UAE Lotteryના Lucky Day ડ્રોમાં 30 મિલિયન દિરહમ જીત્યા, પત્ની-દીકરીના જન્મતારીખની લોટરી ટિકિટ ખરીદેલી
UAEમાં રહેતા એક ભારતીય ટેક્નિશિયનનું નસીબ એવી રીતે બદલાયું કે હવે તેઓ કરોડપતિ બની ગયા છે. કેરળના રહેવાસી સુનીલ કુમાર સદાશિવને UAE Lotteryના Lucky Day ડ્રોમાં 30 મિલિયન દિરહમ એટલે કે અંદાજે 78 કરોડ રૂપિયાનો બીજો ગ્રાન્ડ પ્રાઇઝ જીત્યો છે. સૌથી રસપ્રદ વાત એ છે કે તેમણે ટિકિટ માટે કોઈ રેન્ડમ નંબર પસંદ કર્યા નહોતા, પરંતુ પોતાની પત્ની અને દીકરીની જન્મતારીખના આંકડાઓનો ઉપયોગ કર્યો હતો. આ જ નંબર તેમની જિંદગીનો સૌથી મોટો જૅકપોટ સાબિત થયો.
- Advertisement -
52 વર્ષીય સુનીલ કુમાર UAEમાં મેન્ટેનન્સ ટેક્નિશિયન તરીકે કામ કરે છે. મીડિયા સાથે વાતચીત દરમિયાન તેમણે જણાવ્યું કે ટિકિટ ખરીદતી વખતે તેમણે કોઈ કમ્પ્યુટર જનરેટેડ અથવા રેન્ડમ નંબર પસંદ કર્યા નહોતા. તેના બદલે તેમણે પોતાની દીકરી અને પત્નીની જન્મતારીખને આધારે નંબર પસંદ કર્યા હતા. સુનીલે જણાવ્યું કે આ તારીખો તેમના માટે માત્ર આંકડા નહોતા, પરંતુ જીવનની સૌથી કિંમતી યાદો સાથે જોડાયેલી હતી. તેમને લાગ્યું કે જે તારીખોએ તેમના જીવનમાં સૌથી વધુ ખુશી આપી છે, તે જ કદાચ તેમના માટે નસીબદાર પણ સાબિત થઈ શકે. આખરે તેમનો આ વિશ્વાસ સાચો પડ્યો અને તેઓ કરોડોની લોટરી જીતવામાં સફળ રહ્યા.
સુનીલે જણાવ્યું કે, તેમણે આ ટિકિટ પોતાના એક મિત્ર સાથે મળીને ખરીદી હતી. તેઓ તાજેતરમાં જ UAE Lotteryમાં ભાગ લેવાનું શરૂ કર્યું હતું. પ્રથમ વખત ખરીદેલી ટિકિટ પર તેમને માત્ર 100 દિરહમનું ઇનામ મળ્યું હતું. આ નાની જીતથી પ્રોત્સાહિત થઈ તેમણે ફરી એક ટિકિટ ખરીદી અને આ વખતે સીધો 30 મિલિયન દિરહમનો જૅકપોટ જીતી લીધો. તેમણે કહ્યું કે, ક્યારેય કલ્પના પણ નહોતી કે થોડા દિવસો પહેલાં મળેલું નાનું ઇનામ તેમની જિંદગીમાં આટલો મોટો ફેરફાર લાવશે.
