હિરાસર એરપોર્ટ આસપાસ ટ્રાફિક પોલીસની તોડલીલા

એરપોર્ટમાંથી નીકળતાં અને અમદાવાદ તરફથી આવતાં વાહનોનું ગેરકાયદે ચેકિંગ
ટ્રાફિક વૉર્ડનને આખી ગાડી-બેગ વગેરે ચેક કરવાની સત્તા કોણે આપી?
લોકોની કનડગત દૂર કરવા ઊચ્ચ અધિકારીઓ ધ્યાન આપે તે જરૂરી

ખાસ-ખબર ન્યૂઝ રાજકોટ

રાજકોટના હિરાસર ઈન્ટરનેશનલ એરપોર્ટની બહાર નેશનલ હાઇવે પર ટ્રાફિક પોલીસના જવાનો દ્વારા બેફામ ઉપાડી લૂંટ ચલાવવામાં આવી રહી હોવાની વ્યાપક કરિયાદો ઉઠી છે. કાયદાકીય રીતે ટ્રાફિક પોલીસ પાસે રાહદારીઓ કે વાહનચાલકોના સામાનની ચેકિંગ કરવાની કોઈ સત્તા ન હોવા છતાં એરપોર્ટ પરથી બહાર નીકળતા નિર્દોષ પેસેન્જરોને ટાર્ગેટ કરીને મોટો તોડ કરવામાં આવતો હોવાનો સનસનાટીભર્યો આક્ષેપ થયો છે.

મળતી માહિતી મુજબ, હિરાસર એરપોર્ટ પર કલાઈટ પકડીને આવતા દેશ-વિદેશના પ્રવાસીઓ જ્યારે બહાર નીકળીને હાઇવે તરફ આગળ વધે છે ત્યારે ટ્રાફિક જવાનો તેમની પાછળ પડી જાય છે. કાયદા મુજબ ટ્રાફિક પોલીસનું મુખ્ય કામ ટ્રાફિક નિયમન કરવાનું અને વાહનચાલકોના દસ્તાવેજો ચકાસવાનું છે. પરંતુ અહીં નિયમોને નેવે મૂકીને માત્ર એરપોર્ટ બહાર નીકળતા અને અમદાવાદ તરફ જતા-આવતા મુસાફરોને માલ-સામાન સાથે અટકાવવામાં આવે છે અને તેમની બેગ તેમજ માલ-સામાનનું ચેકીંગ કરવામાં આવે છે. એરપોર્ટ જેવા સંવેદનશીલ અને પ્રતિષ્ઠિત વિસ્તારની બહાર જ હાઈવે પર ટ્રાફિક પોલીસ દ્વારા થતી આ પ્રકારની લૂંટના કારણે રાજકોટ અને સૌરાષ્ટ્રની છબી ખરડાઈ રહી છે. પ્રવાસીઓમાં ભારે ફકડાટનો માહોલ છે. જાગૃત નાગરિકો માંગ કરી રહ્યા છે કે આ વિસ્તારના સીસીટીવી કેમેરા ચેક કરવામાં આવે અને ખાનગી ડ્રેસમાં ઉચ્ચ અધિકારીઓ તપાસ કરે તો આખું કોભાંડ પકડાઈ શકે તેમ છે. હવે જોવાનું એ રહેશે કે રાજકોટ પોલીસ કમિશનર અને ઉચ્ચ અધિકારીઓ આ મામલે ટ્રાફિક પોલીસના ભ્રષ્ટ જવાનો સામે કેવા કડક પગલાં ભરે છે.

કેવી રીતે થાય છે તોડબાજી?
મુસાફરોનો આક્ષેપ છે એરપોર્ટ નજીક પુલનું કામ ચાલું છે ત્યાં આગળ ટ્રાફિક નિયમન માટે ઉભા રાખવામાં આવેલા ટ્રાફિક જવાનો કાયદાનો ડર બતાવીને પેસેન્જરોના સામાનની તલાશી લેવા માંડે છે. વિદેશથી કે અન્ય રાજયોમાંથી આવતા પેસેન્જરસે પાસે કોઈ નાની-મોટી વસ્તુ કે કાગળોની ખામી શોધીને તેમને કેસ કરવાની અથવા પોલીસ સ્ટેશને લઈ જવાની ધમકી આપવામાં આવે છે. લાંબી મુસાફરી કરીને થાકેલા પેસેન્જરો કાયદાકીય કનડગતથી બચવા માટે પોલીસ સાથે રકઝક કરવાને બદલે શરણે થઈ જાય છે. આ પરિસ્થિતિનો લાભ ઉઠાવીને ટ્રાફિક જવાનો સ્થળ પર જ પતાવટ કરવા માટે હજારો રૂપિયાનો મસમોટો તોડ કરે છે. ઉલ્લેખનીય છે કે, ટ્રાફિક પોલીસ પાસે રાહદારીઓનું વ્યક્તિગત ચેકિંગ કરવાની કોઈ કાનૂની સત્તા નથી. તેમ છતાં એરપોર્ટ બહાર ખુલ્લેઆમ થઈ રહેલી આ પ્રવૃત્તિ પોલીસ તંત્રની છબી ખરડી રહી છે.