મોરબી : ઈમ્પોર્ટ કોલસા ચોરીના કૌભાંડનો પર્દાફાશ

જૂના સાદુળકા નજીક કઈઇની રેડ, ઈમ્પોર્ટ કોલસો-વાહનો સહિત 1.09 કરોડના મુદ્દામાલ સાથે 4ની ધરપકડ

ખાસ-ખબર ન્યૂઝ મોરબી, તા.22
મોરબી તાલુકાના ગાળા ગામ પાસે અગાઉ એસએમસીની ટીમ દ્વારા રેડ કરીને પેટકોક ચોરીના કૌભાંડનો પર્દાફાશ કર્યો હતો. ત્યારબાદ હવે મોરબી એલસીબીની ટીમ દ્વારા મોરબી તાલુકાના જુના સાદુળકા ગામ તરફ જવાના રસ્તા ઉપર આવેલ એબીસી મિનરલની બાજુમાં આવેલા પ્લોટમાં રેડ કરવામાં આવી હતી. ત્યારે ત્યાં સ્થળ ઉપરથી ઈમ્પોર્ટ કોલસો ભરીને આવતી ગાડીઓના ડ્રાઇવર સાથે મિલાપીપણું કરીને ઈમ્પોર્ટ કોલસો એટલે કે પેટકોકની ચોરી કરીને હલકી ગુણવત્તાનો કોલસો તેમાં મિક્સ કરવામાં આવતો હોય તેવા કૌભાંડ સામે આવ્યું છે. જેથી કરીને હાલમાં સ્થળ ઉપરથી ઈમ્પોર્ટ કોલસો, હલકી ગુણવત્તાનો કોલસો અને વાહન વિગેરે મળીને 1.09 કરોડથી વધુનો મુદામાલ કબજે કરેલ છે અને રેડ સમયે બે આરોપી નાશી ગયા હતા જો કે, પોલીસે ચાર શખ્સોની ધરપકડ કરી હતી અને હાલમાં તાલુકા પોલીસ સ્ટેશન ખાતે 10 શખ્સોની સામે ગુનો નોંધાયો છે.

મોરબી એલસીબીની ટીમને મળેલી બાતમી આધારે મોરબીના જુના સાદુળકા ગામ તરફ જવાના રસ્તા ઉપર આવેલ સ્વામિનારાયણ ગુરુકુળની સામે એબીસી મિનરલની બાજુમાં આવેલા નવઘણભાઈ બાલાસરા તથા નિકુંજભાઈ રાજપરાના કબજા ભોગવટાવાળા પ્લોટમાં રેડ કરવામાં આવી હતી. ત્યારે ત્યાં ઈમ્પોર્ટેડ કોલસો એટલે કે પેટકોકની ગાડીઓના ડ્રાઇવર સાથે સંપર્ક કરીને તે ટ્રકમાં ભરવામાં આવેલ પેટકોકની ચોરી કરવામાં આવતી હતી અને ટ્રકમાંથી કાઢવામાં આવેલ પેટકોકની સામે તેટલી જ માત્રામાં હલકી ગુણવત્તાનો કોલસો તેમાં મિક્સ કરવામાં આવતો હોવાનું ધ્યાન ઉપર આવ્યું હતું.
જેથી કરીને એલસીબીની ટીમ દ્વારા સ્થળ ઉપરથી 188 ટન ઈમ્પોર્ટેડ કોલસો જેની કિંમત 24.44 લાખ, મિક્સ કરેલો 100 ટન કોલસો જેની કિંમત 4 લાખ, હલકી ગુણવત્તાનો 70 ટન કોલસો જેની કિંમત 56,000 તથા 40 લાખની કિંમતનો ટ્રક, 20 લાખની કિંમતના બે ટ્રેક્ટર લોડર, 20 લાખની કિંમતનું એક હિટાચી મશીન, 25,000 રૂપિયાની કિંમતનું એક બાઈક, 25000 રૂપિયાની કિંમતના પાંચ મોબાઇલ ફોન, 5000 રૂપિયા રોકડા તથા અન્ય મુદ્દા માલ મળીને 1,09,55,000 રૂપિયાની કિંમતના મુદ્દામાલ સાથે પોલીસ દ્વારા ચાર શખ્સને પકડવામાં આવેલ છે જો કે, રેડ કરવામાં આવી હતી ત્યારે બે આરોપી સ્થળ ઉપરથી નાશી ગયા હતા.

મોરબી તાલુકા પોલીસ સ્ટેશન ખાતે જે ફરિયાદ નોંધાઇ છે તેમાં નવઘણભાઈ જસાભાઈ બાલાસરા. રહે નાની વાવડી સતનામ સોસાયટી ભૂમિ ટાવર પાસે મોરબી, નિકુંજભાઈ રાજપરા રહે. લીલાપર મોરબી, ટ્રક ટેલરનો ડ્રાઇવર તોફિકખાન અશરફખાન મલેક (24) રહે. વારાહી ગામ તાલુકો સાતલપુર પાટણ, હિટાચીનો ડ્રાઇવર અખિલેશકુમાર શ્રીધીરેન્દ્રભાઈ ગોડ (20) રહે. જીગનહી પરસોના મધુબની વોર્ડ નં-6 ચંપારણ બિહાર, મીઠાભાઈ વિઠ્ઠલભાઈ મીઠાપરા 39 રહે. આણંદપર દેવનગર રામાપીર મંદિર પાસે રાજકોટ, ઋત્વિક અમુભાઈ ખીમાણીયા (25) રહે. નાની વાવડી સતનામ સોસાયટી શેરી નં-1 મોરબી, લોડરનો ડ્રાઇવર રમેશ અનસીભાઈ વસુલિયા રહે. દુધી કલ્યાણપુર જિલ્લો જાંબુવા એમપી તથા લોડરનો ચાલક રાકેશ, ટ્રકનો માલિક જગજીતસિંહ રાણા રહે. ગાંધીધામ અને હરિભાઈ રહે. મોરબી વાળાનો સમાવેશ થાય છે

મોરબી તાલુકા પોલીસ સ્ટેશન ખાતે બી.એન.એસ.કલમ 303 (1), 316 (3)(4), 317 (1))2)(4), 381(3), 61, (2)(એ), 54 મુજબ ગુનો નોંધાયો છે અને આ ગુનામાં પોલીસે અત્યારે તોફિકખાન, અખિલેશકુમાર, મીઠાભાઈ અને ઋત્વિકભાઈ નામના ચાર આરોપીની ધરપકડ કરેલ છે અને જયારે રેડ કરી હતી ત્યારે પોલીસને જોઈને લોડરના બંને ડ્રાઇવરો સ્થળ ઉપરથી નાસી ગયા હતા જેથી કરીને પ્લોટના કબ્જા ભોગવટેદાર તેમજ ટ્રકના માલિક સહિત કુલ મળીને છ આરોપીઓને પકડવાના બાકી છે જેથી તેને પકડવા માટે થઈને હવે પોલીસે આગળની તપાસ શરૂ કરી છે અને આ ગુનાની આગળની તપાસ મોરબી જિલ્લા એલસીબીના પીએસઆઇ બી.ડી. ભટ્ટ ચલાવી રહ્યા છે.