મિકેલ મેરિનોના નિર્ણાયક ગોલથી સ્પેનનો 1-0 થી ઐતિહાસિક વિજય : રોનાલ્ડોનું વિશ્વકપ જીતવાનું સપનું રોળાયું

અમેરિકાને 4-1 થી કચડીને ક્વાર્ટર ફાઇનલમાં પહોંચ્યું બેલ્જિયમ

ફિફા વિશ્વ કપ 2026 ના રાઉન્ડ ઓફ 16 ના એક અત્યંત રોમાંચક અને ભાવુક કરી દેનારા મુકાબલામાં સ્પેને છેલ્લી ઘડીએ ગોલ ફટકારીને પુર્તગાલને 1-0 થી હરાવી દીધું છે. આ હારની સાથે જ ફૂટબોલ જગતનાં મહાન ખેલાડી ક્રિસ્ટિયાનો રોનાલ્ડોની ટીમ પુર્તગાલની સફર આ વિશ્વકપમાં સમાપ્ત થઈ ગઈ છે. સ્પેને ક્વાર્ટર ફાઇનલમાં પ્રવેશ કરી લીધો છે. મેચનો એકમાત્ર અને નિર્ણાયક ગોલ ઇન્જરી ટાઇમમાં સ્પેનના મિકેલ મેરિનોએ કર્યો હતો, જેના કારણે 41 વર્ષીય રોનાલ્ડોનું પોતાનાં કરિયરના અંતિમ વિશ્વકપમાં ટ્રોફી ઉઠાવવાનું સપનું અધૂં રહી ગયું અને મેચ બાદ તે મેદાન પર જ ભાવુક થયેલો જોવા મળ્યો હતો. ડલાસના મેદાન પર રમાયેલા આ મેચનાં પ્રથમ હાફમાં બંને ટીમોએ ગોલ કરવા માટે ઘણી મહેનત કરી હતી અને કેટલાક સારા મોકા પણ બનાવ્યાં હતાં, પરંતુ કોઈને સફળતા મળી ન હતી. સ્પેન તરફથી મિકેલ ઓયારઝાબાલ પાસે ટીમને લીડ અપાવવાની શાનદાર તક હતી, પરંતુ તેનો શોટ ટાર્ગેટથી બહાર રહી ગયો હતો. બીજી તરફ, પુર્તગાલના ગોલકીપર ડિઓગો કોસ્ટાએ એલેક્સ બેનાના એક અદભુત કર્વિંગ શોટનો શાનદાર બચાવ કરીને પુર્તગાલને શરૂઆતમાં જ પાછળ પડતાં બચાવી લીધું હતું.

બીજા હાફમાં પણ બંને ટીમોની ડિફેન્સ લાઇન અત્યંત મજબૂત રહી હતી. પુર્તગાલના કેપ્ટન ક્રિસ્ટિયાનો રોનાલ્ડોએ કેટલાક શાનદાર આક્રમણો કર્યા હતાં, જ્યારે નૂનો મેન્ડેસનો એક શોટ સ્પેનના ડિફેન્ડર સાથે અથડાઈને સીધો ક્રોસબાર સાથે ટકરાઈને પાછો ફર્યો હતો. જ્યારે એવું લાગી રહ્યું હતું કે, આ મેચ હવે એક્સ્ટ્રા ટાઇમમાં જશે, બરાબર ત્યારે જ 91મી મિનિટે સ્પેનના બે સબ્સ્ટિટ્યુટ ખેલાડીઓએ કમાલ કરી બતાવી. ફેરાન ટોરેસના એક શાનદાર પાસ પર મિકેલ મેરિનોએ અદભુત ફિનિશિંગ સાથે ગોલ કરીને સ્પેનને 1-0 ની નિર્ણાયક લીડ અપાવી દીધી હતી.

