પીવાના પાણી અને ભૂગર્ભ ગટરની સમસ્યા મુદ્દે મહિલાઓનો હોબાળો

હારીજના જલારામ પાર્ક ત્રણ દરવાજા વિસ્તારમાં પાયાના પ્રશ્ર્નો મુદ્દે રજૂઆત

આડેધડ ખોદકામથી વાહનચાલકોને આવન-જાવનમાં મુશ્કેલી

ખાસ-ખબર ન્યૂઝ હારીજ, તા.26
હારીજના જલારામ પાર્ક ત્રણ દરવાજા વિસ્તારમાં મહિલાઓએ પાયાના પ્રશ્ર્નોને લઈને પાલિકા વિરુદ્ધ સુત્રોચ્ચાર કરી ભારે રોષ વ્યક્ત કર્યો હતો. નગર વિકાસ કમિટી તથા હિતરક્ષક કમિટીના સભ્યો સ્થળ પર પહોંચી પાલિકાના દ્વારા કરવામાં આવતી કામગીરી યોગ્ય કરવા માંગ કરી હતી.

હારીજ નગરમાં છેલ્લાં ઘણા સમયથી પાયાની સુવિધાથી લોકો ત્રાહિમામ પોકારી ઉઠ્યા છે. હારીજ વોર્ડ નંબર (પ)ના જલારામ પાર્ક ત્રણ દરવાજા વિસ્તરમાં છેલ્લાં ઘણા સમયથી પીવાના પાણીની સમસ્યા, ભૂગર્ભ ગટરની સમસ્યાને લઈ મહિલાઓએ રોષ વ્યક્ત કરી હલ્લાબોલ મચાવ્યો હતો. ત્રણ દરવાજા વિસ્તારમાં પીવાનું મીઠું પાણી સમયસર ના મળતાં સ્થાનિકોએ હોબાળો મચાવ્યો હતો. તાજેતરમાં જલારામ પાર્ક ત્રણ દરવાજા વિસ્તારમાં ખોદકામ કરી પીવાના પાણીની પાઇપલાઇનની અણઘડ કામગીરીને પીવાના પાણીની પાઇપલાઇન તૂટી જતાં પાણી સમયસર મળતું ન હોવાનું મહિલાઓએ જણાવ્યું હતું. આડેધડ ખોદકામને લઈ મહિલાઓ, બાળકો, સિનિયર સિટીઝનો, વાહનચાલકોને અવરજવર કરવામાં ભારે હાલાકીનો સામનો કરવાની નોબત આવી હતી. હાલમાં પાલિકા દ્વારા પાઇપલાઇન નાખવાની કામગીરી દરમિયાન કોઈ પણ પ્રકારના આયોજન વગર અણઘડ ખોદકામ કરી પાઇપલાઈનની કામગીરી સમયે કોઈ જવાબદાર કોન્ટ્રાકટર પણ હાજર ન હોવાથી કામગીરીમાં લોલંલોલ થતું હોવાની રાવ સાથે સ્થાનિક લોકોએ ભારે રોષ વ્યક્ત કર્યો હતો. જેને લઈ નગર વિકાસ કમિટી તથા હિત રક્ષક કમિટી સ્થળ પર આવી કામગીરીની ચકાસણી કરી હતી. સ્થાનિક લોકોના જણાવ્યા મુજબ પીવાના પાણીની સમસ્યાને લઈ પાલિકા તંત્રને અનેક રજુઆત કરવા છતાં આંખ આડા કાન કરી એકબીજા ઉપર જવાબદારી સોંપી દેતા હોવાના આક્ષેપો કરવામાં આવ્યા હતા. આગામી સમયમાં પીવાના પાણી, ભૂગર્ભ ગટરની સમસ્યાનું વહેલી તકે કાયમી ધોરણે નિકાલ કરવા સ્થાનિકોએ માગ કરી હતી.