ખાસ કાર્યક્રમ યોજાયા હતા. આ પ્રસંગે રૂા.૨૫ લાખથી વધુ રકમના ચેકોનું વિતરણ લાભાર્થી બહેનોને થયા હતા.