વર્ષ ૨૦૪૭ સુધીમાં ગુજરાતનું અર્થતંત્ર ૩.૫ ટ્રિલિયન ડૉલર પહોંચાડવાનું લક્ષ્ય

રાજ્ય સરકારે ગુજરાત ઔદ્યોગિક નીતિ–૨૦૨૬ની જાહેરાત કરી
ઉદ્યોગોને ૧૫થી ૪૫ ટકા સુધી પ્રોત્સાહન, મહિલા સાહસિકો, સૂક્ષ્મ-લઘુ-મધ્યમ ઉદ્યોગો અને યુવા ઉદ્યોગકારો માટે વિશેષ જોગવાઈઓ
રોકાણ, સંશોધન, નવીનતા, રોજગાર અને વિકાસને કેન્દ્રમાં રાખી નવી ઔદ્યોગિક નીતિનો અમલ કરાશે
દેશના કુલ ઉત્પાદન ક્ષેત્રમાં ગુજરાતનો ૧૮ ટકા ફાળો, જ્યારે ૪૦ ટકા માલવહન વ્યવહાર અને ૩૩ ટકા નિકાસ ગુજરાતમાંથી થાય છે : હર્ષ સંઘવી

ખાસ ખબર ન્યૂઝ ગાંધીનગર

ગુજરાતને વર્ષ ૨૦૪૭ સુધી ૩.૫ ટ્રિલિયન અમેરિકન ડૉલરના અર્થતંત્ર તરીકે વિકસાવવાના લક્ષ્યને વેગ આપવા રાજ્ય સરકારે ગુજરાત ઔદ્યોગિક નીતિ–૨૦૨૬ની જાહેરાત કરી છે. ગાંધીનગર સ્થિત મહાત્મા મંદિરમાં મુખ્યમંત્રી ભૂપેન્દ્ર પટેલ અને નાયબ મુખ્યમંત્રી હર્ષ સંઘવીની ઉપસ્થિતિમાં નવી ઔદ્યોગિક નીતિનું અનાવરણ કરવામાં આવ્યું હતું. આ પ્રસંગે નાણામંત્રી કનુભાઈ દેસાઈ, કૃષિમંત્રી જીતુભાઈ વાઘાણી, ઉદ્યોગ વિભાગના રાજ્યકક્ષાના મંત્રી ડૉ. જયરામ ગામીત, મુખ્ય સચિવ મનોજ કુમાર દાસ, ઉદ્યોગ અને ખાણ વિભાગના અધિક મુખ્ય સચિવ મમતા વર્મા સહિત ઉદ્યોગજગતના અગ્રણીઓ અને વરિષ્ઠ અધિકારીઓ ઉપસ્થિત રહ્યા હતા.
મુખ્યમંત્રી ભૂપેન્દ્ર પટેલે નવી ઔદ્યોગિક નીતિને ‘વિકસિત ગુજરાતથી વિકસિત ભારત ૨૦૪૭’ના સંકલ્પને સાકાર કરતો સર્વગ્રાહી વિકાસ દસ્તાવેજ ગણાવ્યો હતો. તેમણે જણાવ્યું કે, આ નીતિ રોકાણ અને ઉત્પાદન, નવીનતા અને સંશોધન, કૌશલ્ય અને રોજગાર તેમજ ટકાઉ અને સર્વસમાવેશક વિકાસ જેવા ચાર મજબૂત આધારસ્તંભો પર નિર્મિત છે. બદલાતી વૈશ્વિક અર્થવ્યવસ્થા, કૃત્રિમ બુદ્ધિમત્તા, હરિત ઊર્જા અને વૈશ્વિક પુરવઠા શ્રેણીમાં થઈ રહેલા પરિવર્તનોને ધ્યાનમાં રાખીને આ નીતિ ઘડવામાં આવી છે. તેમાં સૂક્ષ્મ, લઘુ અને મધ્યમ ઉદ્યોગો, નવપ્રવર્તન આધારિત નવા ઉદ્યોગો, મહિલા ઉદ્યોગસાહસિકો, પ્રથમ પેઢીના ઉદ્યોગકારો અને યુવાશક્તિને વિકાસના કેન્દ્રમાં સ્થાન આપવામાં આવ્યું છે.
નાયબ મુખ્યમંત્રી હર્ષ સંઘવીએ જણાવ્યું કે, નવી ઔદ્યોગિક નીતિ માત્ર સહાય અને પ્રોત્સાહનો આપતી યોજના નથી, પરંતુ વર્ષ ૨૦૪૭ના વિકસિત ગુજરાતના દ્રષ્ટિકોણને સાકાર કરવાનું શક્તિશાળી માધ્યમ છે. વિવિધ ક્ષેત્રોમાં ૧૫થી ૪૫ ટકા સુધીના પ્રોત્સાહનો દ્વારા ઉદ્યોગોને સહાય આપવામાં આવશે. તેના પરિણામે નવા રોકાણો આવશે, રોજગારીનું સર્જન થશે અને રાજ્યના યુવાનોને પોતાના વતનમાં જ ઉજ્જવળ ભવિષ્ય ઘડવાની વધુ તકો મળશે. દેશના કુલ ઉત્પાદન ક્ષેત્રમાં ગુજરાતનો ૧૮ ટકાથી વધુ ફાળો છે, જ્યારે ૪૦ ટકા માલવહન વ્યવહાર અને આશરે ૩૩ ટકા નિકાસ ગુજરાતમાંથી થાય છે. રાજ્યમાં દેશના સૌથી વધુ સૂક્ષ્મ, લઘુ અને મધ્યમ ઉદ્યોગ એકમો કાર્યરત છે.

