પ્લાસ્ટિક વેસ્ટ સહિતના જૈવિક પદાર્થમાંથી બી-ગ્રેડ ઈંધણ બનાવતા બે ઝડપાયા

રાજકોટ શહેર અને જિલ્લાના ક્રાઇમના સમાચાર

રૂડા ટ્રાન્સપોર્ટનગરમાં ચાલતા ગેરકાયદે પેટ્રોલ પંપ પર દરોડો એસઓજી-કુવાડવા પોલીસનો દરોડો

1900 લીટર શંકાસ્પદ જ્વલનશીલ પ્રવાહી સહીત 3.17 લાખનો મુદામાલ સીઝ : સેમ્પલ મોકલાયા

રાજકોટમાં ગેરકાયદે ઇંધણ વેંચતા શખ્સો ઉપર ધોંસ બોલાવવાની સૂચના અન્વયે શહેર એસઓજી અને કુવાડવા રોડ પોલીસે રૂડા ટ્રાન્સપોર્ટ નગરમાં દરોડો પાડી પ્લાસ્ટિક વેસ્ટ સહિતના જૈવિક પદાર્થમાંથી બનાવેલ બી-ગ્રેડનું ઈંધણ વેંચતા બે શખ્સો સામે કાર્યવાહી કરી 1900 લિટર જ્વલનશીલ પ્રવાહી સહિત 3.17 લાખનો મુદામાલ સીઝ કર્યો છે હાલ એફએસએલના રિપોર્ટ બાદ બંને શખ્સો સામે ગુનો નોંધવા તજવીજ હાથ ધરાશે. શહેર પોલીસ કમિશ્નર બ્રજેશકુમાર ઝા, એડી. સીપી ચૈતન્ય માંડલીક, ડીસીપી ક્રાઈમ જગદીશ બાંગરવા, એસીપી ક્રાઈમ ભરત બસીયા તરફથી શહેરમાં ગેરકાયદેસર જ્વલનશીલ પદાર્થોનું ખરીદ વેચાણ કે સંગ્રહ કરનારા શખ્સો વિરુધ્ધ કડક કાયેવાહી કરવાની આપેલ સુચના અન્વયે એસઓજી પીઆઈ એન.બી.ચૌધરી અને કુવાડવા રોડ પોલીસ મથકના પીઆઈ એ.એન.જાનીની રાહબરીમાં ટીમ પેટ્રોલીંગમાં હતી ત્યારે એસઓજીના હેડ કોન્સ્ટેબલ જયદિપસિંહ ચૌહાણ, ઉપેન્દ્રસિંહ ઝાલા અને કોન્સ્ટેબલ યશપાલસિંહ ઝાલાને બાતમી મળી હતી કે, અગાઉ ગેરકાયદેસર બાયોડીઝલના વેંચાણમાં પકડાયેલ મહેલમ ફિરોજ ભારમલ નામનો શખ્સ રૂડા ટ્રાન્સપોર્ટનગરમાં એક ગોડાઉનમાં શંકાસ્પદ અને ભેળસેળ યુકત પેટ્રોલીયમ જવલનશીલ પદાર્થનો જથ્થો પ્લાસ્ટીકના બે અલગ અલગ કન્ટેન્ટરમાં રાખી વેચાણ કરે છે આ ચોક્કસ બાતમી આધારે દરોડો પાડતાં વિસાવદરનો મહેલમ ફિરોજ ભારમલ તથા તેની સાથે અન્ય એક શખ્સ રાજકોટનો રણજીત કનુ ધાંધલ ગોડાઉનમાં ગેરકાયદે ઈલેક્ટ્રીક ફયુલ પંપ ઉભુ કરી અને જવલનશીલ પેટ્રોલીયમ વાસ ધરાવતો પદાર્થ સંગ્રહ કરી ગ્રાહકોને પ્રાઇવેટ વાહનોમાં વેંચાણ કરતા રંગે હાથ મળી આવતા બંને શખ્સોની અટકાયત કરી શંકાસ્પદ જ્વલનશીલ પેટ્રોલીયમ પ્રવાહી 1900 લીટર, ઈલેક્ટ્રીક ફયુલ પંપ, પ્લાસ્ટીકના કન્ટેનર, લેપટોપ, ઈલેક્ટ્રીક મોટર, કેલ્ક્યુલેટર, ઇલેક્ટ્રીક ફયુલ પંપના મીટર રીડીંગ લખેલ એક નોટબુક સહિત કુલ 3.17 લાખનો મુદામાલ કબ્જે કરી કાર્યવાહી કરી હતી પોલીસની પ્રાથમિક તપાસમાં પકડાયેલ મહેલમ પોતાના વતન વિસાવદરમાં જૈવીક પદાર્થ જેવા કે પ્લાસ્ટિક વેસ્ટ સહિતના કચરામાંથી બી ગ્રેડનું ઈંધણ ઉત્પાદન કરતો હતો. તેને અન્ય આરોપી રણજીત સાથે મળી ત્રણ મહિના પહેલા રૂડા ટ્રાન્સપોર્ટ નગરમાં મીની પેટ્રોલ પંપ શરૂ કર્યું હતું. જેમના માટે વિસાવદરથી બી ગ્રેડનો પેટ્રોલિયમ જથ્થો લાવી અહીં ટ્રક સહિતના વાહનોમાં 85 રૂપિયા લીટર લેખે વેચાણ કરતા હોવાનું જાણવા મળ્યું છે હાલ પોલીસે પેટ્રોલિયમ પદાર્થના સેમ્પલો લઈ એસએસએલમાં મોકલવામાં આવ્યા છે રિપોર્ટના આધારે બંને શખ્સો વિરુદ્ધ ગુનો નોંધી કાર્યવાહી હાથ ધરવામાં આવશે.

