બોર્ડના કેલેન્ડર પૂર્વે જ મોટાભાગની ખાનગી સ્કૂલોમાં 1 મેથી રજાઓ જાહેર
ખાસ-ખબર ન્યૂઝ રાજકોટ
- Advertisement -
ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ (ૠજઊઇ)ના શૈક્ષણિક વર્ષ 2025-26ના સત્તાવાર કેલેન્ડર મુજબ રાજકોટ સહિત સમગ્ર રાજ્યની સરકારી અને ગ્રાન્ટેડ શાળાઓમાં આગામી 4 મે, 2026થી 33 દિવસના ઉનાળુ વેકેશનનો પ્રારંભ થશે. જ્યારે શહેરની મોટાભાગની ખાનગી શાળાઓમાં આવતીકાલથી જ એટલે કે 1 મેથી રજાઓ જાહેર કરી દેવામાં આવી છે. એપ્રિલના અંત સુધીમાં વાર્ષિક પરીક્ષાઓ પૂર્ણ થતા હવે વિદ્યાર્થીઓ વેકેશનના મૂડમાં છે. આ વેકેશન 7 જૂન સુધી ચાલશે અને ત્યારબાદ 8 જૂન, 2026 સોમવારના રોજથી શાળાઓમાં નવા શૈક્ષણિક સત્રનો વિધિવત પ્રારંભ થશે.
ગુજરાત માધ્યમિક અને ઉચ્ચતર માધ્યમિક શિક્ષણ બોર્ડના સત્તાવાર સ્રોતોના જણાવ્યા અનુસાર, તમામ જિલ્લા શિક્ષણાધિકારીઓને આ કેલેન્ડર મુજબ અમલ કરવા સૂચના આપી દેવામાં આવી છે. બોર્ડના અધિકારીએ જણાવ્યું કે, નવા સત્રની શરૂઆત 8 જૂનથી થશે, જેથી ચોમાસાના પ્રારંભ પૂર્વે શાળાઓમાં પ્રવેશ પ્રક્રિયા અને પુસ્તક વિતરણની કામગીરી સુચારુ રીતે પૂર્ણ કરી શકાય. વધતી ગરમી અને શૈક્ષણિક કેલેન્ડરના અમલીકરણના ભાગરૂપે લેવાયેલા આ નિર્ણયથી રાજ્યના લાખો વિદ્યાર્થીઓને શૈક્ષણિક કાર્યમાંથી વિરામ મળશે, જેનો હેતુ ગરમીથી રાહત અને આગામી સત્ર માટે માનસિક સજ્જતા કેળવવાનો છે.
સ્વિમિંગ, સ્કેટિંગ, પેઈન્ટિંગ સહિતના હોબી ક્લાસમાં ધસારો
રાજકોટમાં વેકેશનના આગમન સાથે જ શૈક્ષણિક માહોલ હવે ‘એક્ટિવિટી મોડ’માં પરિવર્તિત થયો છે. શહેરના રેસકોર્સ, કાલાવડ રોડ અને યુનિવર્સિટી રોડ પર આવેલા હોબી ક્લાસિસમાં અત્યારથી જ ભારે ધસારો જોવા મળી રહ્યો છે. ખાસ કરીને સ્વિમિંગ, સ્કેટિંગ, ક્રિકેટ કોચિંગ અને પેઈન્ટિંગ ક્લાસીસમાં 40% જેટલું એડવાન્સ બુકિંગ થઈ ગયું છે. વાલીઓ પોતાના બાળકોને વેકેશન દરમિયાન મોબાઈલથી દૂર રાખી સર્જનાત્મક પ્રવૃત્તિઓમાં વ્યસ્ત રાખવા માટે હોબી ક્લાસીસને પ્રાધાન્ય આપી રહ્યા છે.
- Advertisement -
પ્રથમ સત્ર 105 અને દ્વિતીય સત્ર 144 દિવસ ચાલ્યું
શિક્ષણ બોર્ડની વિગતો મુજબ, ચાલુ શૈક્ષણિક વર્ષમાં વિદ્યાર્થીઓએ કુલ 249 દિવસ અભ્યાસ કર્યો છે. જેમાં પ્રથમ સત્રમાં 105 દિવસ અને દ્વિતીય સત્રમાં 144 કાર્યદિવસોનો સમાવેશ થાય છે. ઉનાળુ વેકેશનની સમયરેખા જોઈએ તો, 4 મે થી 7 જૂન સુધી સત્તાવાર રજાઓ રહેશે. ગત વર્ષોની સરખામણીએ આ વખતે પણ બોર્ડે 33 દિવસનું સંતુલિત વેકેશન ફાળવ્યું છે, જેથી શૈક્ષણિક વર્ષના નક્કી કરેલા કલાકો પૂર્ણ થઈ શકે.
