યુનિ.ના કાર્યક્રમ દરમિયાન ગળામાં ગોળી વાગી અને ઘટનાસ્થળે જ મૃત્યુ: ટ્રમ્પે તમામ અમેરિકી ઝંડાઓને 4 દિવસ અડધી કાઠીએ લહેરાવવાનો આદેશ આપ્યો
ખાસ-ખબર ન્યૂઝ નવી દિલ્હી
- Advertisement -
ગુરુવારે એક કાર્યક્રમ દરમિયાન અમેરિકાના રાષ્ટ્રપતિ ડોનાલ્ડ ટ્રમ્પના સમર્થક અને ટાઈટ વિંગ એક્ટિવિસ્ટ ચાર્લી કર્કની ગોળી મારીને હત્યા કરવામાં આવી હતી. આ ઘટના યુટા રાજ્યની યુટા વેલી યુનિવર્સિટીમાં બની હતી. ચાર્લી અહીં ‘ધ અમેરિકન કમબેક ટૂર’ કાર્યક્રમ માટે આવ્યો હતો. સોશિયલ મીડિયા પર વાઇરલ થયેલા વીડિયોમાં ચાર્લી તંબુ નીચે માઈક પકડીને બોલી રહ્યો હોય એવું જોવા મળે છે. પછી અચાનક ગળા પાસે ગોળી વાગે છે, ખૂબ લોહી વહેવા લાગે છે અને તેઓ જમીન પર પડી જાય છે.
ચાર્લીની હત્યા પર ટ્રમ્પે એક પર્સનલ સોશિયલ મીડિયા એકાઉન્ટ ટ્રુથ પર લખ્યું, સાચા મહાન અમેરિકન દેશભક્ત ચાર્લી કર્કના સન્માનમાં હું અમેરિકામાં તમામ ઝંડાઓને રવિવારે સાંજે 6 વાગ્યા સુધી અડધી કાઠીએ લહેરાવવાનો આદેશ આપી રહ્યો છું.
ટ્રુથ પર વધુમાં તેમણે લખ્યું, ‘મહાન અને ખરેખર દિગ્ગજ, ચાર્લી કર્ક હવે આ દુનિયામાં નથી. અમેરિકાના યુવાનોને તેમનાથી વધુ સારી રીતે કોઈ સમજી શક્યું નથી અને ન તો કોઈ તેમના દિલ સુધી પહોંચી શક્યું છે. બધા તેમને ખૂબ પ્રેમ અને આદર આપતા હતા, ખાસ કરીને હું. મેલાનિયા અને હું તેમની પત્ની એરિકા અને સમગ્ર પરિવાર પ્રત્યે સંવેદના વ્યક્ત કરીએ છીએ. ચાર્લી, અમે તમને પ્રેમ કરીએ છીએ!’
પાલિટિકલ એક્ટિવિસ્ટ ચાર્લી ટર્નિંગ પોઈન્ટ યુએસએ (ઝઙઞજઅ) નામનું સંગઠન ચલાવતો હતો, જેમાં તે શાળાઓ અને કોલેજોમાં જતો હતો અને વિદ્યાર્થીઓને રાજકારણ વિશે કહેતો હતો. તેને ટ્રમ્પનો કટ્ટર સમર્થક પણ માનવામાં આવતો હતો. હુમલાખોર કોણ હતો અને તેણે આવું કેમ કર્યું એ હજુ સુધી સ્પષ્ટ નથી.
સામૂહિક ગોળીબાર અંગેના પ્રશ્ર્નનો જવાબ આપતી વખતે ગોળી વાગી
ઘટના સમયે સ્થળ પર હાજર કેટલાક લોકોએ ન્યૂઝ સાઇટ ગાર્ડિયનને જણાવ્યું હતું કે ચાર્લીને સામૂહિક ગોળીબાર વિશે પ્રશ્ર્નો પૂછવામાં આવી રહ્યા હતા ત્યારે ગોળી મારી દેવામાં આવી હતી. કાર્યક્રમમાં હાજર રહેલા ડેઝરેટ ન્યૂઝ રિપોર્ટર એમ્મા પિટ્સે કહ્યું – પ્રશ્ર્ન એ હતો કે શું તેમને ખબર હતી કે છેલ્લાં કેટલાંક વર્ષોમાં કેટલા ટ્રાન્સજેન્ડર શૂટર્સ સામૂહિક ગોળીબારમાં સામેલ હતા. ચાર્લીએ આનો જવાબ આપ્યો. પછી બીજા કોઈએ પ્રશ્ર્ન પૂછ્યો કે છેલ્લાં 10 વર્ષમાં કેટલા સામૂહિક ગોળીબાર થયા. આ પછી તરત જ ગોળીબાર થયો.