રાજકોટમાં ભંગારના બે ડેલા ધરાવતો નામચીન શખ્સ પિસ્તોલ સાથે ઝડપાયો : ક્રાઇમ બ્રાન્ચનો અમુલ સર્કલ પાસે દરોડો : અગાઉ 15 ગુનાઓમાં પકડાઈ ચુક્યો છે

રાજકોટમાં ગેરકાયદે હથિયારોની હેરાફેરી ઉપર ખાસ વોચ રાખવાની સૂચના અન્વયે ક્રાઇમ બ્રાન્ચની ટીમે રાજકોટમાં ભંગારના ડેલા ધરાવતા કુખ્યાત શખ્સને દેશી બનાવટની પિસ્તોલ સાથે ઝડપી લઇ ધોરણસરની કાર્યવાહી હાથ ધરી છે આ શખ્સ અગાઉ 15 જેટલા ગુનાઓમાં પકડાઈ ચકયો છે. રાજકોટ ક્રાઇમ બ્રાન્ચના પીઆઇ એ એસ ચાવડા, પીએસઆઈ એસ એમ રાણાની ટિમ પેટ્રોલિંગમાં હતી ત્યારે સ્ટાફના મહેશભાઈ સોલંકી, ધર્મરાજસિંહ રાણા અને નિકુંજભાઈ મારવિયાને મળેલી બાતમી આધારે અમૂલ સર્કલ નજીક વોચ ગોઠવી અગાઉ અનેક ગુનામાં પોલીસ ચોપડે ચડી ગયેલા રાજકોટના દૂધસાગર રોડ પર રહેતા જુબેર બસીરભાઈ સમાને દેશી બનાવટની પિસ્તોલ સાથે ઝડપી લીધો હતો પોલીસે જણાવ્યું હતું કે, જુબેર લાંબો ગુનાઇત ઇતિહાસ ધરાવે છે તેના વિરુદ્ધ રાજકોટ, ગોંડલ, વાંકાનેર, જૂનાગઢ અને મોરબીમાં હત્યાની કોશિષ, મારામારી, પ્રોહિબિશન, ચોરી સહિતના ૧૫ ગુના નોંધાયેલા છે 2021માં તેના વિરુદ્ધ જૂનાગઢના બી. ડિવિઝન પોલીસ મથકમાં આર્મ્સ એક્ટ હેઠળ પણ ગુનો નોંધાયો હતો. દૂધસાગર રોડ ઉપર ભંગારના બે ડેલા ધરાવે છે. હવે ક્રાઈમ બ્રાંચે તેને પિસ્તોલ આપનારને ઝડપી લેવા તજવીજ શરૂ કરી છે.

