31તિં પહેલા દમણથી મોકલાવેલો 7.43 લાખનો દારૂ રાજકોટમાં ઠલવાય તે પૂર્વે PCBએ ઝડપી લીધો

કુખ્યાત બુટલેગર યાકુબ મોટાણીએ ગ્લાસ ફાયબર રો મટીરિયલની આડમાં દારૂ મોકલ્યો હતો

ચોટીલાના ડ્રાયવરની 19.48 લાખના મુદામાલ સાથે ધરપકડ : સપ્લાયર-રીસીવરની શોધખોળ

ખાસ-ખબર ન્યૂઝ રાજકોટ

રાજકોટમાં થર્ટી ફર્સ્ટની નશીલી ઉજવણી કરવા દારૂની રેલમછેલ બોલાવવા બુટલેગરો મેદાનમાં ઉતર્યા છે ત્યારે પ્યાસીઓની પ્યાસ બુઝાવવા માટે દમણથી સપ્લાય કરેલો દારૂ રાજકોટમાં ઠલવાય તે પૂર્વે જ પીસીબીએ કુવાડવા પાસે દરોડો પાડી બુટલેગરનો પ્લાન ફેઈલ કરી નાખ્યો છે પોલીસે રાજકોટના લિસ્ટેડ બુટલેગરે દમણથી ગ્લાસ ફાયબર રો મટીરીયલ્સની આડમાં મોકલેલો 7.43 લાખના દારૂ સાથે ચોટીલાના ડ્રાયવરની ધરપકડ કરી 19.48 લાખનો મુદામાલ કબ્જે કરી સપ્લાયર અને ભગવતીપરાના રીસીવરની શોધખોળ હાથ ધરી છે.
રાજકોટમાં થર્ટી ફર્સ્ટ પૂર્વે દારૂની હેરાફેરી વધતી હોય જે સદંતર નાબૂદ કરવા પોલીસ કમિશ્નર બ્રજેશ ઝાની સૂચના અન્વયે પીસીબી પીઆઈ એમ.આર.ગોંડલીયાના માર્ગદર્શન હેઠળ પીઆઈ એમ.જે.હુણ, પીએસઆઈ પી.બી.ત્રાજીયાની ટીમ પેટ્રોલિંગમાં હતી ત્યારે સ્ટાફના હેડ કોન્સ્ટેબલ વિજય મેતા, કુલદીપસિંહ જાડેજા, કરણ મારૂ અને યુવરાજસિંહ રાણાને બાતમી મળી હતી કે રાજકોટ-અમદાવાદ હાઇવે પર અમદાવાદથી રાજકોટ તરફ આવતા સર્વિસ રોડ ઉપર એક શખ્સ બ્રાઉન કલરનુ આઇસર નં.જીજે.13.એ.ડબલ્યુ. 8364 પાસે ઉભો છે અને તે આઇશરમાં દારૂનો જથ્થો છે આ ચોકકસ બાતમી આધારે ટીમે દરોડો પાડી ત્યાં હાજર શખ્સનું નામઠામ પૂછતા પોતે ચોટીલા તાલુકાના ખોરાણા ગામનો ખોડા નાથા માલકીયા ઉ.35 હોવાનુ જણાવ્યું હતું.
જે બાદ ત્યાં પાર્ક કરેલા બાતમીવાળા આઈશરની જડતી લેતા સફેદ કલરના પાર્સલ હોય જે પાર્સલ ખોલીને જોતા ગ્લાસ ફાયબર રો મટીરીયલ્સની આડમાંથી ઇંગ્લીશ દારૂનો જથ્થો મળી આવ્યો હતો તમામ પાર્સલમાંથી અલગ અલગ બ્રાન્ડની 180 એમએલના 1869 ચપલા અને બે લીટરની 93 બોટલ સહીત કુલ દારૂની 1965 બોટલ મળી આવતાં પોલીસે 7.43 લાખનો દારૂ, આઈશર ટ્રક અને મોબાઈલ સહીત સહિત 19.48 લાખનો કબ્જે કરી ટ્રક ચાલકની પૂછતાછ કરતા તેણે એવી કબૂલાત આપી હતી કે આ દારૂનો જથ્થો દમણથી રાજકોટના લિસ્ટેડ બુટલેગર યાકુબ મુસા મોટાણીએ મોકલાવ્યો હતો અને આ દારૂનો જથ્થો રાજકોટના ભગવતીપરામાં રહેતાં બુટલેગર હમીદ જીકર પરમારને પહોંચાડવાનો હતો.
હાલ પોલીસે ત્રણેય સામે ગુનો નોંધી ચોટીલાના ડ્રાયવરની ધરપકડ કરી બંનેની શોધખોળ હાથ ધરી છે રાજકોટનો લિસ્ટેડ બુટલેગર યાકુબ મોટાણી દમણ બેઠા બેઠા દારૂનો જથ્થો સપ્લાય કરતો હોય છે.

વૉન્ટેડ યાકુબ સામે હત્યા સહિત 21, હમિદ સામે 12 ગુના
મુખ્ય સૂત્રધાર યાકુબ મુસા મોટાણીએ પરિવાર સાથે મળી પોપટપરામાં વૃદ્ધાની કુકર ફટકારી હત્યા કરી હતી આ અંગે પ્રનગર પોલીસમાં ગુનો નોંધાયો હતો યાકુબ સામે હત્યા સહીત રાજકોટ, વલસાડ, મોરબી, સુરત, આણંદમાં દારૂ સહિતના 21 ગુના નોંધાઈ ચુક્યા છે જયારે વોન્ટેડ હમીર સામે રાજકોટમાં દારૂ, ચોરી સહિતના 12 ગુના નોંધાઈ ચુક્યા છે.