તમારું પ્રોત્સાહન તમે પસંદ કરો : રોકાણકારો માટે નવી પહેલ
નવી ઔદ્યોગિક નીતિનું સૌથી વિશિષ્ટ આકર્ષણ ‘તમારું પ્રોત્સાહન તમે પસંદ કરો’ યોજના છે. આ પહેલ હેઠળ રોકાણકારો પોતાની જરૂરિયાત અનુસાર મૂડી સહાય, વ્યાજ સહાય અથવા વીજ દર સહાય જેવી વિવિધ સહાયોમાંથી પસંદગી કરી શકશે. સરકારના જણાવ્યા મુજબ આ વ્યવસ્થા વધુ પારદર્શક, સરળ અને રોકાણકારમૈત્રી બની રહેશે, જેનાથી રોકાણ પ્રક્રિયામાં ઝડપ અને વિશ્વાસ બંને વધશે.

રાજ્યમાં સ્થાપિત થનારા પ્રથમ પાંચ સંશોધન અને વિકાસ કેન્દ્રોને ખાસ પ્રોત્સાહન
આ નીતિમાં ગુજરાતને સંશોધન અને વિકાસ માટેનું વૈશ્વિક કેન્દ્ર બનાવવાનો મહત્ત્વાકાંક્ષી અભિગમ અપનાવવામાં આવ્યો છે. રાજ્યમાં સ્થાપિત થનારા પ્રથમ પાંચ સંશોધન અને વિકાસ કેન્દ્રોને વિશેષ પ્રારંભિક પ્રોત્સાહનો આપવામાં આવશે. ઓછામાં ઓછા ₹૩૦૦ કરોડના રોકાણ સાથે સ્થાપિત થનારા આવા કેન્દ્રોને પાંચ વર્ષ સુધી વાર્ષિક ₹૫૦ કરોડ સુધીની મૂડી સહાય, વીજ દર સહાય, વેતન સહાય તથા જમીન ખર્ચમાં રાહત મળશે. ઉપરાંત બૌદ્ધિક સંપત્તિ અધિકાર અને પેટન્ટ નોંધણી માટે પણ દસ વર્ષ સુધી સહાય આપવામાં આવશે.

રાજ્યમાં ‘ગુજરાત સંશોધન અને નવીનતા ઉદ્યાન’ની સ્થાપના કરાશે, નવા ઉદ્યોગોને વિશેષ પ્રોત્સાહન
– ૧૦ વર્ષ સુધી દર મહિને ₹૨૫,૦૦૦નું નિર્વાહ ભથ્થું
– મહિલા સહસ્થાપક ધરાવતા નવા ઉદ્યોગોને દર મહિને ₹૩૦,૦૦૦
– બીજ મૂડી સહાયરૂપે ₹૩૦ લાખ સુધીની સહાય
– સામાજિક પ્રભાવ ધરાવતા પ્રકલ્પો માટે વધારાની સહાય
– વ્યાજ સહાય, પ્રવેગક કાર્યક્રમો અને કૌશલ્ય વિકાસની સુવિધાઓ

નવી નીતિમાં પર્યાવરણ સંરક્ષણને વિશેષ સ્થાન અપાશે
– ગ્રીન ઔદ્યોગિક ઉદ્યાનોને પ્રોત્સાહન
– ગંદા પાણીના પુનઃઉપયોગ માટે સહાય
– શૂન્ય પ્રવાહી નિકાલ વ્યવસ્થાને પ્રોત્સાહન
– સ્વચ્છ ઉત્પાદન તકનીકો અપનાવવા સહાય
– પર્યાવરણલક્ષી માળખાકીય સુવિધા માટે કરોડો રૂપિયાની સહાયની જોગવાઈ