મોરબી રોડ પરની વાલ્મીકિ સોસાયટીમાં બી ડિવિઝન પોલીસનો દરોડો : મકાનમાંથી 4.32 લાખના અંગ્રેજી દારૂ સાથે એક શખ્સ ઝડપાયો

રાજકોટના મોરબી રોડ જકાતનાકા પાસેના વાલ્મિકિ સોસાયટીમાં રહેતા અમિત ઉર્ફે બુસો રાજુભાઈ ડોડીયા (ઉ.વ.૨૭)ને તેના મકાનમાંથી બી.ડિવિઝન પોલીસે 4.32 લાખના અંગ્રેજી દારૂ સાથે ઝડપી લીધો હતો. આરોપીના ભાડાના મકાનની બહારથી બલેનો અને એક્સેસ મળી આવતાં આ બંને વાહનો ઉપરાંત દારૂ મળી પોલીસે કુલ 11 લાખનો મુદ્દામાલ કબજે કર્યો હતો. પોલીસ સુત્રોએ જણાવ્યું કે, આ બંને વાહનો કોના છે તે અંગે તપાસ શરૂ કરવામાં આવી છે કાર માલિક જૂનાગઢ રહે છે. જેની પુછપરછ કરતા મિત્રને કાર આપ્યાનું રટણ કર્યું છે. દારૂના સપ્લાયર તરીકે અજય નામના શખ્સનું નામ ખુલ્યું છે. તે ઝડપાયા પછી દારૂનો જથ્થો ક્યાંથી આવ્યો તે અંગે ખુલાસો થશે. આ ઉપરાંત બંને વાહનો લઈ કોણ આવ્યું હતું તે દિશામાં પણ તપાસ કરવામાં આવી રહી છે.

ઉમરાળી ગામે અશ્લીલ હાલતમાં પકડાયેલો કૌટુંબિક કાકાનો દીકરો પત્નીને ભગાડી ગયો : કોઇ પોલીસ ફરીયાદ કરી તો હુ તને જાનથી મારી નાખીશું તેમ કહીને ગાળો ભાંડી ભાગી ગયો

રાજકોટ તાલુકાના ઉમરાળી ગામે રહેતા અને રીક્ષા ડ્રાયવિંગ કરતા સાવનભાઇ લખુભાઇ ઉર્ફે લક્ષ્મણભાઈ પરમાર ઉ.30એ તેના જ ગામના ભાવેશ વીરાભાઇ પરમાર, દક્ષાબેન, કિરણબેન અને રોહિત સામે આજી ડેમ પોલીસ સ્ટેશનમાં ફરિયાદ નોંધાવી છે. ફરિયાદમાં જણાવ્યું હતું કે ગઈકાલે બપોરે હુ મારા રીક્ષાનો ફેરો પુરો કરીને ઘરે આવીને ઘરની ડેલી ખખડાવેલ તો મારી પત્નીએ ખોલેલ નહી જેથી હુ મારા ઘરની વંડી કુદીને ઘરની અંદર ગયેલ અને જોયેલ તો મારા ઘરના રૂમનો દરવાજો ખુલ્લો હતો અને રૂમની અંદર મારી પત્ની તથા કૌટુંબીક કાકાનો દીકરો ભાવેશ વીરાભાઇ પરમાર બંને બિભત્સ હાલતમા હતા આ બંનેને આવી હાલતમા જોઇ જતા ભાવેશ મને કહેવા લાગેલ કે આ વાત કોઇને કરતો નહી, હુ ગામ મુકીને બહાર રહેવા જતો રહીશું મે મારા પિતાને ફોન કરીને આ વાતની જાણ કરેલ બાદ મારા સાળા રાહુલ ઉર્ફે રવિને ફોન કરીને વાત કરતો હતો ત્યારે આ બંનેએ પોતાના કપડા પેરી લિધેલ બાદ મે મારી પત્નીને આ બાબતે પુછતો હતો તેવામા ભાવેશ ઉશ્કેરાઇ ગયેલ અને મને ધક્કો મારીને પછાડી દીધેલ અને મને વાસાના ભાગે ઇજા પહોંચાડેલ તેવામા ભાવેશ તથા મારી પત્ની રૂમમાથી બહાર નીકળી ગયેલ અને ભાવેશએ રૂમનો દરવાજો બહારથી બંધ કરી દીધેલ જેથી મે ઉભા થઇ રૂમની બારી ખોલીને બૂમાબૂમ કરેલ જેથી અમારા પાડોશમા રહેતા લોકો આવી ગયેલ બાદ ભાવેશ મો.સા. લઇને આવેલ અને મારી પત્નીને કહેવા લાગેલ કે ચાલ બેસી જા ગાડીમા જેથી મારી પત્ની ઝડપથી આવેલ અને બંધ કરેલો દરવાજો ખોલી નાખેલ અને મારા નાના દીકરાને લઇને ભાવેશની પાછળ ગાડીમા બેસી ગયેલ જે દરમ્યાન હુ બહાર નીકળેલ તેવામા જતા જતા આ ભાવેશ કહેવા લાગેલ કે, આ બાબતે તે કોઇ પોલીસ ફરીયાદ કરી તો હુ તને જાનથી મારી નાખીશું તેમ કહીને ગાળો બોલીને પોતાનુ મો.સા. લઇને ત્યાથી જતો રહેલ બાદ હું જયેશભાઈનું મો.સા. લઇને ભાવેશની પાછળ ગયેલ બાદ આટકોટ ગામના જસદણ જવાના રસ્તા સુધી ગયેલ બાદ મારા મો.સા.મા પેટ્રોલ ખુટી જતા હું ત્યાથી પેટ્રોલ ભરાવી મારા ઘરે પરત આવતો હતો ત્યારે ભાવેશની બેન દક્ષા, ભાવેશના મમ્મી કિરણબેન તથા ભાવેશનો ભાઈ રોહીત મને જેમ ફાવે તેમ ભુંડા બોલવા લાગેલ બાદ ઘરે જઇને જોયેલ તો સોનાની હાંસડી,બુટી, ચેઇન તથા અન્ય નાની મોટી વસ્તુઓ તથા રોકડ જોવામા આવેલ નહી જે મારી પત્ની તેની સાથે લઇ ગયેલ છે. બાદ મે 112 નંબર પર કોલ કરી ફરિયાદ નોંધાવી હતી.

