રાજકોટ ઈન્ટરનેશનલ એરપોર્ટનું નવું ટર્મિનલ બિલ્ડિંગ તૈયાર

ચેરમેન રૂપાલાની હાજરીમાં એડવાઈઝરી કમિટીની બેઠક મળી

ઉદ્ઘાટન માટે PM  મોદીની તારીખ માંગવામાં આવી
ખાસ-ખબર ન્યૂઝ રાજકોટ

રાજકોટ લોકસભા બેઠકના ભાજપના સાંસદ પુરુષોત્તમ રૂપાલાને રાજકોટ ઇન્ટરનેશનલ એરપોર્ટની એરપોર્ટ એડવાઈઝરી કમિટીના ચેરમેન બનાવવામાં આવ્યા છે.
જ્યારે રાજકોટથી રાજ્યસભાના સાંસદ રામ મોકરીયા, વાંકાનેરના મહારાજા અને રાજ્યસભાના સાંસદ કેસરીદેવસિંહ ઝાલાને આ કમિટીના મેમ્બર તરીકે અગાઊ જાહેર કરવામાં આવેલા છે. ત્યારે ગઈકાલે રાજકોટ ઇન્ટરનેશનલ એરપોર્ટની એડવાઈઝરી કમિટીની પ્રથમ બેઠક આજે મળી હતી, જેમાં નવા ટર્મિનલ બિલ્ડિંગના ઉદ્ઘાટન માટે વડાપ્રધાન નરેન્દ્ર મોદીની તારીખ માંગવામાં આવી હોવાનું જાણવા મળી રહ્યું છે.
રાજકોટ ઇન્ટરનેશનલ એરપોર્ટ ખાતે ગઈકાલે એડવાઈઝરી કમિટીની પ્રથમ બેઠક મળી હતી, જેમાં લોકસભાના સાંસદ પુરુષોત્તમ રૂપાલા ચેરમેન તરીકે ઉપસ્થિત રહ્યા હતા. તેમની સાથે એરપોર્ટ ડાયરેક્ટર ઉપરાંત રાજ્યસભાના સાંસદ રામ મોકરિયા પણ ઉપસ્થિત રહ્યા હતા. પ્રથમ બેઠકમાં નવું ટર્મિનલ બિલ્ડિંગ તૈયાર થઈ ગયું છે કે કેમ? તેની સમીક્ષા કરવામાં આવી હતી. બાદમાં એરપોર્ટ ડાયરેક્ટર દ્વારા એવું કહેવામાં આવ્યું હતું કે, નવું ટર્મિનલ બિલ્ડિંગ તૈયાર થઈ ગયું છે, જેથી હવે તેના ઉદ્ઘાટન માટે વડાપ્રધાન નરેન્દ્ર મોદીને બોલાવવા માટેનું નક્કી કરાયું હોવાનું જાણવા મળી રહ્યું છે. જોકે, મોદી ઓનલાઇન મોડથી આ ઉદ્ઘાટન કરશે કે કેમ? તે આગામી સમયમાં જાહેર થશે.
આ એરપોર્ટ એડવાઈઝરી કમિટીમાં સભ્ય તરીકે વાંકાનેરના ધારાસભ્ય જીતેન્દ્ર સોમાણી, રાજકોટ કલેકટર અને ડિસ્ટ્રિક્ટ મેજિસ્ટ્રેટ પ્રભવ જોશી, રાજકોટ પોલીસ કમિશનર બ્રિજેશકુમાર ઝા ઉપરાંત એરપોર્ટ ડાયરેક્ટર દિગંતા બોરાહની નિમણૂક કરવામાં આવેલી છે. આ ઉપરાંત આ કમિટીના મેમ્બરમાં ચીફ એરપોર્ટ સિક્યુરિટી ઓફિસર અમનદીપ સિરસવા તો ઈન્ડિગો એરલાઈન્સના એરપોર્ટ મેનેજર એલલોયડ પિન્ટો અને એર ઈન્ડિયાના એરપોર્ટ મેનેજર ક્રિષ્ના ચતુર્વેદીની નિમણૂક કરવામાં આવેલી છે.

આ સાથે જ ગોકુલ હોસ્પિટલના ડો. પ્રકાશ મોઢા, પેટ્રિયા હોસ્પિટલના ડાયરેક્ટર ડો. મિહિર મણિઆર, સામાજિક કાર્યકર અને રાજકીય નેતા મયુર શાહ, હાઈ બોન્ડ સિમેન્ટના મેનેજિંગ ડિરેક્ટર રાજન વડાલીઆ, ચેમ્બર ઓફ કોમર્સ અને બાલાજી મલ્ટિપ્લેક્સના પ્રણવ ભાલારા તથા આદેશ ટ્રાવેલ્સના મેનેજિંગ ડિરેક્ટર ગોપાલ ઉનડકટની નિમણૂક અગાઉ કરવામા આવેલી છે.