સુરેન્દ્રનગર પાસે ડમ્પર પાછળ કાર ઘૂસી જતાં મોરબીના પતિ-પત્ની અને પુત્રનાં મોત

ગમખ્વાર અકસ્માતમાં એક બાળકનો આબાદ બચાવ
ખાસ-ખબર સંવાદદાતા
સુરેન્દ્રનગરમાં વધુ એક અકસ્માતની ઘટના સામે આવી છે. મૂળી-સરલા રોડ પર કોલસા ભરેલા ડમ્પર પાછળ કાર ઘૂસી ગઈ હતી. જેથી ભયંકર અકસ્માત થયો હતો. જેમાં મોરબી જિલ્લાના એક જ પરિવારના ત્રણ લોકોના મોત થયા છે. તેમજ એક વ્યક્તિને ગંભીર ઈજા પહોંચી છે. જ્યારે એક બાળકનો આબાદ બચાવ થયો છે. મૂળીની હોસ્પિટલ ખાતે ત્રણેયની લાશને રાખવામાં આવી છે. ગઈકાલે લીંબડી પાસે ઉપલેટાના ભાજપના ધારાસભ્યની ગાડીનો અકસ્માત થયો હતો. જેમાં ધારાસભ્યને ઈજા પહોંચી હતી. સુરેન્દ્રનગરમાં કોલસો ભરેલા ડમ્પર પાછળ કાર ઘૂસી જતા ત્રણ લોકોએ પોતાની જિંદગી ગુમાવી છે. આ અકસ્માતના વિચલીત કરતા દ્દશ્ર્યો પણ સામે આવ્યાં છે. કારનો આગળનો ભાગ ડમ્પરની પાછળ ઘૂસી ગયો હતો. જેથી કારના આગળના ભાગનો કચ્ચણઘાણ વળી ગયો હતો. આ અકસ્માતમાં ત્રણ લોકોના મોત થયા છે. તેમજ એક વ્યક્તિને ગંભીરઈજા પહોંચી છે. જેથી તેને રાજકોટની હોસ્પિટલમાં સારવાર માટે ખસેડવામાં આવ્યો છે. જ્યારે આશરે પાંચથી છ વર્ષના એક બાળકનો આબાદ બચાવ થયો છે. ઘટનામાં મૃત્યુ પામનારાઓમાં કરમશીભાઈ ડાભી, પાંચુબેન ડાભી અને મહેશભાઈ ડાભીનો સમાવેશ થાય છે જ્યારે રોહિતભાઈ દુમાદીયાને ઈજાગ્રસ્ત હાલતે સારવાર માટે ખસેડાયા છે.
મૂળી-સરલા રોડ ઉપર ખનીજ ભરેલા ડમ્પર પાછળ રિફલેકટર લાઈટ નહી હોવાથી પાછળ આવતી કાર ઘૂસી ગઈ હતી. જેથી કારમાં સવાર ત્રણ લોકોના મોત થયા છે. આ ત્રણેય મૃતકો મોરબી જિલ્લાના વાંકાનેર તાલુકાના લાકડદાના રહેવાસી હતા. કોલસાની ખાણોમાં ગેરકાયદેસર ખનીજ ચોરીનું વહન કરતાં વાહનો લોકોના જીવ લઈ રહ્યા છે. રાત્રિ દરમિયાન ગેરકાયદેસર ખનનનું વહન કરતા ડમ્પરોનો ત્રાસ વધ્યો છે. થાન અને મૂળી પંથકમાં ખનીજ ચોરી ફરી ધમધમી ઉઠી છે.