બેડલા ગામે ધમધમતી દેશી દારૂની ભઠ્ઠી ઉપર સ્ટેટ મોનીટરીંગ સેલનો દરોડો : 1600 લીટર આથાનો નાશ : 25 લીટર દારૂ સહીત 59 હજારનો મુદામાલ કબ્જે

રાજ્યભરમાં દારૂ જુગારના કેસો કરવાની સૂચના અન્વયે સ્ટેટ મોનીટરીંગ સેલની ટીમે રાજકટોના એરપોર્ટ પોલીસ સ્ટેશન વિસ્તારમાં બેડલા ગામે ધમધમતી દેશી દારૂની ભઠ્ઠી ઉપર દરોડો પાડી 1600 લીટર આથાનો નાશ કરી, 25 લીટર દેશી દારૂ સાઈટ 59,350 રૂપિયાનો મુદામાલ ક્બ્જે કરી ભઠ્ઠી ચલાવતા બુટલેગર સામે એરપોર્ટ પોલીસ મથકમાં ગુનો રજીસ્ટર કરાવી ધરપકડ કરી ધોરણસરની કાર્યવાહી હાથ ધરી હતી. રાજ્યભરમાં ગેરકાયદે પ્રવૃતિઓ ચાલતી હોય તેને ડામી દેવાની સૂચના અન્વયે સ્ટેટ મોનીટરીંગ સેલના પીઆઇ આર.કે.કરમટાની રાહબરીમાં ટિમ પેટ્રોલિંગમાં હતી ત્યારે સ્ટાફના જયપાલસિંહ દિલીપસિંહ ઝાલા, અજીતસિંહ સહિતના સ્ટાફે બાતમી આધારે એરપોર્ટ પોલીસ સ્ટેશન વિસ્તારમાં આવેલ બેડલા ગામે દરોડો પાડી દેશી દારૂની ભઠ્ઠી ઝડપી લીધી છે પોલીસે દેશી દારૂની ભઠ્ઠી ચલાવતા બેડલા ગામના વિજય ઉર્ફે બાવો ઓબાધુંભાઈ જખાણિયાની ધરપકડ કરી 1600 લીટર આથાનો નાશ કર્યો હતો તેમજ ઘટનાસ્થળેથી 25 લીટર દેશી દારૂ, લોંખડનું પીપળું, બે ચૂલા, એક તગારું, બાફણીયા, ગેસના બે બાટલા, ઇલેક્ટ્રિક મોટર, મોબાઈલ સહીત 59,350 રૂપિયાનો મુદામાલ કબ્જે કરી એરપોર્ટ પોલીસ સ્ટેશનમાં ગુનો રજીસ્ટર કરાવ્યો હતો.

