વજુભાઈ એટલે રાજકોટ અને રાજપૂત સમાજનું ગૌરવ

સૌનાં વ્હાલા વજુભાઈ વાળાનાં 85માં જન્મદિવસ નિમિત્તે ડૉ.બટુકભાઈ પરસાણા તથા માવજીભાઈ ડોડીયા દ્વારા શબ્દશુભેચ્છા

રાજકોટ અને રાજપૂત સમાજનું ગૌરવ વજુભાઈ વાળાના 85માં જન્મદિવસ નિમિત્તે તેમના વર્ષો જૂના સાથી-સ્નેહી ડો. બટુકભાઈ પરસાણા તથા માવજીભાઈ ડોડીયા દ્વારા વજુભાઈને શબ્દશુભેચ્છા પાઠવવામાં આવી છે. વજુભાઈ વાળાને જન્મદિવસ નિમિત્તે શુભેચ્છા આપતા ડો. બટુકભાઈ પરસાણા અને માવજીભાઈ ડોડીયાએ જણાવ્યું હતું કે, રાષ્ટ્રીય સ્વયંસેવક સંઘનાં કાર્યકર અને ભાજપ અગ્રણી નેતા વજુભાઈ વાળાએ 1960નાં દાયકામાં જનસંઘ સાથે જોડાઈ પોતાની રાજકીય કારકિર્દીની શરૂઆત કરી હતી. 1980માં રાજકોટ મહાનગર પાલિકાનું મેયર પદ મેળવ્યું હતું. 1985માં રાજકોટ પશ્ચિમની બેઠક ચૂંટણી જીતી વિધાનસભામાં પ્રવેશ કર્યો હતો તો 1996માં ગુજરાત ભાજપના પ્રદેશ પ્રમુખ તરીકેની પણ જવાબદારી ઉઠાવી હતી. રાજકોટ પશ્ર્ચિમ બેઠકને ભાજપનો ‘અજય ગઢ’ બનાવી વર્ષે 2001માં નરેન્દ્ર મોદી ને પ્રથમ વખત વિધાનસભામાં મોકલ્યા હતા. 2005-06માં વજુભાઈ વાળા એ બીજી વખત પ્રદેશ ભાજપનું પ્રમુખ પદ મેળવ્યું હતું.

વજુભાઈ વાળા 8 વાર ગુજરાત વિધાનસભા ચૂંટણી જીત્યા હતા અને 18 વાર ગુજરાતનું બજેટ રજૂ હતું. વર્ષે 1995થી 2012 સુધી તેઓ ભાજપની સરકારમાં નાણામંત્રી પદે રહ્યા હતા. વિદ્યાર્થીકાળથી જ રાષ્ટ્રીય સ્વયંસેવક સંઘ સાથે ઘનિષ્ઠપણે જોડાયેલા વજુભાઈ વાળાએ ગુજરાતમાં ભાજપના સંગઠનને મજબૂત બનાવવામાં મહત્ત્વનું યોગદાન આપ્યું છે. સંઘના અનુભવને સાથે રાખી તેઓ બે વખત ભાજપના પ્રદેશ પ્રમુખ પણ રહી ચૂક્યા છે. તેમણે કર્ણાટક રાજ્યના રાજ્યપાલની જવાબદારી પણ સુપેરે નિભાવી છે.