જૂનાગઢ જિલ્લાના મેંદરડાના વેપારી એવા ફરિયાદી પ્રતિકભાઈ સવજીભાઈ હિરપરા પટેલને વિશ્વાસમાં લઈ, અલગ અલગ સમયે ઘઉંની ખરીદી કરી, ઘઉંના નીકળતા રૂ. 13,61,952/- વાયદાઓ કરી, નહીં આપી, વિશાવસ ઘાત છેતરપિંડીના ગુન્હામાં આરોપી દીપકભાઈ ઉર્ફ દિલીપભાઈ વલ્લભભાઈ કાળસરિયા પટેલ રહે. હડમતીયા ગીર તા. તાલાલા હાલ રહે. અમદાવાદની ધરપકડ કરી, ત્રણ દિવસના પોલીસ રિમાન્ડ ઉપર મેળવેલ અને પોલીસ રિમાન્ડ પુર્ણ થતા, જેલ હવાલે કરવામાં આવેલ હતો. જે આરોપીનો માંગરોળ પોલીસ દ્વારા ટ્રાન્સફર વોરંટ થી કબજો મેળવી, માંગરોળના છેતરપિંડી વિશ્વાસઘાત ના ગુન્હામાં ધરપકડ કરવામાં આવેલ છે.
જૂનાગઢ રેંજના ડીઆઈજી મનીંદર પ્રતાપ સિંહ પવાર તથા નવા આવેલ જિલ્લા પોલીસ વડા શ્રી રવિ તેજા વાસમ શેટ્ટી દ્વારા માતબર રકમના છેતરપિંડીના ગુન્હામાં પકડાયેલ આરોપીની ઊંડાણપૂર્વક પૂછપરછ કરી, આ ગુન્હામાં સંડોવાયેલ આરોપી વિરુદ્ધ અન્ય ગુન્હાઓ બાબતે પણ ઊંડાણપૂર્વક તપાસ કરવા સુચનાઓ કરવામાં આવેલ છે.
- Advertisement -
જૂનાગઢ ડિવિઝનના ડીવાયએસપી પ્રદીપસિંહ જાડેજાના માર્ગદર્શન હેઠળ મેંદરડા પોલીસ સ્ટેશનના પીએસઆઇ કે.એમ.મોરી, સહિતના સ્ટાફની ટીમ દ્વારા આરોપી દીપકભાઈ ઉર્ફ દિલીપભાઈ વલ્લભભાઈ કાળસરિયા પટેલ રહે. હડમતીયા ગીર તા. તાલાલા હાલ રહે. અમદાવાદની સઘન પૂછપરછ કરવામાં આવતા, આરોપી ભૂતકાળમાં સને 2012 થી આજદિન સુધી અમદાવાદ, રાજકોટ, ગોંડલ, મોરબી, ટંકારા, જૂનાગઢ, સહિતની કોર્ટમાં નેગોશિયબલ ઇન્સ્ટ્રુમેન્ટ એક્ટ 138ની 16 જેટલી ફરિયાદો દાખલ થયેલ છે. જેમાં તે હાજર રહેતો નહીં હોય, ઉપરોકત નામદાર કોર્ટ દ્વારા પકડ વોરંટ ઇસ્યુ થયાની શક્યતા આધારે જિલ્લાના તથા બહારના રાજ્યમાં આરોપીની મોડ્સ ઓપરેન્ડી બાબતે જાણ કરવામાં આવેલ હતી. જેના આધારે મધ્યપ્રદેશના જાબુંઆ પોલીસ સ્ટેશન ખાતે પણ છેતરપીંડી વિશ્વાસઘાત નો ગુન્હો નોંધાયેલ હોઈ, મધ્યપ્રદેશ પોલીસ દ્વારા પણ ટ્રાન્સફર વોરન્ટ મેળવી, આરોપીનો કબજો મેળવવા તજવીજ હાથ ધરેલ છે. પકડાયેલ આરોપી વિરુદ્ધમાં હજુ પણ ઘણા ગુન્હાઓ ખુલવાની શક્યતા છે.
પકડાયેલ આરોપી દિલીપભાઈ વલ્લભભાઈ પટેલનો હાલ તો, માંગરોળ પોલીસ દ્વારા કબજો મેળવી, ધરપકડ કરવામાં આવેલ છે. ત્યારબાદ મધ્યપ્રદેશ પોલીસ દ્વારા કબજો મેળવવામાં આવશે. વધુ તપાસ માંગરોળ પોલીસ સ્ટેશનના પીએસઆઇ બી.કે.ચાવડા તથા સ્ટાફ દ્વારા હાથ ધરવામાં આવેલ છે.