રાજકોટમાં જુગાર રમતી 5 મહિલા સહીત 14 ઝડપાયા

રાજકોટમાં દારૂ જુગારના કેસો કરવાની સૂચના અન્વયે આજી ડેમ પોલીસ સ્ટેશનના હરપાલસિંહ જાડેજા સહિતની ટિમ પેટ્રોલિંગમાં હતી ત્યારે સ્ટાફને મળેલી બાતમી આધારે લોઠડા ગામે દરોડો પાડી જાહેરમાં જુગાર રમતા હિતેશ બીજલભાઈ ગણોદિયા, મહેશ હમીરભાઇ જાંબુકીયા, જોશનાબેન હિતેષભાઇ ગણોદિયા, ભાવનાબેન જેશાભાઈ કુકડીયા, જયાબેન બીજલભાઈ ગણોદિયા, કાંતાબેન પ્રકાશભાઈ મકવાણા અને હેતલબેન મહેશભાઈ જાંબુકીયાની ધરપકડ કરી રોકડા 9860 કબ્જે કર્યા છે જયારે તાલુકા પોલીસ મથકના પીએસઆઈ એ બી ચૌધરીની રાહબરીમાં ટિમ પેટ્રોલિંગમાં હતી ત્યારે ૠતિકભાઈ ઠુંમર સહિતની ટીમે બાતમી આધારે મવડી ગામની શિવાય એપાર્ટમેન્ટમાં દરોડો પાડી જુગાર રમતા ચંદ્રેશ કિશોરભાઈ ઠાકર, મોહન રામજીભાઈ નાર, નિલેશ પ્રતાપરાય ચૌહાણ, અભી જમનભાઈ પોલરા, નિલેશ રમણીકભાઇ મારડિયા, મેહુલ રાણાભાઇ લાંબા અને પ્રતીક પ્રેમજીભાઈ સોલંકીની ધરપકડ કરી રોકડા 15,440 કબ્જે કર્યા છે.

કાળીપાટ પાસે ટ્રકની ઠોકરે બાઈક ચડી જતા લોઠડાના યુવાનનું મોત : આધારસ્તંભ યુવાન પુત્રના મૃત્યુથી પરિવારજનો શોકમાં ગરકાવ

રાજકોટમાં હીટ એન્‍ડ રનના વધુ એક બનાવમાં એક પરિવારના આધારસ્‍તંભ યુવાન પુત્રનું મોત થયું છે. કાળીપાટ નજીક રાતે ટ્રકનો ચાલક બાઇકને ઠોકરે લઇ ભાગી જતાં બાઇકચાલક લોઠડા ગામના યુવાનનું ગંભીર ઇજા થતાં સારવાર માટે રાજકોટ ખસેડાયો હતો. પરંતુ અહિ દમ તોડી દેતાં પરિવારમાં કલ્‍પાંત સર્જાયો છે. સરધાર નજીક લોઠડા ગામે રહેતો રાકેશ ઉર્ફે રાહુલ વિઠ્ઠલભાઇ સરીયા ઉ.21 નામનો યુવાન રાત્રીના હોન્‍ડા લઈને જતો હતો ત્‍યારે કાળીપાટ નજીક અજાણ્‍યા ટ્રકનો ચાલક બાઇકને ઠોકરે લઇ ભાગી જતાં રાકેશ બાઇક સહિત રોડ પર ફેંકાઇ જતાં ગંભીર ઇજાઓ થઇ હતી બનાવને પગલે લોકો ભેગા થઇ જતાં 108 બોલાવી હતી દરમિયાન કોઇ પરિચીત રાકેશને ઓળખી જતાં તેના પરિવારજનોને જાણ કરી હતી ગંભીર ઇજાગ્રસ્‍ત રાકેશને સારવાર માટે રાજકોટ સિવિલ હોસ્‍પિટલમાં ખસેડાયો હતો. પરંતુ અહિ ટુંકી સારવાર દરમિયાન દમ તોડી દીધો હતો બનાવની જાણ હોસ્‍પિટલ ચોકીના સ્‍ટાફે આજીડેમ પોલીસને કરી હતી. મૃત્‍યુ પામનાર રાકેશ ઉર્ફે રાહુલ બે ભાઇ અને એક બહેનમાં નાનો હતો અને પડવલામાં બફની ફેક્‍ટરીમાં કામ કરતો હતો તેના પિતાનું કોરોના કાળમાં અવસાન થયું હોઇ તે મોટા ભાઇની સાથે ઘરનો આધારસ્‍તંભ હતો સાંજે નોકરીએથી છુટીને ઘરે આવ્‍યા બાદ બાઇક લઇને આટો મારવા નીકળ્‍યો ત્‍યારે આ બનાવ બન્‍યો હતો યુવાન દિકરાના મૃત્‍યુથી પરિવારમાં શોક વ્યાપી ગયો છે અકસ્‍માત સર્જી નાસી છૂટેલા ટ્રકચાલકને પકડવા આજી ડેમ પોલીસે દોડધામ શરુ કરી છે.