મહિલા ઉદ્યોગસાહસિકો માટે વિશેષ જોગવાઈ
મહિલા સશક્તિકરણને ધ્યાનમાં રાખીને નવી નીતિમાં મહિલા આગેવાનીવાળા સાહસો માટે વિશેષ પ્રોત્સાહનોની જાહેરાત કરવામાં આવી છે. મહિલાઓની સંપૂર્ણ માલિકી ધરાવતા સૂક્ષ્મ ઉદ્યોગોને વધારાની વ્યાજ સહાય, ભાડા સહાય અને કૌશલ્ય પુનઃપ્રશિક્ષણ કાર્યક્રમોનો લાભ મળશે. મહિલા સહસ્થાપક ધરાવતા નવપ્રવર્તન આધારિત નવા ઉદ્યોગોને વિશેષ નિર્વાહ ભથ્થું પણ આપવામાં આવશે.

સૂક્ષ્મ, લઘુ અને મધ્યમ ઉદ્યોગો માટે મોટો લાભ
ગુજરાતમાં હાલ ૪૨ લાખથી વધુ સૂક્ષ્મ, લઘુ અને મધ્યમ ઉદ્યોગો કાર્યરત છે. નવી નીતિ હેઠળ આવા ઉદ્યોગોને તાલુકા શ્રેણી મુજબ ૩૫થી ૪૫ ટકા સુધીના રોકાણ આધારિત પ્રોત્સાહનો મળશે. આ ઉપરાંત ગુણવત્તા પ્રમાણપત્ર સહાય, પેટન્ટ નોંધણી સહાય, માહિતી અને સંચાર તકનીક અમલીકરણ સહાય, ઊર્જા અને પાણી બચત સહાય અને મૂડીબજારમાંથી ભંડોળ ઊભું કરવા સહાય જેવી અનેક સુવિધાઓ ઉપલબ્ધ કરાવવામાં આવશે.

ઉદ્યોગોની ભીડ ઘટાડવા ‘પ્રોજેક્ટ થ્રાઈવ’
નવી નીતિમાં ‘પ્રોજેક્ટ થ્રાઈવ’નામની મહત્વપૂર્ણ પહેલ જાહેર કરવામાં આવી છે. તેનો હેતુ શહેરી વિસ્તારોમાંથી ઉદ્યોગોને સુવ્યવસ્થિત ઔદ્યોગિક વિસ્તારોમાં સ્થાનાંતરિત કરીને શહેરોની ભીડ ઘટાડવાનો અને જીવનની સરળતા વધારવાનો છે. આ યોજના હેઠળ સ્થાનાંતરિત એકમોને નવા એકમ તરીકે ગણાશે, વેતન સહાય મળશે, મૂડી સહાય મળશે, શ્રમિક આવાસ માટે વિશેષ સહાય મળશે અને વિવિધ નિયમનકારી રાહતો આપવામાં આવશે

ગુજરાતના વિકાસમાં નવો માઈલસ્ટોન
ઉદ્યોગ અને ખાણ વિભાગના અધિક મુખ્ય સચિવ સુશ્રી મમતા વર્માએ જણાવ્યું હતું કે, ગુજરાત ઔદ્યોગિક નીતિ–૨૦૨૬ રાજ્યને અદ્યતન ઉત્પાદન, નવીનતા અને ટકાઉ વિકાસ માટે વૈશ્વિક શક્તિ કેન્દ્ર બનાવવાની દિશામાં એક પરિવર્તનકારી નીતિ છે. રાજ્યનું કુલ આર્થિક ઉત્પાદન છેલ્લા બે દાયકામાં ૨૦ ગણું વધ્યું છે અને આજે ગુજરાત દેશના કુલ આર્થિક ઉત્પાદનમાં આશરે ૮.૨ ટકા ફાળો આપે છે. વર્ષ ૨૦૪૭ સુધી આ ફાળો ૧૦ ટકા સુધી પહોંચાડવાનો રાજ્ય સરકારનો સંકલ્પ છે. નવી ઔદ્યોગિક નીતિ દ્વારા રોકાણ, નવીનતા, રોજગાર અને સર્વસમાવેશક વિકાસને નવી દિશા મળશે અને ગુજરાત દેશના વિકાસ એન્જિન તરીકે પોતાની અગ્રણી ભૂમિકા વધુ મજબૂત બનાવશે તેવી અપેક્ષા વ્યક્ત કરવામાં આવી છે.