રાજકોટમાં જન્માષ્ટમી પર્વ પર ભવ્ય મટકી ફોડ સ્પર્ધાનું આયોજન

ચૌધરી હાઇસ્કૂલ ગ્રાઉન્ડ ખાતે ૪ સપ્ટેમ્બરે રાત્રે ૮થી ૧૧ વાગ્યા સુધી યોજાશે રંગારંગ કાર્યક્રમ

શ્રેષ્ઠ પ્રદર્શન કરનાર મંડળીઓને પ્રોત્સાહિત કરવા આકર્ષક રોકડ ઇનામોની જાહેરાત

રાજકોટ શહેરની સાંસ્કૃતિક, ધાર્મિક અને ઉત્સવપ્રિય પરંપરાને વધુ ભવ્ય રીતે ઉજાગર કરવા માટે રાજકોટ મહાનગરપાલિકા દ્વારા જન્માષ્ટમીના પાવન પર્વ નિમિત્તે ભવ્ય “મટકી ફોડ” સ્પર્ધાનું આયોજન કરવામાં આવ્યું છે.
ભગવાન શ્રીકૃષ્ણના જન્મોત્સવને ઉત્સાહ, ઉમંગ અને ભક્તિભાવ સાથે ઉજવવાના હેતુથી યોજાનારા આ કાર્યક્રમમાં શહેરની વિવિધ મટકી ફોડ મંડળીઓ મોટી સંખ્યામાં જોડાય તે માટે મહાનગરપાલિકા દ્વારા આહ્વાન કરવામાં
આવ્યું છે. મેયર ડૉ. નેહલ શુક્લ, ડેપ્યુટી મેયર દક્ષાબેન વસાણી, સ્ટેન્ડિંગ કમિટી ચેરમેન પરેશભાઈ પીપળીયા, મ્યુનિસિપલ કમિશનર તુષાર સુમેરા, શાસક પક્ષ નેતા ડૉ. હિરેનભાઈ ખીમાણિયા, શાસક પક્ષ દંડક સંજયસિંહ રાણા
અને સમાજ કલ્યાણ સમિતિ ચેરમેન મનીષભાઈ ભટ્ટે જણાવ્યું છે કે રાજકોટની ઉત્સવપ્રિય પરંપરાને વધુ જીવંત અને ભવ્ય બનાવવા માટે આ વિશેષ આયોજન કરવામાં આવ્યું છે.

ભવ્ય મટકી ફોડ સ્પર્ધા ૪ સપ્ટેમ્બર, ૨૦૨૬, શુક્રવારના રોજ રાત્રે ૮થી ૧૧ વાગ્યા સુધી ચૌધરી હાઇસ્કૂલ ગ્રાઉન્ડ ખાતે યોજાશે. કાર્યક્રમમાં પરંપરા, ભક્તિ, સંગીત, સાહસ અને મનોરંજનનો અનોખો સંગમ જોવા મળશે. મટકી
ફોડની રોમાંચક સ્પર્ધા નિહાળવા માટે મોટી સંખ્યામાં શહેરીજનો ઉમટી પડશે. મટકી ફોડ કાર્યક્રમનું મુખ્ય આકર્ષણ વિશેષ તાલીમબદ્ધ સ્પેશિયલાઇઝ્ડ પિરામિડ મંડળી (ગોવિંદા ગ્રુપ)ની રોમાંચક રજૂઆત રહેશે. ગોવિંદા ગ્રુપ દ્વારા
ઊંચા પિરામિડ રચીને મટકી ફોડવાની પરંપરાગત રમતનું સાહસિક પ્રદર્શન કરવામાં આવશે. આ દરમિયાન મંડળીના સભ્યો વચ્ચેનું ટીમવર્ક, શારીરિક કૌશલ્ય અને અદમ્ય ઉત્સાહ દર્શકોમાં રોમાંચ જગાવશે.

જન્માષ્ટમીના પાવન પર્વને અનુરૂપ કાર્યક્રમ સ્થળે ડી.જે. દ્વારા ભગવાન શ્રીકૃષ્ણની ભક્તિના લોકપ્રિય ગીતો અને સંગીતની ધૂન રજૂ કરવામાં આવશે. ભક્તિ અને ઉત્સવના સંગમથી સમગ્ર વાતાવરણ કૃષ્ણમય બનશે. આ
ઉપરાંત ચૌધરી હાઇસ્કૂલ ગ્રાઉન્ડ ખાતે ભવ્ય લાઇટિંગ, આકર્ષક શોભાસજ્જા અને રંગબેરંગી સજાવટ કરવામાં આવશે. જેના કારણે સમગ્ર સ્થળ પર જન્માષ્ટમીના પર્વની ભવ્યતા અને ઉત્સવનો માહોલ જોવા મળશે.

વિજેતા મંડળીઓ માટે લાખોના રોકડ ઇનામ
પ્રથમ ઇનામ : રૂ. ૧,૫૦,૦૦૦
દ્વિતીય ઇનામ : રૂ. ૧,૨૧,૦૦૦
તૃતીય ઇનામ : રૂ. ૧,૦૧,૦૦૦

મંડળીઓ માટે વિનામૂલ્યે નોંધણીની સુવિધા
સ્પર્ધામાં ભાગ લેવા ઇચ્છુક મટકી ફોડ મંડળીઓ માટે રાજકોટ મહાનગરપાલિકા દ્વારા વિનામૂલ્યે ઓનલાઈન તેમજ ઓફલાઈન નોંધણીની સુવિધા ઉપલબ્ધ કરાવવામાં આવી છે. મહાનગરપાલિકાએ શહેરની વિવિધ મંડળીઓને
વધુમાં વધુ સંખ્યામાં નોંધણી કરાવી આ ભવ્ય સ્પર્ધામાં જોડાવા અનુરોધ કર્યો છે. ઓનલાઈન નોંધણી માટે રાજકોટ મહાનગરપાલિકાની વેબસાઇટ [www.rmc.gov.in](http://www.rmc.gov.in) પર જઈને ફોર્મ ભરીને સબમિટ કરી શકાશે. આ ઉપરાંત ઓફલાઈન નોંધણી માટે રાજકોટ મહાનગરપાલિકા, ડૉ. આંબેડકર ભવન, સાંસ્કૃતિક વિકાસ વિભાગ, રૂમ નં. ૫, ત્રીજો માળ, ઢેબરભાઈ રોડ, રાજકોટ ખાતે ફોર્મ ભરીને સબમિટ કરી શકાશે.