કોઠારીયા સોલ્વન્ટમાં બે મકાનના તાળાં તોડી 4.81 લાખની ચોરી

આજી ડેમ પોલીસે ગુનો નોંધી CCTV આધારે તપાસ હાથ ધરી

ખાસ-ખબર ન્યૂઝ રાજકોટ, તા. 19
રાજકોટમાં કોઠારીયા સોલવંટમાં બે મકાનમાંથી રૂ.4.81 લાખના દાગીના-રોકડ ચોરી થયાનું સામે આવતાં આજીડેમ સહિતનો પોલીસ કાફલો દોડતો થયો હતો અને ફરિયાદ નોંધી તપાસ હાથ ધરી છે.

કોઠારીયા સોલ્વન્ટની શિવશક્તિ સોસાયટીમાં રહેતાં મંગુબેન લાખાભાઈ ખાટરીયા ઉ.45એ નોંધાવેલ ફરીયાદમાં જણાવ્યું હતું કે, તેમને સંતાનમા એક દીકરો તથા ત્રણ દીકરી છે ત્રણેય દિકરી સાસરે છે અને પુત્ર તેમની સાથે રહે છે. ગઈકાલે સવારે તેઓ તેના પતિ તેમજ પુત્ર અને પૌત્રવધુ પોત પોતાના કામ પર ગયેલ હતા દરમિયાન સાડા ચારેક વાગ્યાની આસપાસ પડોશી મયુરભાઈનો ફોન આવેલ અને વાત કરેલ કે, મારા ઘરે ચોરી થયેલ છે અને તમારા ઘરના પણ તાળા તુટેલ છે. તેમ વાત કરતાં તેઓ તાત્કાલીક ઘરે ગયેલ અને ઘરે જઈને રૂમમા જોતા રુમનુ તાળુ તુટેલ હતુ અને સામાન વેર-વિખેર પડેલ હતો લાકડાના કબાટના લોક તુટેલ જોવામા આવેલ હતાં કબાટમા રાખેલ સોના ચાંદીના ઘરેણા સોનાનો હાર આશરે 5 તોલાનો રૂ.2 લાખ, બે સોનાની મરઘલી 2 તોલાની રૂ. 80 હજાર, એક સોનાની અડધા તોલાની બુટી રૂ.20 હજાર, સોનાની કાનની નખલી 1 જોડી રૂ.3 હજાર, સોનાના નાકના દાણા 2, ચાંદીની લક્કી 2, 1 ચાંદીનુ કડુ, ચાંદીના સાંકળા 2 જોડી જોવા મળેલ નહિ. ઉપરાંત કબાટમાં રોકડ રકમ રાખેલ હતી તે પણ ગાયબ હતી તેમજ પડોશમા રહેતા મયુરભાઈ કનુભાઈ લખલાણીના મકાનમાંથી 1 જોડી સોનાની કાનની સરી આશરે 8 ગ્રામની રૂ.35 હજાર, ત્રણ જોડી સોનાની કાનની બુટી દોઢ તોલાની રૂ.60 હજાર, ત્રણ સોનાના નાકના દાણા, બે સોનાની નાકની નથડી, 1 સોનાનો ઓમકાર, ચાંદીના પગના સાંકળા 3 તેમજ રોકડા રૂ.20 હજારની ચોરી થયેલ હોવાનું સામે આવ્યું હતું

બંધ રહેલ મકાનમાંથી રૂ.3.35 લાખ અને તેમની પડોસીના મકાનમાંથી રૂ.1.26 લાખ મળી કુલ રૂ.4.81 લાખના મુદામાલની ચોરી થતાં ફરીયાદ નોંધાવતા આજીડેમ પોલીસે ગુનો નોંધી પીઆઈ એ.બી.જાડેજા અને ટીમે સીસીટીવી ફુટેજના આધારે તસ્કરોની શોધખોળ હાથ ધરી હતી.