વ્યાજંકવાદે દંપતીનો ભોગ લીધો : રાજકોટમાં વ્યાજના વિષચક્રમાં ફસાયેલાં પતિ-પત્નીનો પોતાના કારખાનામાં જ સજોડે ફાંસો ખાઈ આપઘાત

4 લાખનું દૈનિક 42 હજાર વ્યાજ ચૂકવ્યું, આજે 8 લાખ ન ચૂકવે તો દૈનિક 70 હજાર વ્યાજ વસૂલવાની મળી હતી ધમકી

વૃદ્ધ માવતરે આધારસ્તંભ પુત્ર, 15 વર્ષના પુત્રએ માવતર ગુમાવતા પરિવારમાં શોકઃ મોરબીના શખ્સ સામે આક્ષેપ

રાજકોટમાં પોલીસના લોક દરબાર પછી પણ વ્યાજખોરોનો ત્રાસ યથાવત રહ્યો હોય તેમ વ્યાજના વિષચક્રમાં ફસાયેલા દંપતીએ પોતાના કારખાનામાં જ સજોડે ફાંસો ખાઈ આપઘાત કરી લેતા અરેરાટી વ્યાપી ગઈ ગઈ છે કૃષ્ણનગરમાં રહેતા રમેશભાઈ અને તેમના પત્ની ભારતીબેને અટીકા સ્થિત પોતાના કારખાનામાં આ અંતિમ પગલું ભરી લેતા પરિવારમાં કલ્પાંત છવાયો છે દંપતીએ ૪ લાખ લીધા બાદ તેનું દરરોજ ૪૨ હજાર વ્યાજ ભરતા હતા આર્થિક ભીંસ વધતા રકમ ૮ લાખ થઈ ગઈ હતી આજથી દરરોજ ૭૦ હજાર ચુકવવાની ધમકી અપાઈ હતી જેથી કંટાળીને આ પગલું ભર્યું હોવાનું પ્રાથમિક તપાસમાં જાણવા મળતા ભક્તિનગર પોલીસે હાલ અકસ્માતે મોત અંગે ગુનો નોંધી બનાવના મૂળ સુધી પહોંચવા તપાસ હાથ ધરી છે.
પોલીસ સૂત્રોમાંથી પ્રાપ્ત વિગત મુજબ ગત મોડી રાત્રે મવડીના કૃષ્ણનગર વિસ્તારમાં રહેતા અને અટીકા વિસ્તારમાં લસણનું કારખાનું ધરાવતા રમેશભાઈ માવજીભાઈ ચાવડા ઉ.૪૦ અને તેમના પત્ની ભારતીબેન ઉ.૪૦એ અટીકામાં પોતાના લસણના કારખાનામાં ગળાફાંસો ખાઈ આપઘાત કરી લીધો હતો. ગઈકાલે રાત્રે અચાનક ઘરેથી લાપતા થઈ જતા રમેશભાઈના પિતા સહિતના પરિવારજનો દંપતિને શોધવા નીકળ્યા હતા ત્યારે કારખાનામાં તેમના લટકતા મૃતદેહ મળ્યા હતા ૧૦૮ના ઈ.એમ.ટી. ઉર્વીશાબેનએ બન્નેને જોઈ તપાસી મૃત જાહેર કરતા ભક્તિનગર પોલીસનો સ્ટાફ દોડી ગયો હતો અને બંને મૃતદેહ નીચે ઉતારી પીએમ અર્થે સિવિલ હોસ્પિટલે ખસેડાયા હતા પ્રાથમિક તપાસમાં દંપતી જથ્થાબંધ લસણ લઈને તેને ફોલીને નજીકના વિસ્તારમાં તેમજ હોટલ રેસ્ટોરન્ટમાં ફેરી કરીને વેચતા હતા મૃતક રમેશભાઈએ મોરબીના ગોબર નામના શખ્સ પાસેથી ૪,૦૦,૦૦૦ વ્યાજએ લીધા હતા. જેનું દરરોજ ૪૨ હજાર રૂપિયા વ્યાજ ભરતા હતા દરમિયાન આર્થિક ભીંસ વધી જતા વ્યાજ આપવાનું બંધ કર્યું હતું જેથી આ રકમ ૪ લાખથી વધીને ૮ લાખ થઈ ગઈ હતી જેના દરરોજ ૭૦ હજાર રૂપિયા આજથી જ ચૂકવવા ધમકી મળી હતી જેથી આ પગલું ભરી લીધાનું પ્રાથમિક તપાસમાં સામે આવ્યું છે મૃતક બે બહેનના એકના એક ભાઈ અને વૃદ્ધ માતા-પિતાના આધારસ્તંભ હતા ૧૫ વર્ષના પુત્રએ માતા-પિતાની છત્રછાયા ગુમાવતા પરિવારમાં ભારે શોક વ્યાપી ગયો છે વ્યાજખોરીના એન્ગલ અંગે ભક્તિનગર પોલીસે વધુ તપાસ હાથ ધરી છે.

શહેરના સામા કાંઠે બંટા વ્યાજનો ધીકતો ધંધો
શહેરના સામા કાંઠે સંતકબીર રોડ ઉપર ઇમિટેશનની મોટી માર્કેટ છે ઉપરાંત ચાંદીનો પણ મોટો કારોબાર ચાલી રહી છે અહીંયા ધંધા માટે વેપારીઓને ના છૂટકે પૈસા વ્યાજે લેવાની જરૂર પડતી હોય છે જેથી અહીં પણ વ્યાજખોરીનો ધીકતો ધંધો ચાલી રહ્યો છે વેપારીઓ જ્યારે માંગે ત્યારે વ્યાજખોરો માંગ્યા મુજબની રકમ બંટા (૨૫થી ૫૦%) વ્યાજે આપતા હોવાનું જાણવા મળે છે.

વ્યાજના વરુઓનું ખાખી સાથે સેટિંગ
રાજકોટમાં ચામડાતોડ વ્યાજની ઉઘરાણી કરતા વ્યાજખોરોને ખાખી સાથે સીધું સેટિંગ હોય તેવી ચર્ચાએ પણ જોર પકડ્યું છે કારણકે વ્યાજખોરોની ચુંગાલમાં ફસાયેલા લોકો પ્રથમ પોલીસમાં અરજી કરે છે અરજદારનું પેપર ત્યાં જ ફૂટી જાય છે અને અરજી અંગે જે તે વ્યાજખોરને જાણ પોલીસ સ્ટેશનમાંથી જ કરી દેવામાં આવે છે એટલે જ વ્યાજના વરુઓ બેખૌફ બનીને વ્યાજની પઠાણી ઉઘરાણી કરતા હોય છે.

મોરબીનો ગોબર ઉઘરાણી કરે છે તેવી પિતરાઈને વાત કરી હતી
ભક્તિનગર પોલીસ દ્વારા પરિવારજનોની પૂછપરછમાં જાણવા મળ્યું હતું કે, મૃતક રમેશભાઈએ ગઈકાલે તેમના મોટા બાપુના દીકરા પિતરાઈ ભાઈ લક્ષ્મીદાસ ચાવડાને પોતે વ્યાજખોરની જાળમાં ફસાઈ ગયા હોવાની વાત કરી હતી. લક્ષ્મીદાસભાઈના જણાવ્યા મુજબ, મોરબીનો ગોબર નામનો શખ્સ ઉઘરાણી કરતો હોવાનું જાણવા મળ્યું છે.