યુનિવર્સિટી રોડ પર વૃક્ષ ધરાશાયી, ૭ વાહન દબાયા
રાજકોટ શહેરમાં આજે સવારે ૧૦:30 વાગ્યે અચાનક જ વાતાવરણમાં ભારે પલટો જોવા મળ્યો છે. અસહ્ય ગરમી અને બફારા વચ્ચે આકાશ કાળાડિબાંગ વાદળોથી ઘેરાઈ ગયું હતું અને પવન સાથે ધોધમાર વરસાદ શરૂ થઇ ગયો હતો. લાંબા વિરામ બાદ અચાનક ત્રાટકેલા આ વરસાદના કારણે સમગ્ર રાજકોટના માર્ગો ગણતરીની મિનિટોમાં જ પાણી-પાણી થઈ ગયા હતા. રસ્તાઓ ભીંજાઈ જતાં વાતાવરણમાં ઠંડક પ્રસરી હતી. શહેરમાં ફૂંકાયેલા ભારે પવન અને જોરદાર વરસાદી ઝાપટાના કારણે રસ્તાઓ પર પાણી ભરાઈ જતા વાહનચાલકો ભારે પરેશાન થયો હતા.
- Advertisement -
પવનની સૌથી માઠી અસર શહેરના વ્યસ્ત ગણાતા યુનિવર્સિટી રોડ પર જોવા મળી હતી. ભારે પવનના કારણે યુનિવર્સિટી રોડ પર આવેલું એક વિશાળ અને ઘટાદાર વૃક્ષ અચાનક રસ્તા પર ધરાશાયી થઇ ગયું હતું. આ વૃક્ષ રસ્તાની બાજુમાં પાર્ક કરેલા વાહનો પર પડતા મોટો અકસ્માત સર્જાયો હતો. વૃક્ષ તૂટી પડવાના કારણે તેની નીચે અંદાજે ૬ થી ૭ જેટલા વાહનો દબાઈ ગયા હતા અને વાહનોને નોંધપાત્ર નુકસાન પહોંચ્યું હતું.
જો કે, આ સમગ્ર ઘટનામાં સૌથી મોટા રાહતના સમાચાર એ છે કે કોઈ જાનહાનિ નોંધાઈ નથી. ઘટનાસ્થળે લોકોની ભારે અવરજવર અને હાજરી હોવા છતાં, સદનસીબે જે સમયે વૃક્ષ ધરાશાયી થયું તે સમયે તેની બરાબર નીચે કોઈ વ્યક્તિ હાજર ન હતી. વાહનોમાં થોડું નુકસાન થયું છે પરંતુ તમામ નાગરિકો સુરક્ષિત હોવાથી તંત્ર અને સ્થાનિક લોકોએ રાહતનો શ્વાસ લીધો છે. ઘટનાની જાણ થતાં જ કાયર બ્રિગેડ અને મનપાની ટીમ ઘટનાસ્થળે દોડી ગઈ હતી અને રસ્તા પરથી વૃક્ષ હટાવી વાહન વ્યવહાર પૂર્વવત કરવાની કામગીરી તાત્કાલિક હાથ ધરી હતી.