દીકરીના જન્મ પાછળ છુપાયેલી સંઘર્ષની લાંબી કહાની
- Advertisement -
સુનીલ માટે તેમની દીકરીની જન્મતારીખ માત્ર એક તારીખ નથી પરંતુ વર્ષો સુધી કરેલા સંઘર્ષ અને આશાનું પ્રતિક છે. તેમણે જણાવ્યું કે, તેમની દીકરીનો જન્મ લગભગ 12 વર્ષ સુધી સંતાન માટે કરેલા પ્રયાસો અને મોંઘી ફર્ટિલિટી સારવાર બાદ થયો હતો. આ લાંબી સારવાર દરમિયાન પરિવારે આર્થિક મુશ્કેલીઓનો પણ સામનો કર્યો હતો. તેથી દીકરીના જન્મ સાથે જોડાયેલી દરેક યાદ તેમના માટે અત્યંત ખાસ છે. આ જ કારણથી તેમણે લોટરી માટે એ તારીખોને પસંદ કરી હતી. સુનીલે ભાવુક બનીને કહ્યું કે, જો તેમની દીકરી આ સમાચાર જોઈ રહી હોય તો તે જાણે કે તેના માતા-પિતાએ તેના માટે કેટલો લાંબો સંઘર્ષ કર્યો છે. તેમનું સૌથી મોટું સ્વપ્ન પોતાની દીકરીને શ્રેષ્ઠ શિક્ષણ આપવાનું અને તેને ડોક્ટર બનતી જોવાનું છે.
સૌપ્રથમ જીતના સમાચાર પર થયો નહતો વિશ્વાસ
સુનીલે જણાવ્યું કે, જ્યારે તેઓ કામ પૂર્ણ કરીને ઘરે પહોંચ્યા ત્યારે રાત્રે લગભગ 9:45 વાગ્યે તેમણે મોબાઇલમાં લોટરીનું પરિણામ તપાસ્યું. શરૂઆતમાં તેમને લાગ્યું કે કદાચ ફરી કોઈ નાનું ઇનામ મળ્યું હશે. પરંતુ જ્યારે તેમણે જીતેલા નંબર જોયા ત્યારે તેઓ સંપૂર્ણપણે આશ્ચર્યચકિત થઈ ગયા. પોતાની આંખો પર વિશ્વાસ ન આવતા તેમણે સૌથી પહેલાં પોતાના મિત્રને ટિકિટ બતાવી અને ત્યારબાદ પત્નીને ફોન કરીને આ ખુશખબર આપી. તેમણે કહ્યું કે, જીવનમાં આવી ક્ષણો વારંવાર આવતી નથી અને આ સમાચાર સાંભળ્યા બાદ થોડા સમય સુધી તેઓ કંઈ બોલી પણ શક્યા નહોતા.
હવે શું કરશે 78 કરોડ રૂપિયાનું ઇનામ?
સુનીલે જણાવ્યું કે, તેઓ કરોડો રૂપિયા જીત્યા હોવા છતાં વૈભવી જીવન જીવવાની કોઈ ખાસ યોજના નથી. સૌથી પહેલાં તેઓ પોતાની દીકરી માટે એક ખાસ ભેટ ખરીદશે. તેમણે કહ્યું કે તેમની પત્નીની પણ કોઈ મોટી ઈચ્છા નથી. બંને હંમેશા સાદું જીવન જીવવામાં માને છે. તેઓ માને છે કે, ભગવાને આપેલી આ ખુશીનો ઉપયોગ પરિવારના ભવિષ્યને સુરક્ષિત બનાવવા ઉપરાંત જરૂરિયાતમંદ લોકોને મદદ કરવા માટે પણ કરવો જોઈએ. સુનીલે કહ્યું કે, પૈસા જીવનમાં ઘણી સુવિધાઓ આપી શકે છે પરંતુ પરિવારનું સુખ અને સાદગી જ તેમની સૌથી મોટી સંપત્તિ છે.
UAE Lottery શું છે?
UAE Lottery સંયુક્ત આરબ અમીરાતમાં કાયદેસર રીતે સંચાલિત લોટરી યોજનાઓમાંની એક છે, જેમાં વિવિધ કેટેગરીમાં રોકડ ઇનામો આપવામાં આવે છે. તેમાં સ્થાનિક નાગરિકો ઉપરાંત વિવિધ દેશોમાંથી UAEમાં રહેતા લોકો પણ ભાગ લઈ શકે છે. દર ડ્રોમાં લાખો દિરહમના ઇનામો જાહેર કરવામાં આવે છે અને અનેક ભારતીયો પણ સમયાંતરે મોટી જીત નોંધાવી ચૂક્યા છે.