આ હાર સાથે જ ફૂટબોલના મહાનતમ ખેલાડીઓમાંના એક એવાં ક્રિસ્ટિયાનો રોનાલ્ડોના વર્લ્ડ કપ કરિયરનો અંત આવી ગયો છે. મેચ પહેલાં જ રોનાલ્ડોએ સ્પષ્ટ કર્યું હતું કે આ તેનાં કરિયરનો છેલ્લો ફિફા વર્લ્ડ કપ હશે. તેણે પોતાનાં શાનદાર વિશ્વકપ કરિયરમાં કુલ 27 મેચો રમીને 11 ગોલ નોંધાવ્યા છે. આ સાથે જ તે સતત છ અલગ-અલગ વર્લ્ડ કપ એડિશનમાં ગોલ કરનારો દુનિયાનો સર્વપ્રથમ પુરુષ ફૂટબોલર બનવાનો ઐતિહાસિક રેકોર્ડ પોતાનાં નામે રાખીને વિદાય થયો છે. આ શાનદાર જીતની સાથે સ્પેનની ટીમે વિશ્વકપના ઇતિહાસમાં એક અભૂતપૂર્વ રેકોર્ડ પોતાનાં નામે કર્યો છે. સ્પેન હવે વર્લ્ડ કપના ઇતિહાસમાં સતત છ મેચોમાં ‘ક્લીન શીટ’ (એટલે કે વિરોધી ટીમને એક પણ ગોલ ન કરવા દેવો) રાખનારી વિશ્વની પહેલી ટીમ બની ગઈ છે. હવે ક્વાર્ટર ફાઇનલમાં સ્પેનનો સામનો બેલ્જિયમ સામે થશે, જેણે બીજા એક હાઈ-સ્કોરિંગ મુકાબલામાં અમેરિકાને 4-1 થી શરમજનક પરાજય આપીને ક્વાર્ટર ફાઇનલમાં પોતાની જગ્યા પાકી કરી લીધી છે.

બેલ્જિયમે અમેરિકાને 4-1 થી હરાવી ક્વાર્ટર ફાઇનલમાં પ્રવેશ કર્યો
ફિફા વિશ્વ કપ 2026 ના રાઉન્ડ ઓફ 16ના અન્ય એક મેચમાં બેલ્જિયમે અદભુત પ્રદર્શન કરતાં સહ-યજમાન અમેરિકાને 4-1 થી કારમો પરાજય આપીને ક્વાર્ટર ફાઇનલમાં પોતાની જગ્યા પાકી કરી લીધી છે. સિયેટલ સ્ટેડિયમ ખાતે રમાયેલા આ હાઈ-સ્કોરિંગ મુકાબલામાં બેલ્જિયમના ‘રેડ ડેવિલ્સ’ શરૂઆતથી જ યજમાન ટીમ પર હાવી રહ્યાં હતાં, જેમાં મેચની 9મી મિનિટે જ ચાલ્ર્સ ડી કેટેલારેએ ગોલ કરીને ટીમને 1-0 ની લીડ અપાવી દીધી હતી. જો કે, 31મી મિનિટે અમેરિકાનાં મલિક ટિલમેને એક ડિફ્લેક્ટેડ ગોલની મદદથી સ્કોર 1-1 ની બરાબરી પર લાવી દીધો હતો, પરંતુ અમેરિકાની આ ખુશી માત્ર બે જ મિનિટ ટકી શકી હતી કારણ કે 33મી મિનિટે કેટેલારેએ પોતાનો બીજો વ્યક્તિગત ગોલ ફટકરાવીને બેલ્જિયમને ફરી 2-1 થી આગળ કરી દીધું હતું. મેચના બીજા હાફમાં પણ બેલ્જિયમનો દબદબો યથાવત રહ્યો હતો અને અમેરિકાની ટીમને વાપસીની કોઈ તક મળી ન હતી. 57મી મિનિટે હાંસ વનાકેને ત્રીજો ગોલ કરીને અમેરિકાની આશાઓ લગભગ ખતમ કરી દીધી હતી અને અંતે ઇન્જરી ટાઇમમાં (90+3 મિનિટે) સ્ટાર સ્ટ્રાઇકર રોમેલુ લુકાકુએ ચોથો ગોલ કરી બેલ્જિયમની 4-1 થી ભવ્ય જીત પર આખરી મહોર મારી દીધી હતી. આ હાર સાથે સહ-યજમાન અમેરિકાની ટૂર્નામેન્ટમાં સફર સમાપ્ત થઈ ગઈ છે. હવે ક્વાર્ટર ફાઇનલમાં બેલ્જિયમનો સામનો સ્પેન સામે થશે.